Makineria vrastare e Millosheviqit kreu njërin nga krimet më monstruoze në Reçak me 15 janar 1999, duke u dëshmuar si regjimi më çnjerëzor kundër një popullate të pafajshme. Kështu deklaroi presidentja e Kosovës, Vjosa Osmani në akademinë përkujtimore mbajtur në Shtime, në 24-vjetorin e masakrës së Reçakut. Ajo tha se për këto krime do ta ngrenë zërin në botë, kundër gjenocidit serb, shkruan RTK.
“Mizoria e regjimit të Millosheviqit ndaj civilëve shqiptarë mori trajtën më çnjerëzore, por shënoi një moment në të cilin vetëdija ndërkombëtare u zgjua përfundimisht. Kjo masakër bëri që qendrat vendimmarrëse demokratike të mobilizoheshin që ta mbronin një popull që po vuante nën kthetrat e një regjimi gjenocidal”, tha presidentja Osmani.
Sipas saj, viktimat e Reçakut i kanë treguar botës për tragjedinë që e kanë përjetuar shqiptarët më 1999 e po ashtu përmendni edhe përpjekjen e Beogradit dhe presidentit aktual serb, për të minimizuar këtë masakër.
“Të masakruarit mbase do të vriteshin për së dyti nga propaganda e makinerisë e gënjeshtrës informative, që atë kohë e udhëhiqte presidenti aktual i Serbisë, Aleksandar Vuçiq, sikur ish-shefi verifikues i OSBE-së, William Walker, të mos kishte lëshuar një kushtrim gjithandej. Ambasadori Walker u shndërrua në zërin e viktimave dhe zërin e gjithë Kosovës në kohët më të rënda të historisë sonë”, ka thënë Osmani, sipas të cilës, qëllimi i Serbisë ishte i pastër, “të bënte gjenocid mbi shqiptarët”.
“Prandaj, si popull që sakrifikuam gjithçka për lirinë tonë, sot duhet të luftojmë për kujtesë e kundër harresës, gjithnjë duke shikuar drejt së ardhmes”, ka thënë Osmani, e cila kërkoi të ruajmë përkushtimin për lirinë, të cilin e dëshmuan siç tha ajo, vajzat e djemtë e UCK-së.
“Ta kultivojmë këtë ndjenjë lirie, të bëjmë gjithçka që paqja të mbretërojë në vend e në gjithë rajonin tonë, por gjithnjë duke u bazuar në të vërtetën e duke luftuar mashtrimin. Duke qenë të gjithë dëshmitarë e viktima të një regjimi gjenocidal, populli i Kosovës e kupton më thellë se kushdo tjetër vlerën e kujtesës. Prandaj, do ta ngremë zërin kundër gjenocidit gjithandej nëpër botë ashtu siç po bëjmë edhe sot. Reçaku është dhimbja jonë e përhershme, por edhe nevoja për ta ruajtur paqen dhe dinjitetin njerëzor. Nga këtu filloi të marrë formë liria jonë”, deklaroi Osmani.
Ndërsa kryeministri Albin Kurti, ka thënë se masakra e Reçakut ka nxitur më së shumti ndryshime të qëndrimeve të shteteve të huaja për atë që po bënte Serbia në Kosovë.
“Teksa kujtojmë dhe nderojmë të gjitha viktimat e të vdekurve dhe të gjallëve të asaj kohe të errët, me lejoni që para jush, nga pozita e kryeministrit, t’u them që shteti ynë demokratik nuk i amniston kriminelët dhe nuk i harron krimet e luftës”, deklaroi Kurti.
Kryeministri tha se presidenti i Serbisë ka deklaruar se kjo masakër është falsifikim e fabrikim. “Ata që mohojnë gjenocidin mendojnë për përsëritjen e tyre. Ajo që ka ndodhur nuk mund të amnistohet harrohet e as të fshihet nga kujtesa historike”, deklaroi Kurti.
Ai tha se gjithmonë i është mirënjohës ambasadorit Walker që në një kohë kur kishte pak zëra që flisnin qartë dhe fuqishëm për Kosovën, e tha të vërtetën “ta përshkruante atë që pa me emër të vërtetë – që ajo ishte masakër dhe krim kundër njerëzimit”
“Në diskursin ndërkombëtar, ai e tha të vërtetën për krimet e luftës që Serbia po i shkaktonte në Kosovë duke folur jo thjeshtë me gjuhë diplomatike, por edhe me një gjë të kulluar”, ka thënë më tej Kurti.
I pranishëm në këtë ceremoni ka qenë edhe ish-ambasadori amerikan, William Walker, i cili gjatë vitit 1999 ka shërbyer si shef i Misionit Verifikues të Organizatës për Siguri dhe Bashkëpunim në Evropë (OSBE) në Kosovë dhe ka dokumentuar krimet e kryera në këtë fshat.
Vetë Walker ka thënë në ceremoni se në Reçak është kthyer edhe në rreth 15 përvjetorë tjerë për të parë sërish banorët e fshatit.
“Më pëlqen kur shoh fëmijë, shumë, shumë fëmijë. Këtë vit, kur kemi ecur afër varrezave, nuk kam mundur të dalloj se kush janë familjarët e viktimave dhe kush kanë qenë njerëzit që kanë dashur të vijnë për nderim. Kjo, sepse çdo vit shtohet numri i njerëzve që duan të tregojnë respekt për atë që përfaqëson Reçaku”.
Në paraditen e së dielës, krerë shtetërorë dhe qindra qytetarë kanë kryer homazhe te memoriali që nderon viktimat e kësaj masakre në Reçak.
Ndërsa Qemal Aliu, kryetari i Shtimes, tha se plagët e rënda të Reçakut e ndryshuan rrjedhën e historisë në Kosovë. Ai po ashtu tha se në atë moment në Kosovë e në Reçak u gjet njeriu i duhet që i tregoi botës të vërtetën, ai që sot është qytetarë nderi i Shtimes dhe miku i Kosovës e gjithë shqiptarëve, ambasadori William Woker.
Homazhe e nderime në Reçak, në përvjetorin masakrës që tmerroi botën
Mijëra qytetarë nga të gjitha vendet e Kosovës janë mbledhur në Reçak për nderuar 45 viktimat e masakruara nga regjimi i Millosheviqit 24 vjet më parë. Homazhe te Kompleksi Memorial kanë bërë është liderët e shtetit, presidentja Vjosa Osmani, kryeparlamentari Glauk Konjufca dhe kryeministri Albin Kurti.
Po ashtu nderim të viktimave, homazhe kanë bërë edhe përfaqësues nga partitë politike, shoqëria civile dhe ish luftëtarë të Ushtrisë Çlirimtare të Kosovës.
Më 15 janar të vitit 1999, në Reçak forcat serbe vranë 45 civilë shqiptarë. Numri më i madh i viktimave u gjet në Kodrën e Bebushit, ndërsa të vrarë kishte edhe në pjesë të tjera të fshatit.
Masakra në Reçak u organizua dhe u krye nga forcat policore, ushtarake dhe paraushtarake serbe, ndërsa Serbia edhe sot e kësaj dite refuzon ta pranojë këtë krim makabër.
Pas kryerjes së masakrës, William Walker, ambasadori i OSBE-së në Kosovë, vizitoi vendin e ngjarjes dhe u tmerrua nga ajo që pa në Kodrën e Bebushit, kufoma të masakruara. Ai deklaroi se “nga ajo që pashë nuk ngurroj të përshkruaj ndodhinë si masakër dhe krim kundër njerëzimit. Kjo është ngjarja më trishtuese në jetën time”.
E pas kësaj masakre erdhi Konferenca e paqes në Rambouillet të Francës, e më pas edhe fushata ajrore e NATO-s kundër Serbisë. Kjo e fundit u dorëzua në pjesën e parë të qershorit 1999, ndërsa Kosova shpalli pavarësinë me 17 Shkurt 2008.
