Partia Socialiste Bullgare (BSP) dështoi në formimin e qeverisë së re, dhe si pasojë sipas të gjitha gjasave në muajin tetor do të shkohe
Mandatin të cilin e mori më 18 korrik, BSP sot ia ktheu presidentit të vendit Rumen Radev.
Presidenti Rumen Radev, në deklaratën e tij në presidencë, tha se vendi po shkon drejt zgjedhjeve të parakohshme duke shtuar se trashëgimia më e keqe e qeverisë së koalicionit katërpalësh të kryeministrit në dorëheqje Kirill Petkov është kaosi i krijuar në sektorin e energjisë.
Ai tha se para shpërbërjes së parlamentit do të lejojë edhe një javë kohë që të mund të vazhdojnë punimet ndërsa theksoi se gjatë kësaj kohe ai dëshiron të zgjidhet kryetar i Komisionit Shtetëror Rregullator të Energjisë dhe Ujit (KEVR), i cili monitoron çmimet e gazit natyror dhe karburanteve të tjera në vend. Liderja e BSP-së Ninova, nga ana e saj, potencoi se kanë treguar përpjekje që vendi mos të shkojë përsëri në zgjedhje të parakohshme në një situatë krize, por
se në 10 ditët e fundit nuk kanë gjetur mbështetje në parlament. Ajo tërhoqi vëmendjen se presidenti Radev ishte politikani që më së shumti kritikonte qeverinë në dorëheqje. “Nuk mund ta pranoj absolutisht akuzën për krijimin e kaosit në sektorin e energjisë”, u shpreh ajo.
Drejt zgjedhjeve të parakohshme
Në këtë situatë, Radev duhet të shpërbëjë parlamentin, të caktojë datën e zgjedhjeve të parakohshme si dhe të formojë një qeveri të përkohshme që do të drejtojë vendin deri në qeverinë e ardhshme. Qeveria e koalicionit katërpalësh të bashkëkryetarit të partisë më të madhe në parlament, Vazhdojmë me Ndryshimin (PP), Kirill Petkov, arriti të qëndrojë vetëm
6 muaj në qeveri. Pasi partia “Ka Një Popull të Tillë” (ITN) e kryesuar nga shoumeni Slavi Trifonov, u largua nga koalicioni katërpalësh i kabinetit të Petkov, qeveria e këtij të fundit nuk arriti të marrë votëbesim në parlament dhe kishte dhënë dorëheqje.
Sipas kushtetutës presidenti duhet t’i dorëzojë mandatin dy partive më të mëdha në parlament para se të shkojë në zgjedhje të parakohshme dhe pastaj një partie tjetër.
Në këtë periudhë, PP dhe më pas partia e ish-kryeministrit Bojko Borisov “Qytetarët për Zhvillimin Evropian të Bullgarisë” (GERB), nuk arritën të formojnë qeveri.
Vitin e kaluar Bullgaria mbajti 3 palë zgjedhje të përgjithshme.