Kryeministri Rama sulmon SPAK. Reagon Arben Kraja. Hesht Ambasadorja e SHBA-së

Editorial

Asambleja e Përgjithshme e PS-së, zhvilluar sot (me 07.05) e humbi thelbin dhe objektivin e saj sapo kryeministri Edi Rama mori fjalën para socialistëve. Ndërsa të gjithë prisnin që z. Rama të parashtronte problematikat, objektivat dhe planet për Partinë Socialiste, për çudi kryefjala e kësaj Asambleje u bë Reforma në Drejtësi.

Kryeministri Rama ka drejtuar gishtin ndaj SPAK (Prokurorisë së Posaçme kundër korrupsionit dhe Krimit të Organizuar), duke e cilësuar punën e tyre si tallje të madhe me shqiptarët.

Kryeministri Edi Rama ka risjellë në vëmendje se si SPAK nisi hetimin ndaj Ardian Dvoranit të denoncuar nga Presidenti Ilir Meta duke pretenduar për këtë akt si të padrejtë ndaj Z. Dvorani.

“SPAK në flakë, sikur të ishte koordinuar si ora zvicerane me atë zotërinë që për disa ditë do të largohet përfundimisht nga zyra e presidentit (Presidenti Ilir Meta mbylli çështjet nën hetim si flluskë sapuni”, tha Rama.

Sipas tij, nëse kjo orë zvicerane do të ishte e pamposhtur, sot do të ishin në burg shumë gjyqtarë dhe prokurorë që kaluan vettingun për pasuri marramendëse. Por, tha ai, atyre nuk u ka ndodhur asgjë.

“Kampioni i antikorrupsionit i shpallur nga Departamenti i Shtetit (DASH) është hetuar nga SPAK. Per cfare? Për denoncimin e kujt? Nga ai që jo unë, por e gjithë Shqipëria mezi pret ta shohë përballë SPAK-ut, Ilir Metën”, tha ai.

Rama më pas iu referua ish-kryeministrit Sali Berisha dhe theksoi se çështja e non-grata-s së madhe nuk është çështje e Amerikës, është e Shqipërisë, nuk është problem i DASH-it, është problem i popullit shqiptar.

Më tej, kryeministri vuri në dukje se deri tani e keqja është cilësuar dhe SPAK nuk është kualifikuar, po e ul këtë vend si më parë. Është një tallje e madhe që SPAK deri tani përdor vetëm një lloj grepi dhe vetëm për një lloj peshku; nuk e ka problem të kapë peshk të vogël duke përdorur dinamit.

“Durimi ynë është i mbaruar, i imi sigurisht, por edhe i juaji, SPAK dhe ata që janë të interesuar të bëjnë drejtësi në këtë vend, duhet të kujtojnë se nuk na ka rënë goja. Zonja dhe zotërinj të SPAK-ut, zgjohuni dhe mbrojeni Shqipërinë sepse Shqipëria është e turpëruar përballë një “Non-Grata që kundërshton një botë”, tha Rama.

Rama tha se SPAK është duke e humbur luftën me të keqen në vend, ndërsa paralajmëroi se durimit të qeverisë lidhur me këtë situatë po i vjen fundi.

 “Zonja dhe zotërinj të SPAK zgjohuni dhe dilini në mbrojtje Shqipërisë se Shqipëria është e turpëruar para një ‘Non Grata që i bën karshillik një bote. Këtë turp ta mbaj SPAK, në deklaratën e DASH e ka të qartë të bëjnë detyrën e tyre në atë përfundim dhe kjo nuk është për Amerikën, revolta ime dhe e jona nuk është se po na ofendohet Amerika apo se po fyhet Amerika, jo fare, është se po delegjitimohet SPAK dhe sistemi i drejtësisë që kanë ngatërruar detyrat e drejtësisë penale me përgjegjësi administrative, që kanë ngatërruar nevojën për drejtësi me shkeljen e lirive dhe të drejtave të njerëzve”, deklaroi Rama.

Rama u kujdes të theksonte se kritikat ndaj SPAK, nuk janë sulme politike apo personale siç shumë kush mund të pretendojë, por sipas tij, ai po flet në emër të një force politike që ka iniciuar dhe që ka udhëhequr Reformën në Drejtësi. Në këtë betejë, mes së mirës dhe së keqes, për Ramën, ka triumfuar kjo e fundit dhe “fajtor” për këtë bën edhe SPAK, duke thënë se durimit të tij i ka ardhur fundit.

“Deri tani e keqja kualifikohet dhe SPAK s’kualifikohet, po vë përfund këtë vend si më përpara. Kjo është tallje shumë e madhe, që SPAK deri tani përdor vetëm një lloj grepi dhe për vetëm një lloj peshku madje pa e pasur problem që të gjuaj dhe cironka me dinamik, por nuk ka as vullnet që ta përdor dinamitit për peshkaqenët që i bëjnë leksione SHBA, Europës, dhe zgjohen dhe ngrysen duke nxjerrë llum nga goja. Durimi ynë po soset, i imi po”, vijoi ai. 

Mënjëherë ka reaguar Zëdhenësi i Presidentit të Republikës, Tedi Blushi duke drejtuar pyetjen:

Të gjithë shqiptarët mezi po presin të dinë ÇFARË E MBAN PENG “Dvoranin” e Qeverisë tek Dvorani i “Drejtësisë”?
Të gjithë shqiptarët e dinë se:
 1. Dvorani pengoi me çdo mjet, qëllimisht dhe për llogari vetëm të Ramës, ngritjen e Gjykatës Kushtetuese, duke falsifikuar, manipuluar e shkelur Kushtetutën dhe ligjet e drejtësisë, vetëm e vetëm për të siguruar pandëshkueshmërinë e Ramës.
 2.Dvorani u provua zyrtarisht se fshehu pasurinë.
 3. Por Vettingu i partisë në mënyrë skandaloze dhe të paligjshme mbylli sytë për këtë fshehje të pasurisë dhe ky është fakt që nuk mbulohet dot kurrë.
 4. Shkeljet e Kushtetutës dhe ligjit për Dvoranin e partisë-shtet i vërtetoi botërisht edhe Komisioni i Venecias.
 5. Nëse do të ekzistonte vërtet Reforma në Drejtësi, Dvorani do të duhej të ishte i pari përpara drejtësisë për të marrë dënimin e merituar.

Në fakt rikthimi i « Dvoranit » në këtë “fushëbetejë” politike, është pak e çuditshme dhe jokoherente,  ndaj z. Blushi ka dhe një tjetër pikëpyetje në reagimin e tij: Të gjithë shqiptarët duan të dinë çfarë e detyron Ramën, Kampionin e Korrupsionit që e ktheu Shqipërinë një narkoshtet dhe të dytin në botë për korrupsionin, që të kthehet në Avokatin e Dvoranit?

Por ndryshe nga akuzat e Kryeministrit Rama se SPAK hetoi yllin e Drejtësisë dekoruar nga vetë SHBA-të, Kreu i SPAK Arben Kraja në një reagim për mediat shprehet se kjo padi e përmendur nga kryeministri është pushuar me kohë. 

“Çështja e padisë së presidentit ndaj Ardian Dvoranit është pushuar kohë më parë dhe është lënë në fuqi dhe nga Gjykata e Apelit”, thotë Kraja.

Gjithashtu ai theksoi se SPAK punon me kallzime dhe jo me deklarata politike.

“Kam thënë që nuk kam asnjë koment, sepse ne punojmë me kallëzime dhe jo deklarata politike”, thekson z.Kraja.

Kryeministri Edi Rama ka reaguar menjëherë pas deklaratës së kreut të SPAK  lidhur me akuzat e lëshuara në drejtim të këtij institucioni gjatë fjalës së mbajtur në Asamble.

Përmes një postimi në Facebook Rama përsërit rastin e Adrian Dvoranit duke thënë se SPAK i shkoi pas avazit të armikut numër 1 të reformës në drejtës, Ilir Metës.

“Meqë ka marrë përsipër të sqarohet SPAKU do të duhej të sqaronte pse reagoi rrufeshëm për një kallëzim absurd për një vepër penale imagjinare të njeriut të shpallur nga DASH kampion i antikorrupsionit, ndërkohë që për kampionët e korrupsionit në drejtësi s’ka lëvizur ende gishtin! Unë nuk i heq asnjë presje asaj që deklarova sot dhe nuk mjafton që SPAKU të thotë se e paska pushuar çështjen, pasi faktikisht e mori peng gjykatësin në fjalë pa asnjë arsye në botë, duke i shkuar praktikisht pas avazit Armikut NR.1 të Reformës në Drejtësi, Ilir Metës”, shkruan Rama në Facebook.

Reagime pas ketyre deklarateve kane ardhur dhe nga opozita.

Jorida Tabaku: E trishtë! Kemi votuar SPAK jo për tu ankuar pse heton

Deputetja e Partisë Demokratike, Jorida Tabaku ka reaguar pas deklaratave të kryeministrit Edi Rama për SPAK. Duke e quajtur Ramën ‘peshkaqeni kryesor i inceneratorëve’, ajo është shprehur se ai po jepte sot leksione për drejtësinë e munguar.

“Peshkqeni kryesor i inceneratorëve po jepte sot leksione për drejtësinë e munguar. Ironia është që për aferën e inceneratorëve në burg janë veç 2 nga grupi strukturuar kriminal, pra cironkat si Bllako dhe Koka!

E udhës do qe që të inkurajonte SPAK për të vazhduar këto hetime që kanë zbuluar pas këmbënguljes së PD një aferë 430 mln euro. Nuk e bën këtë por mbrohet duke u ankuar se po goditen të tijtë. E trishtë! Kemi votuar SPAK jo për tu ankuar pse heton.

Inkurajoj SPAK të dërgojë përpara aferën e inceneratorëve. Të çojë përpara gjykatës GSK për 3 inceneratorët që janë 1 çështje. Korrupsioni dhe abuzimi janë gangrena e shtetit e shoqërisë tonë. Ndaj SPAK nuk duhet të stepet nga kërcënimet apo ankesat e Ramës. Shqiptarët po presin të kuptojnë kush janë peshkaqenët e vërtetë ps inceneratorëve”, shkruan Tabaku.

Ylli Manjani: Qëndrimt e Ramës ndaj SPAK , mision për të shmangur vëmëndjen nga çështjet kryesore.

Ish-ministri i Drejtësisë Ylli Manjani në Syri.net tha se shantazhi i Ramës është një lajthitje idiote që tregon një sekëlldi politike që e ka kapluar kryeministrin kohët e fundit.

Rama nuk ka asnjë argument përballë akuzave ndaj opozitës dhe liderit të PD Sali Berisha.

“Rama s’ka argumenta për SPAK. Pozicion i palogjikshëm, as politik. Ka një mision në këto qëndrime, për të shmangur vëmëndjen nga çështjet kryesore.

Rama të sqarojë çështjen e rritjes së çmimeve për qytetarët shqiptarë. Nëse Rama ka prova t’i thotë dhe t’i çojë në SPAK, jo të thotë ai është kundërshtari im dhe hajde ta fusim në burg.”-tha Manjani.

Monika Kryemadhi: Të reagojnë ambasadorët e  huaj, të mbrohet reforma që u votua nga 140 deputete

Kryetarja e LSI-së, Monika Kryemadhi u ka bërë thirrje ambasadorëve të huaj në Shqipëri të dënojnë sulmet që kryeministri Edi Rama bëri ndaj SPAK në Asamblenë e sotme të PS-së.

“Shpresoj sot që ambasadoret e vendeve që kanë qenë kryesorët që kanë subvencionuar reformën në drejtësi, të bëjnë deklaratë për të dënuar deklaratën kërcënuese e arrogante të kryeministrit shqiptar dhe pse janë ambasadorë të vendeve që punojnë me qeverinë, duhet të mbrojnë dinjitetin e asaj reforme që u votua me 140 vota”- theksoi Kryemadhi.

Kryemadhi i referohet akuzave të kryeministrit në Asamblenë e sotme të PS-së, i cili tha se prokurorët e SPAK-ut “nuk kanë as vullnet për ta përdorur dinamitin për peshkaqenët”. Madje duke përdorur terma të futbollit tha për SPAK-un: “Po futeni në kohën shtesë, ju skualifikoheni”.

“Reagimi” i Ambasadës së SHBA-së: Shpallja e fituesve të llotarisë amerikane që duan të largohen nga Shqipëria

Ndërsa të gjithë presin reagimin  e Ambasdorës Yuri Kim, e cila i ka patur të shpeshta vizitat e saj në  SPAK dhe përkrah z. Arben Kraja, sot çuditërisht ajo hesht.

I vetmi reagim i Ambasadës së SHBA-së është shpallja e fituesve të llotarisë amerikane për të gjithë ata shqiptarë që po e braktisin këtë vend.

Duke qenë se SHBA-të janë sponsorizuesit e Reformës në Drejtësi, një sulm i tillë ndaj kreut të një prej institucioneve më të rëndësishme të dala nga kjo Reformë është i patolerueshëm. Sikundër është e patolerueshme dhe e pakuptimtë kjo heshtje nga vetë “kumbaret” e drejtësisë.

Por nëse ambasadorja Yuri Kim, po pret që Z.Rama të vetëkorrigjohet, në fakt ndodh krejt e kundërta.

Si kundërpërgjigje ndaj opozitës Kryeministri Edi Rama në një postim në twitter, shkruan.

“Të qeshësh e të qash me lot! Paskam kërcënuar SPAK-un sipas nongratave që betoheshin se edhe Flota e Shtatë Amerikane po t’i drejtonte tytat nga Lalzi nuk do ta votonin Reformën në Drejtësi!”

Sipas Ramës, sa për atë dhe PS,“SPAK rron e punon pa gajle 100 vjet dhe bujrum, derën tonë e ka hapur”.

Por ai shton se nuk kanë për të mbyllur gojën që SPAK të mos godasë njëanshmërisht, po gjithanshmërisht.

“Roli i mumjes, përballë rreshtit të gjykatësve e të prokurorëve, që Vetingu i nxorri katran me bojë apo mbi dosjet e skandaleve legjendare të krimit shtetëror, nuk mund të tolerohet më!”

Ndonëse serish kryeministri Rama u mundua të legjitimoje sulmet e tij ndaj SPAK, fakt është se një kryeministër nuk mund ti diktojë punën institucionit të drejtësisë e aq më tepër SPAK që konsiderohet si një nga shtyllat për zbatimin e Reformës në Drejtësi.

Deklaratat e kryeministrit Rama ditën e sotme janë një kambanë e fortë alarmi për dështimin e Reformës në Drejtësi ndonëse është në vitin e 6-të që nga votimi i saj. Nëse kjo ndodh atëherë Shqipëria rrezikon të shkojë drejt një anarkie dhe si duket edhe me “bekimin” e SHBA-së.

/Argumentum.al