Kryeministri Edi Rama, me ftesë të Selisë së Shenjtë, zhvilloi një vizitë zyrtare në Vatikan, i shoqëruar nga bashkëshortja e tij, znj. Linda Rama. Kryeministri u mikprit në Pallatin Apostolik, në oborrin “San Damaso”, nga Prefekti i Shtëpisë Papnore dhe Zotërinj të Shenjtërisë së Tij.
Në vijim, Kryeministri Rama u prit në një audiencë nga Shenjtëria e Tij, Papa Leoni XIV, në Bibliotekën Papnore të Pallatit Apostolik, ku u shkëmbyen mendime mbi marrëdhëniet mes Shqipërisë dhe Selisë së Shenjtë, si dhe mbi çështje me interes të përbashkët.
Kryeministri më pas u takua me Sekretarin e Shtetit të Vatikanit, Kardinal Pietro Parolin, dhe Nënsekretarin për Marrëdhëniet me Shtetet dhe Organizatat Ndërkombëtare, Kryepeshkopin Paul Richard Gallagher, në Sekretariatin e Shtetit.
Sipas një deklarate të lëshuar nga Zyra e Shtypit e Selisë së Shenjtë, bisedat në Sekretariatin e Shtetit ishin të përzemërta dhe “u diskutuan çështje me interes të përbashkët në lidhje me marrëdhëniet midis bashkësisë kishtare dhe shoqërisë civile”.
Vëmendje, shtoi komunikata e Vatikanit, iu kushtua edhe çështjeve rajonale, “përfshirë situatën në vendet e Ballkanit Perëndimor dhe rrugën e Shqipërisë drejt integrimit të plotë në Bashkimin Evropian”.
Një moment i veçantë i vizitës ishte homazhi i Kryeministrit Rama në vendvarrimin e Papa Françeskut, në Bazilikën Santa Maria Maggiore. Në një postim në rrjetet sociale, Kryeministri e cilësoi Papa Françeskun si “mik të paharruar të Shqipërisë dhe të familjes sonë, që nuk harronte kurrë të lutej për popullin tonë dhe të na dërgonte mesazhet e tij të miqësisë”.
Gjatë ditës, Kryeministri Rama vizitoi gjithashtu Bazilikën e Shën Pjetrit. Më herët, Kryeministri Rama, bashkëshortja e tij Linda Rama dhe djali i tyre Zaho Rama zhvilluan një vizitë në Genazzano, në bazilikën ku ndodhet shëmbëlltyra e Zojës së Këshillit të Mirë, e lidhur ngushtë me traditën dhe besimin e popullit shqiptar.
Në këtë bazilikë, Kryeministri Rama u ndal në një moment lutjeje drejtuar Zojës së Këshillit të Mirë, Regina di Albania, duke iu besuar asaj popullin shqiptar, familjet dhe rininë, si dhe duke kërkuar mbrojtje dhe udhëzim shpirtëror për Shqipërinë.
/Argumentum.al
