Të martën paradite presidenti i Kinës Xi Jinping mori pjesë në takimin e 26-të të Këshillit të Krerëve të Shtetit të Organizatës së Bashkëpunimit të Shangait (OBSh), që u zhvillua në kryeqytetin e Kirgizistanit Bishkek.
Takimi u drejtua nga presidenti i Kirgizistanit Sadyr Japarov, që është kryetar i radhës i OBSh-së. Në këtë takim morën pjesë edhe presidenti i Bjellorusisë Aleksander Lukashenko, kryeministri i Indisë Narendra Modi, presidenti i Iranit Masoud Pezeshkian, presidenti i Kazakistanit Kassym-Jomart Tokayev, kryeministri i Pakistanit Shehbaz Sharif, presidenti i Rusisë Vladimir Putin, presidenti i Taxhikistanit Emomali Rahmon, presidenti i Uzbekistanit Shavkat Mirziyoyev, si edhe sekretari i përgjithshëm i OBSh-së Nurlan Yermekbayev.
Xi bëri një fotografi së bashku me liderët e tjerë të vendeve anëtare të OBSh-së dhe më pas mori pjesë në takimin e Këshillit të Krerëve të Shtetit të OBSh-së, ku mbajti edhe fjalimin me titull “Nxitja e një zhvillimi më cilësor të OBSh-së”.
Presidenti kinez vuri në dukje që, gjatë 25 viteve, OBSh-ja ka arritur hap pas hapi të bëhet organizata e re rajonale më e gjerë në botë, me popullsinë më të madhe dhe me një potencial të madh zhvillimi. Ajo ka propozuar dhe ka ndjekur gjithmonë “Frymën e Shangait”, të karakterizuar nga besimi i ndërsjellë, përfitimet e përbashkëta, barazia, konsultimet, respekti për qytetërimet e ndryshme dhe synimi i zhvillimit të përbashkët, duke gjetur mënyrën e duhur për të bashkëjetuar pa krijuar aleanca e përballje dhe pa u drejtuar kundër palëve të treta, duke nxitur vendet e rajonit të bashkohen për të ndërtuar një shtëpi të përbashkët.
Në fjalimin e tij, Xi paraqiti katër propozime.
Foto nga XinhuaSë pari, duhet të këmbëngulet te zhvillimi si përparësi dhe të krijohet bashkërisht perspektiva e lulëzimit të përbashkët. Duhet të promovohet globalizimi ekonomik përfshirës, të konsolidohet bashkëpunimi në sektorët tradicionalë, si tregtia, investimet, ndërlidhjet e energjetika, të zgjerohet bashkëpunimi në sektorët e rinj, si AI-ja, ekonomia digjitale, sektorët e gjelbër dhe burimet e gjelbra minerare, dhe të nxitet zhvillimi i thellë e praktik dhe ngritja e cilësisë së bashkëpunimit rajonal.
Së dyti, duhet të këmbëngulet te siguria si detyrë kyçe dhe të krijohet një mjedis me siguri të përgjithshme. Duhet të përballohen kërcënimet tradicionale dhe jotradicionale në mënyrë të koordinuar, si edhe të goditen “tre forcat”, krimi i organizuar ndërkombëtar, trafiku i drogës dhe mashtrimet në telekomunikacion. Duhet të shtohet bashkëpunimi në sektorin e sigurisë së informacionit, biologjike e hapësinore dhe të parandalohen në mënyrë serioze ndërhyrjet e forcave të jashtme në punët e brendshme e sigurinë politike të vendeve përkatëse, si edhe në qëndrueshmërinë rajonale.
Së treti, duhet të këmbëngulet te vendosja e njeriut në qendër dhe të formohet baza e miqësisë brez pas brezi. Është e nevojshme të ndërtohet rrjeti i bashkëpunimit mes organeve legjislative, partive, shkollave, instituteve të studimit të politikave, ndërmarrjeve dhe mediave, të shtohen lidhjet mes popujve dhe të forcohet gjallëria e energjia për fqinjësinë e mirë.
Së katërti, duhet të këmbëngulet te dialogu e konsultimet dhe të përmirësohet qeverisja e barabartë dhe e rregullt. Duhet të këmbëngulet te barazia mes vendeve të ndryshme, qofshin ato të vogla apo të mëdha, si edhe te konsultimet e përbashkëta mbi çështjet e rajonit, duke i trajtuar mosmarrëveshjet e dallimet nëpërmjet dialogut e konsultimeve dhe duke i përballuar sfidat e përbashkëta me koordinim shumëpalësh.
Liderët e vendeve anëtare që morën pjesë në këtë takim i pohuan plotësisht arritjet e OBSh-së gjatë 25 viteve pas krijimit, duke theksuar që OBSh-ja ka dhënë garanci të rëndësishme për sigurinë e lulëzimin e rajonit dhe është bërë një nga bazat për stabilizimin e zhvillimin e ekonomisë globale.
Të gjitha palët e vlerësuan kontributin e rëndësishëm që Kina, si vend themelues, ka dhënë për zhvillimin e organizatës, dhe ranë dakord të zbatojnë në mënyrë aktive planin strategjik të Samitit të Tianjin-it 2025, të vazhdojnë të promovojnë “Frymën e Shangait”, të përmirësojnë ndërtimin e mekanizmave, të forcojnë besimin politik, të thellojnë bashkëpunimin në fushat e tregtisë, investimeve, teknologjisë, energjisë, financave, zinxhirëve të prodhimit e furnizimit, ndërlidhjes infrastrukturore dhe shkëmbimeve mes popujve, të përballojnë së bashku sfidat e reja të sigurisë dhe të shkruajnë një kapitull të ri për paqen e përhershme dhe zhvillimin e përbashkët.
Përballë situatës së trazuar ndërkombëtare, vendet anëtare të OBSh-së duhet të bashkohen e të bashkëpunojnë, të forcojnë ndikimin e organizatës dhe të nxisin ndërtimin e një sistemi të drejtë e të arsyeshëm të qeverisjes globale, duke luajtur një rol më të madh në paqen, qëndrueshmërinë dhe prosperitetin e rajonit dhe të botës.
Foto nga Xinhua
Liderët e vendeve anëtare nënshkruan dhe publikuan Deklaratën e Bishkekut të Këshillit të Krerëve të Shtetit të OBSh-së. Ata miratuan po ashtu amendamentin dhe shtesat e Protokollit të Kartës së OBSh-së, rregulloren e përballimit të kërcënimeve dhe sfidave të sigurisë e rregulloren e qendrës kundër drogës, si edhe 28 dokumentet e rezultateve mbi shtimin e bashkëpunimit në fushat e sigurisë, ekonomisë e kulturës dhe mbi ndërtimin e organizatës.
Në këtë takim u vendos që Pakistani të marrë kryesimin e radhës të OBSh-së në periudhën 2026-2027./cgtn
