Ish-ministri i Financave dhe ish-deputeti i Partisë Socialiste, Arben Malaj, ka artikuluar një kritikë të fortë ndaj kryeministrit Edi Rama, duke theksuar se mënyra aktuale e qeverisjes përbën rrezik serioz jo për PS-në, por për vetë Shqipërinë. Sipas Malajt, mesazhi i tij nuk i drejtohet vetëm Ramës, por para së gjithash deputetëve të të gjitha forcave politike, të cilët mbajnë përgjegjësi për kostot që po u ngarkohen taksapaguesve shqiptarë nga dështimet e një lidershipi egoist dhe të pangopur për pushtet.
Malaj thekson se ka pasur disa raste kur kryeministri nuk ka dëgjuar as këshillat dashamirëse dhe as qëndrimet bllokuese të partnerëve strategjikë dhe institucioneve financiare ndërkombëtare. Ai nënvizon se, bazuar në përvojën e tranzicionit politik shqiptar, ky nivel egoje dhe abuzimi me pushtetin është fillimi i fundit të çdo lideri politik. Në këtë kuadër, ai përmend bllokimin e fondeve nga Bashkimi Europian për shkak të korrupsionit në bujqësi, si dhe reagimet e FMN-së, Bankës Botërore, BE-së dhe SHBA-së kundër amnistisë apo “paqes fiskale”.
Ish-ministri ndalet edhe te projektet strategjike të qeverisë, ku sipas tij SHBA dhe BE janë shprehur kundër projektit “Smart City”, pasi ai cenon rëndë sigurinë kombëtare dhe mund të keqpërdoret në përplasjet gjeostrategjike në një Ballkan të trazuar. Po ashtu, ai thekson se SHBA ka shprehur shqetësime serioze lidhur me projektin e Portit të Durrësit, duke kujtuar se portet janë asete strategjike të NATO-s.
Sipas Malajt, kryeministri ndodhet në një fazë qeverisjeje të dehur nga pushteti absolut dhe nga 83 mandatet parlamentare, një situatë që përbën rrezik real për vendin. Ai shprehet se Rama nuk do të ndalet vetë, ndërsa u bën thirrje deputetëve socialistë të tregojnë integritet dhe përgjegjësi historike për ta ndalur këtë rrezik. Malaj sugjeron se 15 deputetë të PS-së duhet të grupohen për të kushtëzuar votën e tyre me reduktimin e pushtetit absolut, luftën kundër oligarkëve, ndalimin e përqendrimit të pasurisë dhe frenimin e rritjes së pabarazisë.
Duke sjellë shembullin e Margaret Thatcher, Malaj thekson se ajo u rrëzua nga pushteti nga vetë besnikët e saj më të afërt, sepse qeverisja e saj ishte bërë e pashpirt dhe e patolerueshme. Në fund, ai kundërshton idenë se largimi i Ramës do të krijonte një boshllëk politik, duke theksuar se Shqipëria ka njerëz dhe atdhetarë të aftë për t’i shërbyer së ardhmes euro-atlantike të vendit.
Komenti i plotë i Prof. Dr Arben Malajt
Ky mesazh nuk i drejtohet vetëm Ramës, por para së gjithash deputetëve të të gjitha forcave politike.
Taksapaguesit paguajnë kosto të rënda nga dështimet e udhëheqësve egoistë dhe të pangopur për pushtet.
Janë bërë tashmë disa raste kur Rama nuk ka dëgjuar këshillat dashamirëse, por as veprimet bllokuese të partnerëve strategjikë dhe të institucioneve financiare.
Bazuar edhe në përvojën e tranzicionit tonë politik,, ky nivel egoje dhe abuzimi me pushtetin është fillimi i fundit të çdo lideri politik.
BE bllokoj 33 mil euro për korrupsionin në bujqësi.
BE ka bllokuar 112 mil euro për sektorin bujqësor.
FMN, BB, BE dhe SHBA kanë reaguar publikisht kundër amnistisë /paqes fiskale.
SHBA&BE janë shprehur kundër projektit “Smart City”, sepse ai cenon rëndë sigurinë kombëtare të Shqipërisë.
“SMART CITY”mund të keqpërdoret në përplasjet gjeostrategjike në një Ballkan të trazuar.
SHBA mbetet e shqetësuar dhe ia ka shprehur qeverisë shqiptare shqetësimin lidhur me projektin e Portit të Durrësit, jo vetëm në raport me sigurinë kombëtare, por portet jane asset strategjik të NATO-s.
Qytetarëve që më kanë pyetur pse medalja u mor pasi u nënshkrua kontrata e “Smart City”, nuk kam një përgjigje tjetër veçse se dhume vende përdorin diplomacinë e medaljeve për të fituar më shumë akses në ekonomi të varfëruara, përmes kryetarëve shtetesh të “lumturuar”.
Atë medalje e kanë marrë edhe Putini edhe Trump.
Në cilin krah e gjen veten Rama?
Qeverisja e dehur e Ramës ( edhe verat 33.000 – 50.000 euro, të dehin) është në një fazë ku përbën rrezik jo për PS-në, por për Shqipërinë.
Ai vetë nuk ndalet më; është viktimë e etjes për pushtet absolut dhe për një profil global absurd.
Asnjë kryeministër i një vendi përball fatkeqesive natyrore nuk do të guxonte të udhëtonte jashtë vendit dhe të vet-kenaqet me batutat e tij.
Rama nuk do të ndalet në rritjen e pushtetit të tij, i dehur edhe nga 83 mandatet.
Deputetët socialistë kanë përgjegjësinë ta ndalin Ramën.
Deputetë duhet të tregojnë integritet dhe përgjegjësi
për ta ndalur këtë rrezik.
83 votat abuzive mund të reduktohen deri në 69 mandate.
15 deputetë të PS-së duhet të grupohen në një bërthamë që kushtëzon votën me reduktimin e pushtetit absolut, kundër oligarkëve. kundër përqendrimit të pasurisë, dhe kundër
rritjes dhe thellimit të pabarazisë.
Margaret Thatcher u rrëzua nga pushteti nga besnikët e saj më të mëdhenj dhe më të mirëshpërblyer në karrierën politike. u rrëzua nga “besnikët” e saj.
Dhe e dini pse e bënë këtë?
Sepse qeverisja e Thatcher-it ishte bërë deri në atë pikë e pashpirt, sa ata nuk mund ta toleronin më.
PS është në një moment kritik në raport me historinë e saj, por sidomos me historinë dhe të të ardhmen e Shqipërisë.
Pyetja “Po iku Rama, kush do të vijë?” nuk u shtrua as për Enverin: “Po iku Enveri, kush do të vijë?”
Shqipëria ka atdhetarë shumë të mirë që e duan dhe do t’i shërbejnë Shqipërisë euro-atlantike.
© 2026 Argumentum
