Britania e Madhe dhe bota po përcjellin të hënën në amshim Mbretëreshën Elizabeth e II-të në një funeral shtetëror që do të mbledhë presidentë dhe mbretër, princa dhe kryeministra dhe deri në një milion njerëz në rrugët e Londrës, për t’i thënë lamtumirën e fundit një monarkeje, 70 vjet të mbretërimit të së cilës përcaktuan një epokë.
Një ditë e mbushur me ngjarje rreth funeralit në Londër dhe Windsor filloi herët kur dyert e sallës 900-vjeçare të Westminsterit u mbyllën pasi qindra mijëra veta ishin mbledhur para arkivolit të saj që nga 14 shtatori. Shumë prej tyre kishin kaluar netë të ftohta jashtë për të bërë nderimet e tyre rreth arkivolit të mbështjellë me flamuri të mbretëreshës në një vërshim emocionues të pikëllimit dhe respektit kombëtar.
Mbyllja e sallës shënoi fundin e më shumë se katër ditëve të qëndrimit të arkivolit në “Westminister Hall” dhe fillimin e funeralit të parë shtetëror të Mbretërisë së Bashkuar që nga ai i vitit 1965 për zotin Winston Churchill, i pari nga 15 kryeministrat që shërbyen gjatë mbretërimit të Mbretëreshës Elizabeth. Dy ditë para vdekjes së saj më 8 shtator në vendpushimin e saj veror në Balmoral, mbretëresha emëroi kryeministren e saj të fundit, Liz Truss.
E hëna është shpallur një ditë pushimi për nder të Mbretëreshës Elizabeth, e cila vdiq më 8 shtator në moshën 96 vjeçare. Funerali i saj do të transmetohet drejtpërdrejt në më shumë se 200 vende dhe territore në mbarë botën dhe do të shfaqet para turmave në parqe dhe hapësira publike në të gjithë Mbretërinë e Bashkuar.
Oficerët e policisë nga i gjithë vendi do të jenë në detyrë si pjesë e operacionit më të madh policor njëditor në historinë e Londrës.
Në mbrëmjen para funeralit, Mbreti Charles i III-të publikoi një mesazh falënderimi për qytetarët në Mbretërinë e Bashkuar dhe në mbarë botën, duke thënë se ai dhe gruaja e tij Camilla, janë “prekur tej mase” nga numri i madh i atyre që dolën për t’i bërë nderimet e tyre mbretëreshës.
Presidenti i Shteteve të Bashkuara, Joe Biden, ishte në mesin e udhëheqësve që shprehën respektin e tyre para arkivolit të mbretëreshës të dielën, ndërsa mijëra policë, qindra trupa britanike dhe një ushtri zyrtarësh bënë përgatitjet e fundit për funeralin – një shfaqje spektakolare e zisë kombëtare që do të jetë gjithashtu vendi i mbledhjes më të madhe të udhëheqësve botërorë prej vitesh.
Sfidat e sigurisë
Kryetari i Londrës, Sadiq Khan, ka thënë se varrimi shtetëror i Mbretëreshës Elizabeta II paraqet një sfidë “të pashembullt” sigurie, pasi qindra mijëra persona do të jenë në Londër.
“Kanë kaluar dekada qëkur ne kemi pasur kaq shumë liderë botërorë në një vend. Kjo është situatë e pashembullt… në raport me gjërat e tjera që ne po trajtojmë njëkohësisht”.
Ai ka thënë për agjencinë e lajmeve, Associated Press se mund të ketë persona që duan t’iu bëjnë keq liderëve botërorë, prandaj, “ne po punojmë jashtëzakonisht fort – policia, shërbimet e sigurisë dhe shumë të tjerë – për t’u siguruar që varrimi shtetëror të shkojë si duhet”.
Mbi 10.000 policë do të ofrojnë siguri në Londër të hënën. Qindra vullnetarë dhe anëtarë të ushtrisë po ashtu do të jenë në detyrë.
Për shkaqe sigurie, autoritetet në Londër kanë ndaluar fluturimin e përkohshëm të dronëve, ndërkaq aeroporti Hithrou do të ndalojë fluturimet, me qëllim që të mos krijohet zhurmë gjatë funeralit të monarkes.
Sfidë tjetër e sigurisë do të jenë turmat e njerëzve. Arkivoli i Mbretëreshës do të udhëtojë nëpër Londër në një distancë prej 32 kilometrash dhe e gjithë rrugët që do të përshkojë kortezhi mortor, do të ketë barriera. Kjo pasi, anash pritet të mblidhen afër qindra mijëra persona./voa,rel
