Zëvendësministrja e Brendshme, Anisa Ruseti, u ka bërë thirrje prindërve dhe kujdestarëve që të mbajnë fëmijët dhe adoleshentët larg përplasjeve të dhunshme gjatë protestave, duke theksuar rreziqet për jetën, shëndetin dhe mirëqenien e tyre psikologjike.
Sipas Rusetit, 272 persona kanë marrë shërbim mjekësor, mes tyre rreth 169 punonjës policie dhe 70 protestues e kalimtarë. Ajo nënvizoi se e drejta për protestë paqësore është e garantuar nga Kushtetuta, ndërsa menaxhimi i protestave duhet të mbështetet te komunikimi, ulja e tensioneve dhe përdorimi proporcional i forcës.
Zv.ministrja kërkoi nga prindërit të monitorojnë se ku ndodhen fëmijët e tyre dhe çfarë përmbajtjesh e thirrjesh marrin në rrjetet sociale. Ajo u bëri gjithashtu thirrje organizatorëve, përfaqësuesve politikë dhe mediave të shmangin nxitjen e përplasjeve dhe përfshirjen e të miturve në konfliktet politike.
Ruseti theksoi se çdo pretendim për përdorim të tepruar të forcës nga policia duhet të shqyrtohet në mënyrë të paanshme dhe se mbrojtja e fëmijëve kërkon përgjegjësi të përbashkët nga të gjithë aktorët.
Deklarata për mediat i zv.ministres së Punëve të Brendshme, Anisa Ruseti:
Në emër të Ministrisë së Punëve të Brendshme dhe të Qeverisë shqiptare, u drejtohemi prindërve, kujdestarëve dhe të gjithë qytetarëve me thirrjen që fëmijët dhe adoleshentët të mbahen larg përplasjeve të dhunshme dhe situatave që mund të rrezikojnë jetën dhe shëndetin e tyre.
Të miturit nuk duhet të përfshihen në përplasje dhe nuk mund të mbajnë përgjegjësi për veprimet e personave që i nxisin drejt dhunës.
Mbrojtja e jetës dhe sigurisë së çdo fëmije duhet të jetë përparësi.
Ngjarjet e ditëve të fundit kanë evidentuar rreziqet me pasoja në shëndetin e tyre.
Të mitur kanë marrë shërbim mjekësor në spitale, për shkak të problemeve të hasura nga pjesëmarrja e tyre në protestë, 272 persona kanë marrë shërbim mjekësor, ndër ta
rreth 169 efektivë janë lënduar gjatë protestave të këtyre ditëve dhe 70 protestues e kalimtarë.
E drejta për protestë paqësore është e garantuar nga Kushtetuta dhe përfshin edhe të drejtën e të rinjve për të shprehur mendimin dhe për t’u dëgjuar.
Njëkohësisht, interesi më i lartë i fëmijës duhet të jetë konsideratë parësore në çdo vendim dhe veprim që e prek atë. Ky parim kërkon nga të gjithë ne të kontribuojnë në mbrojtjen e fëmijëve nga dhuna dhe ekspozimi ndaj rrezikut.
Standardet evropiane kërkojnë që menaxhimi i protestave të mbështetet në komunikim, ulje të tensioneve dhe përdorim të forcës vetëm kur është i domosdoshëm dhe në masën minimale të nevojshme, ky standard duhet të udhëheqë veprimtarinë e Policisë së Shtetit.
Veprimet e dhunshme të individëve nuk justifikojnë trajtimin e të gjithë pjesëmarrësve si persona të dhunshëm dhe as vendosjen e përgjegjësisë kolektive. Për këtë arsye, Policia e Shtetit ka bërë thirrje për ruajtjen e qetësisë dhe distancimin nga personat që ushtrojnë dhunë. Ministria e Punëve të Brendshme ka kërkuar që çdo veprim policor të jetë i ligjshëm, i nevojshëm dhe proporcional, ndërsa çdo pretendim për përdorim të tepruar të forcës të shqyrtohet në mënyrë të paanshme.
Por sot kemi një komunikim që duam t’jua adresojmë prindërve dhe kujdestarëve.
Të dashur prindër dhe kujdestarë, është e rëndësishme të dini ku ndodhen fëmijët tuaj, me kë janë dhe çfarë përmbajtjesh ose thirrjesh marrin në rrjetet sociale.
Flisni me ta për rreziqet dhe këshillojini që, në rast tensioni, të largohen menjëherë drejt një vendi të sigurt. Edhe pa marrë pjesë në incidente, prania pranë përplasjeve mund t’i ekspozojë ndaj lëndimit.
Përgjegjësia jonë përfshin edhe vëmendjen ndaj pasojave që dhuna mund të shkaktojë në zhvillimin e fëmijëve. Përjetimi ose dëshmimi i saj mund të sjellë frikë, pasiguri dhe pasoja psikologjike afatgjata.
Normalizimi i dhunës mund të krijojë bindjen se konfliktet zgjidhen përmes forcës dhe se dëmtimi i të tjerëve është mënyrë e pranueshme për të kërkuar të drejta.
Fëmijët dhe adoleshentët duhet të mbështeten që të argumentojnë, të kundërshtojnë dhe të kërkojnë llogari duke respektuar jetën dhe dinjitetin njerëzor.
Po aq i rëndësishëm është besimi i tyre te Policia e Shtetit, si institucioni ku mund të kërkojnë ndihmë dhe mbrojtje. Paraqitja e policisë si kundërshtare e të rinjve, si dhe çdo sjellje e paligjshme ndaj punonjësve të policisë, e dëmton këtë besim.
Ruajtja dhe forcimi i tij kërkojnë profesionalizëm, trajtim të barabartë, transparencë dhe përgjegjësi për çdo shkelje.
U bëjmë thirrje organizatorëve, përfaqësuesve politikë, mediave dhe çdo të rrituri që ushtron ndikim te fëmijët të kontribuojnë në mbrojtjen e tyre, duke shmangur nxitjen e përplasjeve dhe normalizimin e dhunës.
Të miturit nuk duhet të përfshihen në përplasje politike dhe nuk mund të përdoren për të mbrojtur askënd.
Interesi më i lartë i fëmijës duhet të udhëheqë veprimet e të gjithë aktorëve, pavarësisht kundërshtive politike. Mbrojtja e të drejtave të tyre kërkon angazhim të përbashkët, me synim që asnjë fëmijë të mos lëndohet në përplasjet në rrugë.
Fëmijët janë përgjegjësi e përbashkët dhe duhet të mbrohen.
Ju lutem bashkëpunoni me Policinëe Shtetit dhe shtetin shqiptar!
Faleminderit!
© 2026 Argumentum
