Është zhvilluar sot në Shkup (14.11) mbledhja e dytë e përbashkët mes dy qeverive, të Shqipërisë dhe Maqedonisë së Veriut me pjesëmarrjen e kabineteve qeveritare respektive, të kryesuara nga Kryeministri Edi Rama dhe Kryeministri Dimitar Kovaçevski.
Në mbledhjen e përbashkët të dy qeverive, Shqipëri-Maqedoni e Veriut, Rama u ndal te mbështetja e marrë së fundi nga BE për përballimin e krizës së energjisë.
“Është një lajm i mirë, por nga ana tjetër nëse mbajmë parasysh se ato fonde janë një rialokim i fondeve IPA të vendeve tona, atëherë duhet të jemi shumë më ambiciozë dhe shumë më kërkues ndaj Bashkimit Europian. Nuk mund të mjaftohemi dhe aq më pak gëzohemi me këtë hap, i cili është një hap i madh po të krahasohemi me momentet tragjike të pandemisë kur u lamë krejtësisht vetëm, të izoluar në mes të Europës nga mundësia për të marrë vaksinat në fazën e parë. Nga ana tjetër është një hap gjysmak, po të shikojmë se çfarë kemi nevojë dhe jo vetëm se çfarë mund të marrim, por se çfarë mund të japim për gjithë këtë komunitet dhe këtë bashkësi vendesh dhe shtetesh të Europës”, tha ai.
Në përfundim të fjalës së tij, Rama shprehu falënderimin për zëvendëskryeministrin e qeverisë së Maqedonisë së Veriut, Artan Grubin i cili e kryeson këtë proces të përbashkët nga ana maqedonase.
“Besoj është shqiptari më i mirë mes maqedonasve dhe maqedonasi më i mirë mes shqiptarëve. Për ne është kënaqësi dhe privilegj që të kemi në nivelin e punës së përditshme një partner kaq të besueshëm ashtu sikundër dhe të gjithë kolegët. Këtë e kisha detyrë ta përcillja në emër të gjithë ekipit tim sepse në nivelin përgatitor dhe punës teknike, janë ata që kanë mundësi të vlerësojnë punën e Artanit dhe gjithë skuadrës suaj”, tha ai.
Kryeministri tha se është interes i madh strategjik kombëtar reciprokisht i të dyja shteteve që të kemi marrëdhënie sa më të forta, sa më vëllazërore, sa më të palëkundura nga asnjë lloj stuhie apo asnjë lloj stine e vështirë.
“Jemi dy enë komunikuese që nuk mund të bëjmë dot pa njëra-tjetrën, ashtu sikundër kemi dhe detyrimin e madh që të punojmë bashkërisht për stabilitetin absolut të dy shteteve tona e njëkohësisht për harmoninë absolute mes të dy popujve tanë, mes shqiptarëve dhe maqedonasve. Paçim forcë, durim dhe sa më shumë rezultate të prekshme për njerëzit tanë, në këtë përpjekje të sinqertë konstruktive dhe si asnjë herë më parë të përbashkët”, tha ai.
Në konferencën për shtyp, kryeministri Edi Rama tha se takimi mes 2 qeverive ka qenë mjaft intesive, teksa foli edhe për integrimin e 2 vendeve në BE. Rama tha se do ishte e pafalshmë nëse për shkak të politikave të brendshme të Maqedonisë se Veriut, të ndalej rruga drejt Unionit.
“Mbledhja ishte një proces ndërveprimi intesiv, sa i takon projektit të Portit të Thatë ta marrë përsipër qeveria shqiptare, takohemi në një moment sfidues për të gjithë Europës, krahun perëndimor të Rusisë, inflacioni dhe rritja e çmimeve po përdoren nga Putin për të destabilizuar Europën, sa më shumë të punojmë së bashku, ta shohim të ardhmen si destinacion të përbashkët mund t’i përballojmë më mirë këtë gjë, kemi hedhur themele shumë të forta për të ndërtuar një të ardhme të përbashkët në respektit të lirive dhe të drejta të njerëzve tanë, por edhe një e ardhme e mirëqenë e gjeneratës tjetër. kanë qenë Marrëdhëniet tona bilaterale mil kurrë më mirë
Fati e desh që të bashkohemi në dhimbje për një periudhë të gjatë për ne, por edhe për ju që të na njihej merita dhe e drejta për të filluar bisedimet për anëtarësim, për ju ka qenë më e vështirë, por dhe për ne nuk ka qenë e lehtë. Tani ndryshimet në Kushtetutë të kërkuara për Maqedoninë e Veriut, drejtësia dhe patriotizmi i shtirur mund t’ju kthejë në arsye për t’u përçarë mes vetit, ndërkohë që ky vend ka nevojë për të vrapuar si gjithë vendet e tjera, Kushtetuta juaj ka një sërë minoritete të përcaktuara që do të thotë që është një model i njohur dhe që duhet plotësuar, nuk e di sa ndihmon, por ne kemi një model tjetër, ama ne kemi njohur në parlament një numër jo të vogël minoritetesh, përfshirë edhe atë Bullgar, që e ka një prezencë të saj dhe nuk më duket se jemi të kërcënuar nga ndonjë minoritet, janë ura lidhëse, dhe për ne është absolutisht në interesin tonë, jo në interesin e tyre që të ndihen sa më mirë në vendin tonë dhe të mos ndejnë asgjë nga qytetarët me kombësi shqiptare, populli këtu është më i mençur se politikanët dhe nuk besoj se do ia fal kujt ligësinë e rimarrjes peng të Maqedonisë së Veriut, ndërkohë që kapërcimi është epokal. S’dua ta mendoj që Maqedonia e Veriut mund të kthehet në të shkuarën dhe të izolohet kur është ringritur dhe ka fituar një dinjitet të rëndësishëm kombëtar”, tha Rama.
Kryeministri i Republikës së Maqedonisë së Veriut Dimitar Kovaçevski, në fjalimin e tij në mbledhjen e përbashkët mes qeverisë së RMV-së dhe asaj të Shqipërisë, tha se marrëdhëniet mes dy vendeve janë në nivelin më të lartë të mundshëm.
“I dashur Edi dikush nuk besonte, por ja ne bashkë po ecim në rrugën drejt integrimit evropian. Ju Edi por edhe Republika e Shqipërisë dëshmuat miqësinë e vërtet edhe gjatë anëtarësimit të vendit tonë në NATO. Kemi qëllim të përbashkët, anëtarësimin në BE”, deklaroi Dimitar Kovaçevski, kryeministër i RMV-së, duke shtuar se Maqedonia e Veriut dhe Shqipëria dëshmojnë më së miri për një fqinjësi të mirë.
Në fjalën e tij në mbledhjen e përbashkët në Shkup mes qeverisë së Shqipërisë dhe Maqedonisë së Veriut, Kovaçevski theksoi se “më 19 korrik të dy në emër të qytetarëve të vendit tonë kishim nderin të nisim negociatat për integrimin në Bashkimin Evropian. Ju kolegë të respektuar nga Shqipëria treguat miqësi të vërtetë, përkrahje të padyshimtë në rrugën tonë evropiane dhe gjatë anëtarësimit në NATO”.
“Maqedonia e Veriut dhe Shqipëria janë shembulli i vërtetë për mënyrën si ndërtohen marrëdhëniet e fqinjësisë së mirë. Kemi vendosur shtylla të fuqishme edhe për autostrada që lidhin fizikisht vendet dhe popujt tona. Dy qeveritë jemi në rrugën e fuqizimit dhe besimin e plotë në vlerat evropiane. Sot Shqipëria dhe Maqedonia e Veriut janë bashkërisht në rrugën evropiane. Republika e Maqedonisë së Veriut u vendos në mënyrë të qartë në linjën e politikës së jashtme të Bashkimit Evropian në raport me luftën në Ukrainë këtë e bëri edhe Shqipëria Ne qëndrojmë bashkë në anën e paqes në botë dhe ruajtjen e stabilitetit të rajonit me interes të përbashkët që të pengojmë përpjekjet e palëve të treta për qëllimet e tyre qe të fusin Ballkanin në skenarë që rrezikojnë përfitimet demokratike për të cilat punuam”, nënvizoi Kovaçevski.
Sipas tij, integrimi euroatlantik është i rëndësisë së veçantë për ekonominë dhe standardin jetësor.
“BE më në fund e kuptoi se edhe interesi i saj strategjik është që Ballkani të jetë pjesë e Evropës”, tha Kovaçeksi.
Kryeministri Kovaçekvski u shpreh se “me anëtarësimin në BE do sigurojmë jetë cilësore. Sot Republika e Maqedonisë së Veriut dallohet si model i suksesshëm për të ndërtuar ura me fqinjët, Evropën dhe botën. Si i filluam bashkërisht negociatat kemi mundësi të shkojmë deri në fund bashkë, Maqedonia e Veriut dhe Shqipëria. Me anëtarësimin në BE do sigurojmë jetë cilësore”.
“Njohja nga Evropa ishte shumë e rëndësishme, negociatat ishin të mundimshme dhe të vështira, por arritëm t’i ruajmë pozitat tona dhe të arrijmë atë për të cilën luftuam. Duhet ta ruajmë gjuhën maqedonase dhe ta ngremë në të njëjtin nivel me gjuhët e tjera të BE-së”, tha ai.
Kryeministri Kovaçevski tha se “si dy shtete fqinjë mund të ndihmojmë njëri-tjetrin në zhvillimin ekonomik. Takimi i dytë në Shkup ndërqeveritar, pas të parit në Pogradec e avancojnë bashkëpunimin mes nesh veçanërisht në kohën e krizës globale, ekonomike dhe energjetike”.
“Sot do të firmosen memorandume në shumë fusha, ajo që dua ta nënvizoj është një dëshmi për bashkëpunim tonë të mirë, për kthimin e ikonave të nxjerra në mënyrë të paligjshme nga vendi ynë”, tha Kovaçeski.
/Argumentum.al
