Dr. Marsela Musabelliu
Që prej fillimit të vitit 2023, z. Qin Gang mban postin e Ministrit të Jashtëm të Kinës. Ai vjen nga një karrierë e gjatë diplomatike ndër të cilat edhe me qëndrime në Angli dhe ShBA. Ai është një diplomat veteran, në karrierën e tij ka qendruar në skena të të gjitha llojeve, dhe i njeh mirë marrëdhëniet me mediat. Por për herë të parë si Ministri i ri i Jashtëm kinez u ul në një konferencë për shtyp me mediat e huaja dhe vendore, duke hedhur dritë mbi politikat e jashtme të Kinës më 7 mars 2023, në kuadër të eventeve të lidhura me “Dy Sesionet” ose legjislatura e lartë e shtetit. Nëse direktivat e politikës së jashtme kineze janë ravijëzuar që me Kongresin e 20-të, ritheksuar me sesionet e pranverës në Pekin këto ditë, ajo çfarë pritej në këtë dalje të ministrit ishin përgjigjet më të detajuara për zgjedhjet dhe zgjidhjet e Kinës, sikurse përgjigjet për pyetjet e vështira të politikës së jashtme të vendit.
Në këtë dalje mediatike z. Qin Gang solli stilin e tij të punës që duket sa i matur por aq i drejtëpërdrejtë, me vlerësime pragmatike dhe realiste. Në më shumë se dy orë dhe 14 pyetje në konferencë Ministri i Jashtëm përcolli për mediat, rrjedhimisht edhe për publikun kombëtar dhe ndërkombëtar pozicionet e Kinës mbi çështjet ndërkombëtare dhe parashtroi qartësisht vizionin e vendit të tij në raport me botën dhe me kohët që jetojmë. U shpalos qartë cila është faza e ardhshme e marrëdhënieve mes Kinës dhe vendeve të tjera dhe cilat janë prioritetet diplomatike të Kinës jo vetëm për këtë vit por edhe për shumë vite më tej. Dhe ndërsa pasiguritë gjeopolitike janë në rritje në mbarë globin, Ministri Qin Gang paraqiti për botën si do të veprojë Kina për pikat e nxehta dhe çështjet me rëndësi globale, dhe si duket e ardhmja e parë nga Pekini.
Shumë analistë në Kinë u shprehen se agjenda e tij është një pasqyrim i qartë i natyrës së diplomacisë kineze, domethënë ajo linja e zgjerimit të partneritetit global, e ndërtimit të një ekonomie të hapur, e mbrojtjes së multilateralizmit, etj. Por në fjalët e tij shohim edhe se Kina është shumë e vetëdijshme për rreziqet që i kanosen Kinës dhe komunitetit ndërkombëtar në rrafshin gjeopolitik e praktik. Gjithashtu në rrafshin ekomomik Kina, ashtu si shumë vende të tjera nga e gjithë bota, vuajtën nga ndërprerjet e zinxhirëve të furnizimit global, nga proteksionizmi deri tek unilateralizmi dhe Kina ka luftuar gjatë viteve të fundit kundër këtyre tendencave.
Qindra gazetarë ishin të fokusuar në qasjet e reja të Kinës për të punuar dhe bashkëpunuar me vendet e tjera në këtë kompleksitet situatash që po shfaqen në botë. Ministri ishte statik në fjalët e tij kur u shpreh se Kina po përpiqet të ruajë sovranitetin, sigurinë dhe gjithashtu të promovojë zhvillimin që është qëllimi i diplomacisë kineze.
Në fakt jo vetëm gazetarët, por shumë analistë e politikanë të huaj po prisnin fjalët e ministrit që vijnë direkt pas raportit të punës së qeverisë në kuadër të “Dy sesioneve”. Ai raport thekson angazhimin e Kinës për të zhvilluar lidhje miqësore me vendet e tjera dhe se Kina ndjek politikën e jashtme të pavarur të paqes. Ajo ndjek miqësinë dhe bashkëpunimin me të gjitha vendet në bazë të pesë parimeve të bashkëjetesës paqësore. Kina mbetet e vendosur në hapjen për një përfitim reciprok, duke punuar për të mbrojtur paqen botërore, duke kontribuar në zhvillimin global dhe duke mbështetur rendin ndërkombëtar. Kina gjithashtu është e gatshme të punojë me komunitetin ndërkombëtar për të vënë në veprim iniciativat e saj globale si ajo e zhvillimit dhe e sigurisë duke promovuar vlerat e përbashkëta të njerëzimit.
Në këtë pikë të historisë ka çështje strategjike të cilat Kina duhet ti trajtojë me prioritet, duke parë nga brenda dhe nga jashtë saj. Pothuajse çdo çështje strategjike u prek dhe u analiza nga Ministri Qin Gang, nga rruga e Kinës drejt modernizimit në pozicionin e Kinës për qeverisjen globale, në marrëdhëniet e Kinës me SHBA-në, në çështjen e konfliktit në Ukrainës, me çështjen e Tajvanit, marrëdhëniet Kinë-BE, e shumë të tjera. Duke përfunduar me fjalët e tij në imazhin ndërkombëtar të Kinës, Ministri i Jashtëm ishte i hapur, i drejtpërdrejtë, dhe me nota humori në disa raste, iu përgjigj çdo pyetjeje që ka të bëjë me interesat themelorë të vendit dhe të botës.
Po të shohim me një qasje tematikore konferenca mund të ndahet në dy pjesë. Në pjesën e parë, në rreth një orë kohë ai sqaroi pozicionin e Kinës në skenën globale duke vënë në dukje disa nga “kurthet narrative” të gjeopolitikës që janë përpjekur me nuanca shumë antagoniste që të portretizojnë Kinën si nuk është në të vërtetë. Për shembull, çështja e krizës së Rusisë dhe Ukrainës. Ministri shprehu shumë qartë se Kina nuk ishte nga palët që krijoi problemin fillestar, nuk ishte e përfshirë në konflikt, dhe gjithashtu nuk është përfshirë ushtarakisht me asnjë nga palët, megjithatë Kina është akuzuar për çështje të paarsyeshme dhe madje është kërcënuar me “dënime dhe sanksione”. Ai sigurisht theksoi se kjo është absolutisht e papranueshme, pasi vendi i tij ka nxjerrë tashmë propozimin për zgjidhjen paqësore të krizës në Ukrainë dhe tani është në dorë të palëve të përfshira që ti japin drejtim.
Në çështjen e marrëdhënieve të Kinës me SHBA-në, ministri sqaroi pozicionin e Kinës dhe ajo që quhet termi i “konkurrencës” që SHBA ka përdorur ndaj Kinës. Në fakt, midis Kinës dhe Shteteve të Bashkuara, theksoi ai, duhet të bëhet fjalë për interesa të përbashkëta, përgjegjësitë e përbashkëta, madje edhe për miqësi.
Ndërsa pjesën e dytë, ai pothuajse kaloi 60 minuta kohë duke folur për nismat e Kinës. Këto përfshijnë ato rajonale dhe ndërkombëtare, si Iniciativa e Sigurisë Globale (GSI), Nisma e Zhvillimit Global (GDI) dhe nisma e mëparshme “Një brez, një rrugë” e cila këtë vit bën 10 vjet. Ai foli gjithashtu shumë qartë edhe për pozicionin e Kinës në ndërtimin e marrëdhënieve konstruktive me Evropën, me vendet arabe, me fqinjët kufitarë të Kinës dhe me ekonomitë e ASEAN-it. Ministri gjithashu bëri publike njoftimet e forumeve të rëndësishme që do të organizojë Kina këtë vit dhe ftoi miqtë ndërkombëtarë të angazhohen më shumë me Kinën pasi ajo është mëse e gatshme dhe e vullnetshme për të punuar me ta.
Së fundmi, Ministri i Jashtëm kinez shprehu shumë qartë nga njëra anë, punën dhe qëllimet e Kinës për të hedhur poshtë disa nga perceptimet e gabuara dhe kurthet narrative, nga ana tjetër, ai deklaroi qëndrimet dhe propozimet konstruktive të Kinës për të ecur përpara si një komunitet global me një të ardhme të përbashkët. Në këtë dalje para medias Ministri Qin Gang, theksoi dhe analizoi qëndrimet, vijat e kuqe, pritshmëritë por edhe se sa e gatshme është Kina për çdo skenar të stisur nga jashtë kufijve të saj për të ndalur rrugën e vendit drejt progresit dhe modernitetit të saj.
/Argumentum.al
