Kryeministri Edi Rama ka reaguar nga godina e djegur ku ndodhet zyra e Kolegjit të Evropës në Tiranë, pas protestave të shoqëruara me përplasje me policinë dhe dëmtime të pronës publike e private. Rama dënoi aktet e dhunës, i cilësoi ato si veprime të opozitës dhe deklaroi se personat përgjegjës do të përballen me ligjin, ndërsa përsëriti gatishmërinë e qeverisë për dialog me studentët.
Duke e lidhur dëmtimin e godinës me simbolikën e integrimit evropian, kryeministri e përshkroi atë si një godinë që deri dje shërbente si zyrë e Kolegjit të Evropës, institucionit që, sipas tij, u hap në Shqipëri në bashkëpunim me udhëheqës evropianë.
“Sot, kjo është rrënoja e duarve që nuk janë dhe nuk mund të jenë kurrë duart e studentëve”, deklaroi Rama, duke bërë dallim mes studentëve, të cilët i cilësoi si të ardhmen e vendit, dhe autorëve të akteve të dhunës.
Ai tha se studentët janë të mirëpritur për bisedime dhe se qeveria është e gatshme të ulet me ta për të diskutuar kërkesat dhe për të gjetur zgjidhje. Në të njëjtën kohë, Rama akuzoi opozitën se po përpiqet ta largojë Shqipërinë nga rruga e integrimit evropian përmes dhunës.
“Përgjegjësia para ligjit është e gjithsecilit dhe gjithkush që ka dorë në këtë katrahurë sigurisht që do të paguajë”, u shpreh kryeministri.
Rama e paraqiti incidentin në godinën e Kolegjit të Evropës si simbol të asaj që ai e konsideron përplasje mes së ardhmes evropiane të Shqipërisë dhe përpjekjeve për ta kthyer vendin pas.
Reagimi vjen në një moment të tensionuar politik, pas muajsh protestash dhe kërkesash për dorëheqjen e kryeministrit. Në deklaratën e tij, Rama u përqendrua te dhuna, përgjegjësia ligjore dhe dialogu me studentët, duke mbrojtur vazhdimin e kursit të integrimit evropian.
Megjithatë, në reagimin e publikuar, kryeministri nuk njoftoi ndonjë tërheqje nga detyra dhe as ndonjë ndryshim të qëndrimit të tij përballë kërkesave politike për dorëheqje.
Reagimi i plotë i Kryeministrit Edi Rama nga godina e djegur e Kolegjit të Europës
Deri dje kjo ishte zyra e kolegjit të Europës, shkollës së Europës së bashkuar që e çelëm në Shqipëri së bashku me udhëheqësit europian të pranishëm këtu Tiranë.
Sot, kjo është rrënoja e duarve që nuk janë dhe nuk mund të janë kurrë duart e studentëve. Studentët janë e ardhmja. Studentët janë ata që shohin larg dhe që duan te shkojnë më larg dhe me shpejt. Studentet janë gjithnjë te mirëpritur dhe për ta ne jemi gjithnjë gati të ulemi, të flasim, të diskutojmë dhe të gjejmë zgjidhje për gjërat që kërkojnë zgjidhje.
Këto janë të tjera duar! Këto janë duart që përpiqen ta ulin poshtë Shqipërinë sa herë që Shqipëria përpiqet të shkojë lart. Këto janë duart e një opozite e cila me maska të verbërish përpara, me zjarr dhe me hekur kërkon ta rikthejë Shqipërinë aty ku Shqipëria nuk do te rikthehet kurrë, kërkon ta rikthejë Shqipërine në humnerën nga ku ne te së bashku e nxorëm dhe prej ku po e ngjisim drejt majës historike, drejt ëndrrës së të gjithë shqiptarëve në breza, Bashkimit Europian.
Qëlloi që kjo zyrë e Kolegjit të Europës, e shkollës së gjeneratës së re të europianëve, e shkollës së studentëve europianë, të jetë sot simboli i gjithçkaje që Tirana dhe Shqipëria dhe shqiptarët ku do ndodhen pa anë dhe po shohin në këto orë të vështira. Janë orë të vështira, por janë orë të cilat do t’i kalojmë të gjithë së bashku sepse Shqipëria do të vazhdojë të ngjitet, sepse Shqipëria do të vazhdojë në rrugën e saj për Europën e të gjithë studentëve të saj, e të gjithë vajzave dhe djemve të saj dhe kurrë më nuk do të bjerë ato duar që e ka kanë kapur për fyti dhe e kanë zhytur thellë e më të thellë opozitën shqiptare, por nuk mundet dot ta kapin për fytin Shqipërinë dhe kushdo që mendon se ligji është larg, gabon. Përgjegjësia para ligjit është e gjithsecilit dhe gjithkush që ka dorë ne këtë katrahurë sigurisht qe paguajë. Do të paguaj sepse Shqipëria nuk do të kthehet më kurrë pas. Shqiptarët kurrë më nuk do të jenë pengje të së shkuarës dhe e kaluara që u rikthye me verbërinë e saj këto orë në qendër të Tiranës, si një fantazmë që përpiqet të bëjë atë që ka bërë gjithnjë sa herë shqiptarët kanë dashur të ngrenë kokën, do të mbetet e kaluar. E ardhmja është e studentëve! E ardhmja është e Shqipërisë dhe shqiptarëve!
© 2026 Argumentum
