Protestuesit kanë mbajtur të rrethuar Kryeministrinë mbrëmjen e së martës, në ditën e 94-t të protestave kundër qeverisë Rama. Pas marshimit nga sheshi “Skënderbej”, protestuesit u vendosën në disa hyrje të godinës, ndërsa policia ngriti barriera dhe kordone për të penguar kalimin. Ata kërkuan dorëheqjen e Edi Ramës dhe krijimin e një qeverie tranzitore.
Protesta qytetare kundër projektit të planifikuar në Zvërnec ka hyrë në ditën e 94-t radhazi. Qytetarë dhe aktivistë të shoqërisë civile u mblodhën mbrëmjen e sotme në sheshin “Skënderbej” dhe marshuan drejt Kryeministrisë, ku pati tensione mes protestuesve dhe Policisë së Shtetit.
Ndryshe nga protestat e mbrëmjeve të mëparshme, një pjesë e protestuesve u vendos pranë një prej hyrjeve anësore të Kryeministrisë, në zonën pranë Piramidës, duke penguar kalimin.
Policia vendosi një kordon dhe barriera përreth godinës, ndërsa protestuesit tentuan të afroheshin drejt hyrjeve. Forcat e rendit nuk lejuan kalimin dhe situata u shoqërua me momente tensioni.
Protestuesit vijuan me thirrjet për dorëheqjen e kryeministrit Edi Rama, ndryshimin e ligjit zgjedhor, shfuqizimin e ndryshimeve në ligjin për zonat e mbrojtura dhe mbrojtjen e zonave natyrore.
Mes kërkesave të tyre është edhe largimi i asaj që protestuesit e cilësojnë si “kastë e vjetër politike” dhe krijimi i një qeverie tranzitore.
Protesta nisi më 31 maj, pas kundërshtimeve ndaj projektit turistik të planifikuar në zonën e Zvërnecit.
Në ditët e para, protestuesit kërkuan mbrojtjen e zonës së Nartës dhe Zvërnecit, si dhe transparencë lidhur me projektin dhe statusin e tokës ku parashikohet investimi.
Më 3 qershor, gjatë ditës së katërt të protestës, pati përplasje me policinë pranë Kryeministrisë. Protestuesit tentuan të kalonin kordonin policor, ndërsa forcat e rendit përdorën autobotë me ujë për shpërndarjen e turmës.
Në ditët në vijim, marshimi nga sheshi “Skënderbej” drejt Kryeministrisë u kthye në një pjesë të përditshme të protestës.
Krahas kundërshtimit të projektit në Zvërnec, protestuesit nisën të kërkonin ndryshime në legjislacionin për zonat e mbrojtura dhe investimet strategjike.
Më pas, në listën e kërkesave u përfshinë edhe ndryshimi i ligjit zgjedhor dhe dorëheqja e kryeministrit Edi Rama.
Protestuesit kanë kërkuar gjithashtu krijimin e një qeverie tranzitore, ndërsa e kanë cilësuar lëvizjen si një protestë qytetare jashtë partive politike.
Gjatë javëve të protestës janë ngritur edhe çështje të tjera, përfshirë korrupsionin, punësimin dhe largimin e të rinjve nga vendi.
Pavarësisht pushimeve të verës, protesta ka vijuar çdo ditë në Tiranë, duke mbajtur në qendër të saj çështjen e Zvërnecit dhe kërkesat politike.
Në protestat e zhvilluara gjatë kësaj periudhe janë përsëritur thirrjet për largimin e qeverisë dhe ndryshimin e ligjit zgjedhor.
Protestuesit kanë zhvilluar tubime edhe në Zvërnec, ndërsa në Tiranë marshimi ka vijuar nga sheshi “Skënderbej” drejt Kryeministrisë.
Në prag të sesionit të ri parlamentar
Protesta e 94-t vjen pak ditë para nisjes së sesionit të ri parlamentar.
Kuvendi pritet të nisë punimet më 8 shtator, ndërsa mazhoranca po përgatitet për rifillimin e aktivitetit parlamentar pas pushimeve të verës.
Në të njëjtën periudhë priten edhe vendime të kryeministrit Edi Rama për përbërjen e qeverisë. Në media është raportuar për një riformatim të mundshëm të kabinetit dhe ndryshime në disa poste ministrore.
Rama ka zhvilluar takime me drejtues të Partisë Socialiste dhe anëtarë të qeverisë në kuadër të përgatitjeve për sezonin e ri politik.
Për momentin, përmasat e ndryshimeve në qeveri dhe emrat që mund të preken nuk janë bërë zyrtare.
Ndërkohë, protestuesit vijojnë të kërkojnë dorëheqjen e kryeministrit dhe një qeveri tranzitore.
Protesta pritet të vijojë edhe me nisjen e sesionit të ri parlamentar.
© 2026 Argumentum
