Shefi i Sektorit të Drejtimit në Departamentin e Sigurisë Publike në Policinë e Shtetit, Albert Nushi tha se vendimi për angazhimin e strukturave speciale në protestën e djeshme u mor pas një telefonate në sallën operative të Drejtorisë Vendore të Policisë Tiranë, ku raportohej se po qëllohej me armë zjarri gjatë sulmeve me lëndë piroteknike.
Në një deklaratë për mediet, Nushi njoftoi se 37 punonjës policie janë plagosur gjatë protestës së djeshme në Tiranë, ndërsa 54 persona janë shoqëruar, nga të cilët 27 janë arrestuar dhe 27 të tjerë janë proceduar penalisht.
Nushi tha se prej gjashtë ditësh Policia e Shtetit është përballur me sulme të vazhdueshme nga grupe personash të maskuar, të cilët, sipas tij, kanë përdorur gurë, pllaka guri, sfera metalike, vida, lëndë piroteknike dhe bomba Molotov.
Sipas Policisë, gjatë protestave janë sulmuar dhe dëmtuar institucione shtetërore, institucione të drejtësisë, institucione bankare, si dhe prona publike e private. Gjithashtu, grupet e dhunshme kanë dëmtuar sinjalistikën rrugore dhe i kanë vënë zjarrin hyrjes së godinës së Gjykatës së Lartë.
Nushi bëri të ditur se, gjatë veprimeve hetimore në Tiranë, janë sekuestruar një karikator me fishekë luftarakë, dy bomba molotov, doza kanabisi, vida, sfera metalike dhe prova të tjera materiale që, sipas Policisë, janë përdorur gjatë sulmeve.
Sipas Nushit, strukturat e specializuara të Policisë kanë përdorur në mënyrë të kufizuar pajisje speciale për menaxhimin e turmave, në përputhje me procedurat standarde dhe shkallën e rrezikut.
Policia u ka bërë thirrje pjesëmarrësve në protesta të distancohen nga dhuna dhe personat e maskuar, duke theksuar se e drejta kushtetuese për tubim duhet të ushtrohet në mënyrë paqësore. Gjithashtu, u bëri apel prindërve të mos lejojnë pjesëmarrjen e fëmijëve në protesta, për shkak të rrezikut për jetën e tyre.
Nushi rikujtoi se legjislacioni për tubimet parashikon ndalimin e pjesëmarrjes me maska ose sende e veshje të tjera që synojnë fshehjen e identitetit. Ai shtoi se personat e përfshirë në akte dhune po identifikohen përmes këqyrjes së pamjeve filmike dhe veprimeve të tjera hetimore.
Ndërkohë, sipas Policisë, veprime procedurale janë kryer edhe në Shkodër dhe Vlorë, ku 19 persona janë proceduar penalisht për veprime të kundërligjshme gjatë tubimeve të djeshme.
Në deklaratën për mediat, Nushi hodhi poshtë lajmet se oficerë nga policitë partnere kanë mbërritur për të menaxhuar tubimin, duke i cilësuar ato si të pavërteta.
“Policia e Shtetit është e vendosur të mbrojë rendin kushtetues, sigurinë e qytetarëve dhe pronën publike e private”, përfundoi ai.
© 2026 Argumentum
