Kryetari i Partisë së Lirisë Ilir Meta i kërkoi sot prokurorisë që të hetojë përgjegjësinë e të gjitha institucioneve që kanë lejuar një sulm të vazhdueshëm hakerimi për 15 muaj.
Në një konferencë për mediet, Meta u shpreh se se kryehakerues i këtij sistemi është Edi Rama sepse kjo u provuar botërisht nga dalja e të dhënave personale të 1 milion qytetarëve përpara zgjedhjeve dhe përdorimi i tyre nga patronazhistët vetëm për qëllime të shantazhit elektoral.
“Ishte Edi Rama që publikisht mbështeti por njëkohësisht edhe shtetërisht përmes kapjes së sistemit të drejtësisë, të gjithë këtë proces kriminal i cili e shfrytëzoi vetë për të përmbysur vullnetin e popullit shqiptarë në zgjedhjet e 25 prillit. Në dhjetor u hakeruan rrogat e administratës dhe bizneseve. Po në dhjetor dolën numrat e celularëve dhe targat e makinave. Më pas u hakerua e-albania dhe më pas u nxorën nga hakeruesit të dhëna të shitje. U godit sistemi TIMS, një sistem perfekt dhe i mbrojtur prej kohësh. U godit edhe ALEAT-i një tjetër çudi, është goditur sistemi i Policisë së Shetit sa i takojnë gjobave, duke bërë që qytetarët të mos kujtojnë t’i paguajnë ato me kamatëvonesë. U është bllokuar sistemi i menaxhimit të çështjeve gjyqësore dhe nuk lëshohen vërtetimet gjyqësore. Është goditur sistemi ADAM dhe MEMEX që përbën trurin e policisë së shtetit që përbën trurin e policisë dhe bazën e luftës kundër krimit. Janë hakeruar dhe serrat e kamerave të Policisë së Shtetit.Njëkohësisht ju ftoj të kujtoni se Edi Rama duke e ditur këtë situatë në 6 maj 2022, kërkoi t’i impononte bankat kryerjen e shërbimeve nëpërmjet e-albania, por që fatmirësisht u refuzua prerë nga Banka e Shqipërisë dhe banka të tjera. Kjo kërkesë e çuditshme e Edi Ramës vinte me vetëdije pas një sërë sulmesh që hakerat kishin nisur më parë në të gjithë sistemin”, tha Meta.
Ai tha se ekspertët e kompanisë Microsoft theksuan se hakerat kanë depërtuar në e-Albania që në maj 2021. Ata theksojnë se ndërhyrja është përforcuar në korrik 2021, për të vijuar më pas në vitin 2022.
“Ne kërkojmë të bëhet transparencë se çfarë ka ndodhur saktësisht. Të bëhet një vlerësim i situatës së sigurisë kombëtare. Prokuroria të bëj një hetim për evidentimin e përgjegjësisë së qeverisë dhe çdo institucioni në lidhje me menaxhimin e të dhënave të qytetarëve. Cenimi i Sigurisë kombëtare ka ndodhur në vazhdimësi dhe Edi Rama vijon të gënjejë në lidhje me pasojat e këtij sulmi ndaj qytetarëve shqiptarë, bizneseve dhe partnerëve të huaj. Dua të kujtoj se si President i Republikës kam përmbushur të gjitha detyrimet e mija për të paralajmëruar qeverinë dhe institucionet përpara se të niste agresioni i Rusisë ndaj Ukrainë, për marrjen e masave për mbrojtjen nga sulmet kibernetike të gjithë sistemit tonë”, tha Meta.
