Të shtunën, sekretari i përgjithshëm i Komitetit Qendror të PKK-së dhe president i Kinës, Xi Jinping, dhe sekretari i përgjithshëm i Partisë së Punëtorëve të Koresë dhe kryetar i Këshillit të Shtetit Kim Jong Un, shkëmbyen mesazhe urimi me rastin e 65-vjetorit të nënshkrimit të Traktatit të Miqësisë, Bashkëpunimit dhe Ndihmës së Ndërsjellë Kinë-Kore e Veriut.
Xi Jinping vuri në dukje se në vitin 1961 brezi i vjetër i udhëheqësve të Kinës dhe Koresë së Veriut nënshkruan Traktatin e Miqësisë, Bashkëpunimit dhe Ndihmës së Ndërsjellë midis Kinës dhe Koresë së Veriut, duke hedhur një themel të rëndësishëm politik e ligjor për konsolidimin e miqësisë midis dy popujve dhe duke luajtur një rol të rëndësishëm për zhvillimin e miqësisë Kinë-Kore e Veriut dhe për mbrojtjen e paqes e të qëndrueshmërisë në rajon dhe në botë. Gjatë 65 vjetëve, të dyja palët kanë ruajtur frymën e traktatit, e kanë mbështetur njëra-tjetrën dhe kanë punuar së bashku për të çuar përpara marrëdhëniet e miqësisë së përhershme me të ardhme të përbashkët Kinë-Kore e Veriut.
Xi ritheksoi në vijim që, pavarësisht se si ndryshon situata ndërkombëtare, qëndrimi i vendosur i Partisë dhe qeverisë kineze në kushtimin e një rëndësie të madhe miqësisë tradicionale midis Kinës e Koresë së Veriut nuk do të ndryshojë; vendosmëria e palëkundur për të mbrojtur interesat e përbashkët dhe një mjedis strategjik të favorshëm midis dy palëve nuk do të ndryshojë.
Nga ana e tij, Kim Jong Un u shpreh që marrëdhëniet e bashkëpunimit miqësor midis Koresë së Veriut e Kinës, si një zgjedhje strategjike dhe pasuri e përbashkët e çmuar për të dy partitë dhe të dy popujt, po ngrihen dhe zhvillohen në një nivel të ri strategjik, duke dhënë një kontribut të rëndësishëm për mbrojtjen e sovranitetit, sigurisë dhe interesave të zhvillimit të të dyja vendeve, si dhe për mbrojtjen e paqes dhe qëndrueshmërisë rajonale e botërore në një situatë të ndërlikuar ndërkombëtare. Nxitja e zhvillimit të marrëdhënieve të bashkëpunimit miqësor midis Koresë së Veriut dhe Kinës në përputhje me prirjen e ndryshimit të kohës dhe me vullnetin e dy popujve është qëndrim i palëkundur i Partisë së Punëtorëve dhe qeverisë koreanoveriore.
“Jam i gatshëm të punoj me Sekretarin e Përgjithshëm për të çuar përpara miqësinë Kore e Veriut-Kinë dhe për ta bërë një shembull të marrëdhënieve më të forta dhe më strategjike midis vendeve socialiste,” tha Kim Jong Un./cgtn
