Të menaxhosh rrugëtimin e një artisti në industrinë moderne të muzikës është një sfidë që shkon përtej talentit dhe krijimtarisë. Në panelin “Behind the Artist: Managing a creative journey”, të mbajtur së fundmi në Tiranë në MuseX, disa nga figurat më me ndikim të menaxhimit, booking-ut dhe produksionit nga Evropa dhe rajoni, ndanë prapaskenat e një industrie që lëviz me shpejtësi marramendëse. Mes kaosit të publikimeve, barrierave të tregut dhe strategjive afatgjata, ky diskutim hodhi dritë mbi atë që publiku rrallëherë e sheh.
Një nga pikat më interesante të diskutimit u prek nga Milica Fajgelj, menaxhere e njohur nga Beogradi me përvojë të gjatë në Eurovision dhe me artistë si Konstrakta. Sipas saj, suksesi në Ballkan shpesh kthehet në një pengesë për tregun global. “Sfidat që kam pasur janë se artistët që janë vërtet të mëdhenj në vendet e tyre, kanë arritur një nivel të ardhurash që krijon një perceptim të caktuar,” u shpreh ajo.
Fajgelj shpjegoi se shpesh artistët nuk pranojnë të ulin çmimin e tyre për të depërtuar në festivale ndërkombëtare, duke humbur mundësinë për t’u bërë globalë, pavarësisht viralitetit në platforma si TikTok.
Për Will Dekeunik nga agjencia holandeze People’s Agency, sekreti i rritjes qëndron te vizioni i qartë. Ai zbuloi se përdorin një metodë specifike ku artisti vendoset në rolin e programuesit: “Unë gjithmonë e pyes artistin: Ku dëshiron të jesh në line-up? Kush dëshiron të luajë para teje dhe pas teje? Sapo marrim përgjigjet, ne shkruajmë një strategji 1, 3 dhe 5-vjeçare.”
Ky plan rishikohet çdo tre muaj për t’u siguruar që çdo publikim muzikor është në sinkron me rrugëtimin e synuar.
Steph Moran, Drejtuese e Muzikës në Prime Culture në Londër, foli për realitetin e vrullshëm të publikimeve të mëdha. “Ka kaos prapa çdo publikimi duhet ta përqafosh atë, është pjesë e argëtimit,” tha ajo, duke cituar vështirësitë që nga lejet për “sample-et” e deri te koordinimi i ekipeve në zona të ndryshme kohore, nga Miami në Danimarkë.
Sa i përket suksesit të papritur, Moran e ri-përkufizoi “fatin” si viralitet organik: “Mund të kesh gjithë strategjinë, paratë dhe ekipet, por vërtet nuk mund ta krijosh një hit me forcë. Ka nevojë për bashkëpunim me audiencën.”
Në anën tjetër të industrisë, Benjamin Belaga (CEO i YOYAKU) theksoi rëndësinë e pavarësisë dhe komunitetit. Ai shpjegoi se si brenda 10 viteve ndërtoi një strukturë in-house që përfshin gjithçka, nga dyqanet e vinilit te label-at, duke krijuar një mjedis ku artistët e rinj ndihen të sigurt dhe nuk varen domosdoshmërisht nga “vlerësimi i emrave të mëdhenj”.
Ndërkohë, Carolin Stötling nga agjencia gjermane Triple One, vuri në dukje vështirësitë logjistike të kohëve të fundit. “Për momentin është vërtet e vështirë të bësh parashikime,” tha ajo, duke përmendur sfidat operative për fluturimet dhe itineraret e turneve, që e bëjnë menaxhimin e artistëve në udhëtim një mision gjithnjë e më kompleks,
Paneli u mbyll me një reflektim të sinqertë nga Fajgelj, e cila përmblodhi rolin e menaxherit në rajonin tonë. “Duhet të bësh fjalë për fjalë gjithçka dhe ndonjëherë të jesh edhe psikoterapiste për artistin tënd,” u shpreh ajo, duke nënvizuar se në një mjedis sfidues, suksesi kërkon një dedikim që tejkalon aspektin profesional. Ky diskutim në MuseX shërbeu si një pasqyrë reale për të gjithë artistët e rinj shqiptarë, duke u treguar se pas një kënge që dëgjojmë në Spotify, fshihet një makineri e tërë strategjie, pasioni dhe shumë punë e padukshme.
/Argumentum.al
