Kryeministri Rama reagoi me një fjalim në llojin e tij, lidhur me zhvillimin e beftë në politikën kosovare, atë të një aktakuze për presidentin Thaçi e kreun e PDK-së Kadri Veseli, publikuar nga Gjykata Speciale në Hagë. Kjo, pak ditë pas takimit të Uashingtonit ku do riniste dialogu mes Prishtinës dhe Beogradit.
“Të gjithë mbetën të befasuar nga aktakuza.Drejtësia është drejtësi dhe nuk është drejtësia në vetvete dhe as kërkimi i saj nga një strukturë e miratuar me vullnetin e vetë Kosovës që ngre pikëpyetje të mëdha, por është lexim i tekstit të shpërndarë në mbarë botën për të lajmëruar një proces gjyqësor ndaj dy figurave historike të paqes në Kosovë. I ngjan një fletërrufeje të revolucionit kinez”, tha Rama.
“Serbinë nuk e bombardoi Hashim Thaçi me Kadri Veselin por bota demokratike. Serbi nuk ishte viktimë ishte agresori. Hashim Thaçi, Kadri Veseli dhe Ramush Haradinaj u rebeluan ndaj agresorit në emër të viktimave. Ky është fakt”, vijoi më tej Rama duke folur në parlament.
Rama sulmoi ashpër Specialen, duke thënë se akti i saj është i paprecedent.
Në cilin anal të drejtësisë ndërkombëtare hyn kjo kategori e një njoftimi si papritur dhe ajo gjuhë që nuk bëhet fare as për të dyshuar apo prezumuar por për dy mostra që u ka ardhur fundi. Në praktikën ndërkombëtare kjo është e pashembullt. Nuk ka asnjë praktikë ndërkombëtare që mund ta integrojë tekstin e djeshëm (aktakuzën) ose është një model i gjyqësisë eksperimentale.
Drejtësia selektive nuk është drejtësi dhe drejtësia e përsëritur nga procese gjyqësore nuk eshte drejtësi. Ky tribunal special për krimet e luftës sa është i padrejtë është i pashmangshëm. Të gjithë ata që e kanë votuar në 2015 këtë Gjykatë Speciale kanë bërë gjënë e duhur. Duhet të tregojnë se nuk kanë asgjë për të fshehur. Një çorbë e vështirë për t’u kapërdirë”, theksoi Rama.
h.e/Argumentum
