Editorial
Ndërsa jemi vetëm një muaj para zgjedhjeve parlamentare në Kosovë, vjen një koment aspak diplomatik nga Richard Grenell i cili gjatë administratës së parë të Trump, ishte i dërguar i posaçëm presidencial për negociatat Serbi – Kosovë.
Një koment i cili prek drejtpërdrejtë Albin Kurtin si individ, si Kryeministër i Kosovës por dhe si kandidat për kryeministër në zgjedhjet parlamentare që do mbahen më 9 shkurt të këtij viti.
I nominuari nga Donald Trump për Misione të Posaçme në botë, Richard Grenell në një prononcim për gazetën Nacionale, ka thënë se raportet Kosovë –ShBA në kohën e kryeministrit Albin Kurti janë në krizë.
Për herë të parë në 35 vjet marrëdhëniet mes Kosovës dhe Shteteve të Bashkuara të Amerikës “janë në krizë dhe partizane, me Albin Kurtin kryeministër”. Dhe jo vetëm me ShBA-në në krizë, thotë ai, por edhe me Bashkimin Evropian.
Grenell thekson se prej presidentit të parë kosovar, Ibrahim Rugovës e te kryeministri i fundit para qeverisë së Vetëvendosjes, Avdullah Hotit, marrëdhëniet kanë qenë bipartizane, me marrëdhënie “të shkëlqyeshme” si nga administrata Republikane e te ajo Demokrate.
“Ibrahim Rugova, Hashim Thaçi dhe Avdullah Hoti, që të gjithë kishin marrëdhënie të shkëlqyeshme me Republikanët dhe Demokratët në Amerikë. Hera e vetme në 35 vite kur marrëdhëniet Kosovë – ShBA (edhe Kosovë – BE) u bënë partizane dhe në krizë, janë me Albin Kurtin kryeministër”, tha Richard Grenell për Nacionale.
Në fakt duket një deklarate jo vetëm keqdashëse por dhe e mbushur me mllef, për vetë faktin se një intervistë të mëparshme Z.Kurti duket se e ka “minimizuar” rolin e Grenell, në Ballkan gjatë këtij mandati presidencial te Trump.
Në një intervistë dhënë me 6 janar, kryeministri i Kosovës Albin Kurti u pyet për raportet që ka patur me emisarin Richard Grenell dhe administratën Trump.
Kurti deklaroi se raportet e Kosovës me Amerikën janë të shkëlqyera dhe shtoi se Richard Grenell është emëruar me detyra në Kore, Venezuelë e misione të posaçme dhe sipas tij, e kaluara nuk do të ndikojë në raportet aktuale.
“Në raport me Amerikën kemi marrëdhënie të shkëlqyeshme, që nuk janë vetëm në diplomaci por edhe të mbrojtjes e zhvillimit. Në fushën e mbrojtjes po bëjmë më shumë blerje. Po bëjmë trajnime të ndryshme. Nuk shoh kurrfarë vështirësish për marrëdhënie të shkëlqyera me SHBA, që janë partneri ynë kryesor. Unë nuk besoj që do të ndikojnë në raportet tona. Ish-emisari Grenell ka detyrë për Korenë e Jugut, Venezuelën dhe misione të posaçme, është e rëndësishme çfarë emërime të reja do të ketë në administratë”, tha Kurti për Kosovapress.
Ndonëse përgjgjia e Kurtit është tejet konstruktive edhe në raport me Grenell, sërish ky i fundit vijon misionin e tij si ‘fëmijë planprishës”, veçanërisht ndaj Kurtit dhe qeverisë së tij.
Kujtojmë se një nga arsyet e forta pse u rrëzua qeveria Kurti 1 në vitin 2020, ishte ndikimi i Grenell. Kurti e ka akuzuar Grenell për koordinimin me opozitën për të iniciuar mocionin e mosbesimit ndaj qeverisë së tij, duke thënë se qëllimi kryesor ishte përshpejtimi i një marrëveshjeje me Serbinë. Kurti ka theksuar se qeveria e tij ishte kundër një lloj marrëveshjeje që nuk e garantonte njohjen e Kosovës nga Serbia, dhe se Grenell, si dërguar i posaçëm i presidentit Donald Trump, kishte interes për të nxitur një marrëveshje të shpejtë, pavarësisht pengesave të mundshme për sigurinë dhe integritetin e Kosovës.
Partia e Albin Kurtit, Lëvizja Vetëvendosje, doli fituese e zgjedhjeve parlamentare të 6 tetorit 2019 dhe ajo arriti të bëjë koalicion qeverisës me Lidhjen Demokratike të Kosovës, e drejtuar nga Isa Mustafa. Me 82 vota pro, 32 kundër dhe 1 abstenim Kuvendi i Kosovës rrëzoi kreun e Vetëvendosjes, që drejtoi ekzekutivin për vetëm 51 ditë.
Albin Kurti në atë kohë reagoi duke thënë se “ishte rënie e domosdoshme për ngritjen e nevojshme”.
Kurti theksonte sërish në atë postim në vitin 2020 se kuptimi i mosbesimit ishte porosia e emisarit të SHBA’së për dialogun Kosovë – Serbi, Richard Grenell.
“Qëllimi i mosbesimit nuk ishte rrëzimi i qeverisë sa dobësimi i qeverisjes. Ndërkaq kuptimi i mosbesimit ishte porosia ambasadorit Grenell: në Kosovë janë mbi 80 deputetë të gatshëm të rrezikojnë edhe jetët e qytetarëve vetëm që të kalojë shkëmbimi presidencial”.
Ndërhyrja e diplomatëve amerikane në zhvillimet politike Kosovë ka qenë e paprecedente në atë periudhe duke ndikuar drejtpërdrejtë në rrëzimin e qeverisë Kurti. Përveç Grenell, në anën tjetër ishte ambasadori amerikan në Kosovë Philip Kosnet, i cili një ditë para mbajtjes së mocionit të votëbesimit në parlament, shkroi në Twitter se ai “është i lumtur që po mbahet seanca për mocionin e votëbesimit të qeverisë Kurti”.
“Gëzohem ta shoh Kuvendin që nesër do ta mbajë seancën e mocionit të votëbesimit. I kam thënë kryeministrit të Kosovës, Albin Kurtit, se është e rëndësishme që të respektohet kushtetuta e vendit nga Kuvendi dhe institucionet e tjera”, shkroi Kosnet.
Megjithatë një vit më pas, Albin Kurti erdhi në krye të Qeverisë së Kosovës, kjo pas rezultatit të zgjedhjeve të parakohshme parlamentare që u mbajtën më 14 shkurt të 2021-ës, ku VV doli partia më e votuar.
Historia duket se po përsëritet, ose të paktën këtë po tenton të bejë Grenell tashmë si emisar special për Misione të Posaçme në botë, ai duket se po tenton të rishfaqë ndikimin e tij në një periudhë delikate, duke e bërë këtë 30 ditë para zgjedhjeve parlamentare në Kosovë, një kohë kur vendi është nën presion politik të brendshëm dhe të jashtëm.
Deklarata e fundit e Grenell qartësisht është prove e ndërhyrjes së tij në fushatën elektorale të Kosovës, duke i dhënë mbështetje një udhëheqësi politik që është tashmë në Hagë, siç është ish-presidenti Hashim Thaçi, ( pra Partisë Demokratike të Kosovës). Këtu nuk po flasim për arrestimin e ish-presidentit Thaçi, padiskutim kjo çështje ka dritëhijet e saj ende të pa sqaruara, por për insistimin e Grenell tek një emër…
Përveç mbështetjes ndaj Thaçit, nuk ka pasur shumë mbështetje ose vëmendje nga Grenell për politikanë të tjerë të Kosovës, si për shembull Lumir Abdixhiku, kryetar i Lidhjes Demokratike të Kosovës (LDK), ose Memli Krasniqi, aktualisht lideri i Partisë Demokratike të Kosovës (PDK). Kjo na bën të besojmë se kritikat, sulmet e tij ndaj Kurtit kanë si qëllim vijueshmërinë e planit të tij ndaj Kosovës.
Grenell është figura kyçe që dirigjoi trekëndshin Thaçi-Vuçiç-Rama, të cilët u angazhuan dhe mbështetën mundësinë e shkëmbimit të territoreve. Një aventure e rrezikshme që mori fund falë vetos së Kancelares gjermane Angela Merkel e cila deklaroi hapur dhe prerë se Gjermania nuk mbështeste ndryshim apo korrigjim kufijsh.
Nga viti 2018 deri më tani, është e vërtetë që marrëdhënia mes Kosovës dhe SHBA-së ka kaluar në një periudhë të paqartë, por është gjithashtu e qartë se, përmes mjegullës, përfiton gjithmonë “ujku” (Vuçiç), për të cilin SHBA vitet e fundit kanë mbyllur sytë dhe veshët.
Aktet terroriste të Serbisë kundër Kosovës gjatë viteve të fundit, dhe mungesa e reagimit të duhur nga SHBA, sigurisht kanë sjellë një ndjesi të pakënaqësisë dhe skepticizmit në Kosovë. Megjithatë, shqiptarët mbeten populli më pro-amerikan në Ballkan dhe në Europë. Emisarët që veprojnë me interesa personale, si Grenell, nuk mund ta lëkundin lidhjen ekzistenciale që ka Kosova me SHBA-në.
© 2025 Argumentum
