Presidenti i Shqipërisë, Bajram Begaj, u bëri thirrje të enjten të gjitha palëve të shmangin dhunën dhe të angazhohen në dialog, ndërsa protestat kundër qeverisë në Tiranë kanë hyrë në ditën e tretë.
Në një mesazh drejtuar qytetarëve, Begaj tha se zëri i çdo qytetari meriton të dëgjohet, veçanërisht ai i të rinjve, por paralajmëroi se dhuna dëmton shoqërinë dhe cenon sigurinë e qytetarëve.
“Dhuna nuk është dhe nuk mund të jetë kurrë zgjidhja”, deklaroi presidenti.
Begaj tha se Shqipëria ka nevojë për qetësi, përgjegjshmëri dhe dialog, duke u bërë thirrje aktorëve të përfshirë të mos lejojnë që tensionet të cenojnë rendin kushtetues dhe stabilitetin e vendit.
Ai inkurajoi forcat e rendit në përmbushjen e detyrave të tyre dhe uroi shërim të shpejtë për të gjithë të lënduarit, policë dhe protestues.
Mesazh i Presidentit të Republikës Sh. T. Z. Bajram Begaj
Të dashur qytetarë,
Shqipëria është atdheu ynë i përbashkët. Ajo është shtëpia e të gjithëve.
Kam ndjekur protestat, kërkesat, por me keqardhje edhe aktet e dhunës së dy ditëve të fundit.
Zëri i çdo qytetari meriton të dëgjohet, veçanërisht zëri i të rinjve, të cilët përfaqësojnë shpresën dhe të ardhmen e vendit tonë. Këtë s’mund ta verë dhe nuk e vë askush në diskutim.
Por dhuna nuk është dhe nuk mund të jetë kurrë zgjidhja. Ajo dëmton shoqërinë, cenon sigurinë e qytetarëve dhe polarizon bashkëjetesën demokratike.
Në këto momente, vendi ynë ka nevojë për qetësi, përgjegjshmëri dhe dialog. Ka nevojë që dallimet të mos na përçajnë, por të na nxisin të dëgjojmë njëri-tjetrin dhe të gjejmë zgjidhje në interes të qytetarëve dhe të Shqipërisë.
U bëj thirrje të gjithëve të zgjedhin maturinë, të shmangin dhunën dhe të mos lejojnë që tensionet të cenojnë rendin kushtetues dhe stabilitetin e vendit. Inkurajoj forcat e rendit në detyrën e tyre tejet delikate dhe uroj shërim të shpejtë për çdo të lënduar, polic apo protestues.
Me përgjegjësinë dhe tagrat që më jep Kushtetuta, mbetem i hapur për këdo që dëshiron të ketë një hapësirë dialogu dhe mirëkuptimi sikurse i bëj thirrje aktorëve të përfshirë t’i përkushtohen dialogut dhe bashkëpunimit, në të mirë të rinisë, në të mirë të Shqipërisë.
Presidenti u shpreh gjithashtu i gatshëm të ofrojë hapësirë për dialog dhe mirëkuptim, duke theksuar nevojën për bashkëpunim në interes të të rinjve dhe të Shqipërisë.
Protestat, të udhëhequra nga studentët dhe të zgjeruara në një lëvizje më të gjerë kundër qeverisë së kryeministrit Edi Rama, janë shoqëruar me përplasje me policinë dhe dëmtime të pronës publike. Protestuesit kërkojnë reforma në arsim dhe kanë ngritur shqetësime për korrupsionin dhe kostot e jetesës.
Rama ka deklaruar për Reuters se nuk do të japë dorëheqjen, duke argumentuar se qeveritë ndryshojnë përmes zgjedhjeve demokratike. Ai është shprehur i gatshëm të diskutojë shqetësimet për kostot e arsimit, por ka dënuar dhunën dhe sulmet ndaj institucioneve.
© 2026 Argumentum
