Në prag të ndërrimit të viteve, presidenti kinez Xi Jinping, nëpërmjet Grupit Mediatik të Kinës (CMG) dhe internetit, ka dërguar një mesazh urimi për Vitin e Ri 2023. Në vijim është i plotë ky mesazh.
Shokë, miq, zonja dhe zotërinj,
Përshëndetje! Në prag të vitit 2023, ju përcjell nga Pekini urimet e mia më të mira për Vitin e Ri.
Në vitin 2022 kemi organizuar me sukses Kongresin e 20-të Kombëtar të PKK-së, duke hartuar planin për ndërtimin e gjithanshëm të një vendi socialist modern, duke nxitur rilindjen e kombit kinez nëpërmjet modelit kinez të modernizimit dhe duke u rënë borive të marshimit në një udhëtim të ri.
Kemi ruajtur pozicionin tonë si ekonomia e dytë më e madhe në botë dhe zhvillimin e shëndetshëm ekonomik, me një PBB që pritet t’i kalojë 120 trilionët juanë. Para krizës ushqimore globale, Kina siguroi korrje të bollshme të drithërave për 19 vjet me radhë, duke garantuar më tej furnizimin ushqimor të popullit kinez. Kemi konsoliduar më tej rezultatet e zhdukjes së varfërisë, kemi nxitur rigjallërimin e gjithanshëm rural, kemi mbështetur ndërmarrjet nëpërmjet uljes së taksave e të tarifave dhe u kemi kushtuar forca zgjidhjes së më shumë problemeve që kanë shqetësuar masat popullore në jetën e përditshme.
Pas rënies së epidemisë së COVID-19, kemi ndjekur gjithmonë parimin e vënies së popullit e të jetës në plan të parë dhe kemi këmbëngulur në parandalimin dhe kontrollin shkencor, duke i përshtatur masat antiepidemike sipas ndryshimit të situatës dhe duke mbrojtur jetën dhe shëndetin e popullit me të gjitha forcat. Zyrtarët dhe punonjësit e qarqeve të ndryshme, sidomos ata të mjekësisë dhe punonjësit në bazë, kanë luftuar me guxim e sakrifica të panumërta në rrethana të vështira. Pas përpjekjeve të jashtëzakonshme, kemi mposhtur vështirësitë dhe sfidat e jashtëzakonshme me kontributin e çdo individi. Tani puna e kontrollit epidemik ka hyrë në një fazë të re. Është një kohë që kërkon edhe më shumë punë, kur të gjithë janë duke bërë përpjekjet e veta. Le të shtojmë edhe më shumë forcat në këtë betejë. Këmbëngulja dhe bashkimi do të sjellin fitore.
Në vitin 2022, shoku Jiang Zemin u largua prej nesh. Ne i kujtojmë dhe i mbajmë ndër mend të gjitha arritjet madhështore dhe sjelljen fisnike të tij, si edhe çmojmë trashëgiminë e vlefshme shpirtërore që na ka lënë. Duhet ta çojmë pandërprerë përpara kauzën e socializmit me karakteristika kineze në epokën e re në vijim të realizimit të dëshirës së tij.
Historia është gjithmonë me dallgë të mëdha dhe përpjekjet e luftërat brez pas brezi kanë formuar Kinën e sotme.
Kina e sotme është një vend ku ëndrrat realizohen njëra pas tjetrës. Sportistët e vendit arritën rezultate për t’u krenuar në Lojërat Olimpike Dimërore dhe Lojërat Paralimpike Dimërore. Misionet e suksesshme “Shenzhou-13”, “Shenzhou-14” dhe “Shenzhou-15” dëshmuan procesin e ndërtimit të stacionit hapësinor të Kinës, “shtëpia” jonë në kozmos. Ushtria Çlirimtare Popullore kremtoi 95-vjetorin e saj dhe oficerët e ushtarët tanë po punojnë për shtimin e forcës mbrojtëse të vendit. Aeroplanmbajtësja e tretë e vendit, “Fujian”, u vu në përdorim; aeroplani i parë i madh i udhëtarëve i prodhuar nga Kina, “C919”, iu dorëzua klientit; hidrocentrali “Baihetan” hyri në funksionim të plotë… Të gjitha këto kanë kërkuar djersën dhe punën e pjesëmarrësve të panumërt. Forca e çdo individi është si flakët që përbëjnë zjarrin ndriçues dhe kjo është forca e Kinës.
Kina e sotme është një tokë plot gjallëri. Këtu, zonat pilot të tregtisë së lirë dhe Porti i Tregtisë së Lirë i Hainan-it janë në lulëzim, krahinat bregdetare po shquhen për krijimin e risive, krahinat qendrore e perëndimore po zhvillohen shpejt, krahinat verilindore po përqafojnë rigjallërimin, ndërsa banorët në krahinat kufitare po gëzojnë një jetë më të begatë. Ekonomia kineze ka elasticitet të fortë, mundësi të mëdha e gjallëri të plotë dhe prirja e përgjithshme e saj drejt zhvillimit afatgjatë mbetet e pandryshuar. Nëse ruajmë besimin, duke kërkuar përparim në realizimin e qëndrueshmërisë, mund të arrijmë pa dyshim objektivat tanë. Sivjet, vajta në Hong-Kong dhe pashë me kënaqësi që atje ishte kthyer zhvillimi. Po të zbatohet e palëkundur politika “Një vend, dy sisteme”, patjetër kjo do të sjellë lulëzimin dhe stabilitetin afatgjatë të Hong-Kongut dhe Makaos.
Kina e sotme është një vend ku trashëgohet fryma kombëtare. Tragjeditë e shkaktuara sivjet nga fatkeqësitë natyrore, si tërmetet, përmbytjet, thatësira e zjarret malore, si edhe aksidentet, janë të dhimbshme dhe pikëlluese. Por veprimet e guximshme dhe fryma e ndihmës pa ngurrim që u shfaqën, ishin gjithashtu mjaft prekëse dhe historitë e heronjve do të jenë të gdhendura gjithmonë në zemrat tona. Sa herë i japim lamtumirën një viti të vjetër, kujtojmë gjithmonë këtë frymë të kombit kinez që trashëgohet prej mijëra vjetësh, gjë që na shton besimin.
Kina e sotme është e lidhur më ngushtë me botën. Në këtë vit mirëprita shumë miq të rinj e të vjetër në Pekin, si edhe shkova jashtë vendit për të paraqitur propozimet e Kinës. Ndryshimet e papara në 100 vjet janë shpejtuar dhe bota nuk është e qëndrueshme dhe e sigurt. Ne i kemi kushtuar vëmendje të madhe si gjithmonë paqes e zhvillimit, kemi çmuar si gjithmonë miqtë e partnerët dhe kemi qëndruar me vendosmëri në anën e drejtë të historisë e të përparimit të qytetërimit njerëzor, duke dhënë kontribut për çështjen e paqes e të zhvillimit të njerëzimit me urtësinë dhe projektin kinez.
Pas Kongresit të 20-të Kombëtar të Partisë Komuniste të Kinës, shkuam së bashku me kolegët në Yan’an, për të kujtuar përsëri kohën e shkëlqyer të kapërcimit prej qendrës së Partisë Komuniste të vështirësive të rralla në botë gjatë periudhës së Yan’an-it, për të mësuar nga forca shpirtërore e anëtarëve të brezit të vjetër të Partisë Komuniste. E kam thënë shpesh se vështirësitë e mëdha nxitin përmirësimin dhe rritjen. Partia Komuniste e Kinës ka përballuar erërat dhe stuhitë, ka kapërcyer vështirësi e vuajtje të panumërta, ka përjetuar hidhërime të shumta, duke u bërë një parti e madhe. Ne do të vazhdojmë të ecim përpara e të luftojmë me vullnet, për ta bërë Kinën e nesërme më të mirë.
Në Kinën e nesërme, përpjekjet do të krijojnë mrekulli më të mëdha. Poeti i madh kinez Su Shi ka thënë: ”Që të arrijmë objektivat më të lartë, duhet të kapërcejmë vështirësitë më të mëdha”. Një rrugë e gjatë nis nga hapi i parë; suksesi në një punë të vështirë arrihet shkallë-shkallë. Nëse kemi vullnetin e lëvizjes së malit si njeriu i thjeshtë, durimin e shpimit të gurit nëpërmjet rënies së pandërprerë të pikës së ujit, nëse punojmë me përpjekje konkrete, nëse përshkojmë më këmbë rrugën prej mijëra kilometrash, do t’i shndërrojmë objektivat madhorë në një realitet të bukur.
Në Kinën e nesërme, forca do të burojë nga bashkimi. Kina është një vend shumë i madh, ku njerëz të ndryshëm kanë kërkesa të ndryshme dhe kanë opinione të ndryshme për gjëra të ndryshme. Kjo është një dukuri normale. Duhet të arrijmë mendime unanime nëpërmjet konsultimeve. Nëse ne, mbi 1.4 miliardë kinezë, e përqendrojmë forcën e mendimit në të njëjtën pikë, nëse bëjmë përpjekje me forcë në të njëjtin drejtim, nëse e kalojmë lumin me të njëjtën barkë dhe e ndihmojmë njëri-tjetrin, nëse e grumbullojnë vullnetin tonë si Muri i Madh, nuk ka asgjë që nuk mund të arrijmë dhe nuk ka asnjë pengesë të pakalueshme. Banorët në të dy brigjet e ngushticës së Tajvanit i përkasin së njëjtës familje. Shpresoj që bashkatdhetarët në të dy brigjet të afrohen me njëri-tjetrin dhe të ecin përpara të kapur dorë për dorë, duke dhënë kontribut për lumturinë afatgjatë të kombit kinez.
Në Kinën e nesërme, shpresa është te të rinjtë. Kur të rinjtë zhvillohen, edhe vendi lulëzon, zhvillimi i Kinës varet nga kontributi i të rinjve të panumërt. Të rinjtë kanë shpirtin e forcës së mëngjesit, të rinjtë ruajnë shpresën. Rinia kineze duhet të kultivojë thellësisht ndjenjat e dashurisë për familjen dhe atdheun, duhet të formojë një karakter përparimtar, duhet të shfaqë jetën e re me frymën e përpjekjeve. Mos e shpërdoroni këtë kohë, mos e çoni dëm moshën tuaj.
Në këtë moment janë të shumtë ata që po vazhdojnë të punojnë me zell. Faleminderit për punën tuaj të palodhur! Tingujt e kambanave të Vitit të Ri do të dëgjohen, le të mbajmë optimizmin për të ardhmen e bukur dhe të mirëpresim së bashku rrezet e para të diellit të vitit 2023.
I uroj atdheut begati e zhvillim dhe popullit harmoni! I uroj botës paqe dhe mirësi, lumturi dhe qëndrueshmëri!
Ju uroj të gjithëve Gëzuar Vitin e Ri dhe plotësim të dëshirave tuaja!/CRI
