Këshilli i Lartë Gjyqësor reagoi sot në lidhje me gjuhën e përdorur ndaj gjyqtarëve të Gjykatës së Apelit të Juridiksionit të Përgjithshëm, pas vendimeve të marra së fundmi.
Në njoftimin e KLGJ-së, theksohet se, “gjuha e urrejtjes kundër gjyqtarëve është shqetësuese dhe e papranueshme, ndërsa thirrjet publike për vetëgjyqësi ndaj një akti të pushtetit gjyqësor, janë haptazi kundër rendit kushtetues mbi bazën e të cilit funksionon shteti i së drejtës”.
Në njoftim thuhet se, “Këshilli i Lartë Gjyqësor konstaton se ditët e fundit janë bërë deklarata nga persona publikë që shprehin pakënaqësi ndaj një vendimi të dhënë nga Gjykata e Apelit të Juridiksionit të Përgjithshëm”.
“Si organ i ngarkuar nga Kushtetuta për të garantuar pavarësinë, përgjegjshmërinë dhe mbarëvajtjen e pushtetit gjyqësor, Këshilli i Lartë Gjyqësor konstaton me keqardhje se ky nuk është një rast i izoluar i mosrespektimit të dinjitetit të gjyqtarit, një kusht i domosdoshëm për garantimin e shtetit të së drejtës”, njofton KLGJ.
Po ashtu, KLGJ vë theksin tek thirrjet për vetëgjyqësi dhe i konsideron thirrje kundër rendit kushtetues.
“Aludimet për “kapje” të gjyqtarëve, referojnë elementë të korrupsionit që, në mungesë të fakteve, minojnë rëndë besimin te drejtësia dhe autoritetin e pushtetit gjyqësor. Liria e shprehjes e garantuar nga Kushtetuta e Republikës së Shqipërisë, nuk mbron në asnjë rast gjuhën e urrejtjes apo thirrjet për dhunë. Për nga natyra e vet, veprimtaria gjyqësore shkakton pakënaqësi ndaj njërës apo tjetrës palë, por në një shtet të së drejtës, mjeti ligjor për të kundërshtuar një vendim gjyqësor është ankimi në një gjykatë më të lartë, sipas legjislacionit në fuqi, jo përbaltja e gjykatës, apo e gjyqtarit”, thuhet në njoftim.
“Po ashtu, kushdo që vjen në dijeni të një veprimtarie apo sjellje të gjyqtarit që mund të përbëjë shkelje disiplinore sipas ligjit, ka mundësinë që rastin t’ia referojë Inspektorit të Lartë të Drejtësisë, për të vlerësuar dhe vendosur nëse është vendi për fillimin e procedimit disiplinor të gjyqtarit”, thuhet në njoftimin e KLGJ-së.
Reagimi i KGLJ-së vjen pas vendimit të marrë më 3 mars nga Gjykata e Apelit të Juridiksionit të Përgjithshëm, në lidhje me vulën e Partisë Demokratike dhe reagimeve të ardhura nga aktorët politikë mbi këtë vendim.
