Komisionerja evropiane për Zgjerimin, Marta Kos, ka deklaruar se Traktati i Anëtarësimit të Malit të Zi me Bashkimin Evropian mund të nënshkruhet gjatë verës së vitit 2027, nëse negociatat ecin sipas ritmit të parashikuar.
Duke folur para Komisionit për Punët e Jashtme të Parlamentit Evropian në Strasburg, Kos tha se pjesa teknike e negociatave me Malin e Zi mund të përfundojë deri në fund të këtij viti ose në fillim të vitit 2027.
“Ne tashmë po përgatisim traktatin e anëtarësimit, i cili më pas mund të nënshkruhet në verën e vitit të ardhshëm”, deklaroi Kos.
Pas nënshkrimit do të nisë procesi i ratifikimit në shtetet anëtare të BE-së, i cili, sipas saj, mund të zgjasë nga një deri në dy vjet, në varësi të zhvillimeve në secilin prej vendeve anëtare. Në këtë skenar, Mali i Zi mund të bëhet anëtari i 28-të i Bashkimit Evropian në vitin 2028.
Mali i Zi në fazën përfundimtare
Mali i Zi konsiderohet aktualisht kandidati më i avancuar në procesin e zgjerimit të BE-së. Komisioni Evropian ka nisur tashmë punën për përgatitjen e traktatit të anëtarësimit, ndërsa në qershor Këshilli i BE-së krijoi grupin ad hoc të punës për hartimin e tij.
Kos tha se Komisioni Evropian do të paraqesë më 28 tetor një seri hartash të reja rrugore për Malin e Zi, Shqipërinë, Moldavinë dhe Ukrainën, me afate dhe hapa konkretë për përfundimin e procesit të integrimit.
“Siç mund ta imagjinoni, Mali i Zi është në fund të procesit. Shpresojmë t’i përfundojmë negociatat teknike deri në fund të vitit”, tha komisionerja.
Mekanizma të rinj mbrojtës
Anëtarësimi i ardhshëm i Malit të Zi pritet të zhvillohet edhe nën një kuadër të ri masash mbrojtëse të BE-së. Sipas propozimeve të reja, vendet e reja anëtare mund të përballen me masa më të forta në rast të shkeljeve serioze të shtetit të së drejtës, demokracisë ose vlerave të BE-së.
Një prej mekanizmave të rinj do t’u mundësonte vendeve të reja anëtare të angazhohen vullnetarisht, përmes një deklarate të veçantë, të mos përdorin të drejtën e vetos në procesin e zgjerimit për mosmarrëveshje dypalëshe.
Kos theksoi se këto masa do të jenë proporcionale, të përkohshme dhe të bazuara në parimin e barazisë së shteteve anëtare.
Nëse afati i parashikuar realizohet, 2027 do të shënonte kalimin e Malit të Zi nga faza e negociatave në fazën e traktatit të anëtarësimit, ndërsa viti 2028 do të ishte objektivi për anëtarësimin formal në BE.
© 2026 Argumentum
