Presidenti i Kinës Xi Jinping zhvilloi të enjten paradite një takim me homologun e tij amerikan Donald Trump në Busan të Koresë së Jugut.
Në këtë takim, ndër të tjera, Xi vuri në dukje që, nën drejtimin e përbashkët të të dy udhëheqësve, marrëdhëniet kino-amerikane kanë ruajtur në përgjithësi qëndrueshmërinë. Bërja e të dy vendeve partnerë dhe miq është si përvojë historike, ashtu dhe nevojë e realitetit. Të dyja vendet kanë kushte të ndryshme kombëtare dhe disa dallime janë të pashmangshme, teksa, si dy ekonomitë më të mëdha në botë, edhe fërkimet janë gjithashtu normale. Xi shtoi që, përballë stuhive dhe sfidave, të dy krerët e shtetit, si timonierë, duhet të marrin drejtimin dhe të kontrollojnë situatën e përgjithshme, që anija e marrëdhënieve Kinë-ShBA të lundrojë në mënyrë të qëndrueshme. “Jam i gatshëm që të përpiqem bashkë me Presidentin Trump, për të hedhur një bazë të fortë për marrëdhëniet kino-amerikane, duke krijuar një mjedis të mirë për zhvillimin e të dy vendeve,” u shpreh kreu i shtetit kinez.
Xi theksoi më tej se ekonomia kineze ka një prirje të mirë zhvillimi, duke pasur një rritje prej 5.2 për qind në tre tremujorët e parë të këtij viti, ndërsa tregtia e jashtme e mallrave u shtua 4 për qind. Këto arritje nuk janë realizuar lehtë, duke kapërcyer shumë vështirësi të brendshme e të jashtme. “Ekonomia kineze është si një oqean i gjerë, me forcë të madhe qëndrese dhe potencial kolosal. Ne kemi besim dhe jemi në gjendje të përballojmë rreziqet e sfidat e ndryshme,” u shpreh presidenti Xi. Ai shtoi që, në plenumin e 4-t të Komitetit të 20-të Qendror të Partisë Komuniste të Kinës, që sapo u mbyll në Pekin, u miratuan propozimet për planin e zhvillimit ekonomik e shoqëror të Kinës në pesë vjetët e ardhshëm. “Gjatë mbi 70 vjetëve, ne kemi ngulur këmbë në zbatimin e një plani të vazhdueshëm brez pas brezi, por pa synuar për të provokuar a zëvendësuar dikë. Ne i kemi përqendruar të gjitha forcat për ta bërë si duhet punën tonë e për t’u vetëpërmirësuar, duke ndarë mundësitë e zhvillimit me vendet e ndryshme të botës. Ky është kodi kyç i suksesit të Kinës. Kina do të vazhdojë të thellojë reformën e gjithanshme, të zgjerojë hapjen dhe ta nxitë ekonominë të realizojë një ngritje të efektshme cilësore e shtim të arsyeshëm sasior, duke promovuar zhvillimin e gjithanshëm dhe begatinë e përbashkët të të gjithë popullit. Besoj se kjo do të krijojë gjithashtu një hapësirë më të gjerë për bashkëpunimin kino-amerikan,” tha Xi.
foto nga Xinhua
Presidenti kinez vuri në dukje se ekipet ekonomike e tregtare të të dy vendeve shkëmbyen thellësisht mendime mbi çështjet e rëndësishme ekonomiko-tregtare, duke arritur konsensus për zgjidhjen e problemeve. Ekipet e të dyja palëve duhet të detajojnë sa më shpejt punët vijuese, duke mbrojtur e zbatuar si duhet konsensusin, për t’u ofruar siguri konkrete të dyja vendeve dhe ekonomisë botërore. Marrëdhëniet ekonomik e tregtare kino-amerikane kanë kaluar zigzage kohët e fundit, por të cilat u kanë sjellë edhe frymëzim të dyja palëve. Ekonomia e tregtia duhet të vazhdojnë të shërbejnë si gur themeli dhe nxitëse të marrëdhënieve kino-amerikane, dhe jo si pengesa e krijuese konflikti. Të dyja palët duhet të nisen nga gjendja e përgjithshme e të shohin interesat afatgjata nga bashkëpunimi e jo të bien në rrethin vicioz të hakmarrjes së ndërsjellë. Ekipet e të dyja palët mund të vazhdojnë bisedimet në bazë të parimit të barazisë, të respektit e të leverdisë reciproke, ta zvogëlojnë listën e problemeve dhe ta zgjerojnë listën e bashkëpunimit.
Xi theksoi po ashtu se dialogu është më mirë se kundërvënia. Kina e ShBA-ja duhet të ruajnë shkëmbimet e lirshme në të gjitha nivelet, që të shtojnë njohjen reciproke. Të dyja vendet kanë perspektivë të gjerë në bashkëpunimin në fushat si goditja e emigracionit të paligjshëm, mashtrimi në telekomunikacion, lufta kundër pastrimit të parave, inteligjenca artificiale, përballimi i epidemive etj. Sektorët përkatës duhet të shtojnë dialogun e shkëmbimet dhe të zhvillojnë bashkëpunimin me leverdi të ndërsjellë. Kina dhe ShBA-ja duhet të kenë ndërveprime të mira edhe në arenën rajonale dhe atë ndërkombëtare. Bota ende përballet me shumë sfida, u shpreh Xi, duke shtuar që Kina dhe Shtetet e Bashkuara mund të tregojnë së bashku përgjegjësinë e tyre si fuqi të mëdha dhe të punojnë së bashku për të bërë gjëra që janë në të mirë të të dy vendeve e të botës. Vitin e ardhshëm, Kina do të jetë vendi organizator i takimit të APEC-ut, ndërsa ShBA-ja do të organizatojë samitin e G20-s. Të dyja palët mund ta përkrahin njëra-tjetrën, duke u përpjekur që të arrihen rezultate pozitive në të dy samitet, për të dhënë kontribut në nxitjen e rritjes së ekonomisë botërore dhe në përmirësimin e qeverisjes ekonomike globale.
foto nga Xinhua
Nga ana e tij, presidenti amerikan Donald Trump u shpreh se ndihet i nderuar që takohet me presidentin Xi. “Kina është një vend i madh, ndërsa presidenti Xi, i shquar dhe i respektuar, është miku im për një kohë të gjatë. Kemi shkuar shumë mirë” tha Trump. Marrëdhëniet amerikano-kineze kanë qenë të mira dhe do të jenë më të mira në të ardhmen, vuri në dukje ai, duke shprehur shpresën që Kina dhe ShBA-ja do të kenë të ardhme më të bukur. Kina është partnerja më e madhe e ShBA-së dhe kur bashkëpunojnë dy vendet, mund të kryejnë gjëra të mëdha. “Bashkëpunimi midis dy vendeve do të arrijë suksese më të mëdha në të ardhmen. Kina do të organizojë samitin jozyrtar të APEC-ut 2026, kurse ShBA-ja do të zhvillojë samitin e G20-s. Unë shpresoj që të dyja palët do të arrijnë sukses,” tha presidenti amerikan.
Krerët e të dy vendeve theksuan shtimin e bashkëpunimit dypalësh në fushat ekonomiko-tregtare, energjetike etj. dhe nxitjen e shkëmbimeve njerëzore. Ata ranë dakord që të ruajnë shkëmbimet e rregullta. Trump-i shprehu shpresën për të vizituar Kinën sa më parë vitin e ardhshëm dhe e ftoi presidentin Xi për vizitë në ShBA./CGTN-Argumentum.al
