Pas kërkesës së Prokurorisë Speciale në Hagë për dënime me nga 45 vjet burg për ish-krerët e Ushtrisë Çlirimtare të Kosovë, Hashim Thaçi, Kadri Veseli, Rexhep Selimi dhe Jakup Krasniqi, kanë ardhur reagime të shumta nga udhëheqës dhe parti politike në Kosovë, që e konsiderojnë këtë akt si një padrejtësi dhe përpjekje për të ndryshuar historinë e luftës çlirimtare.
Presidentja Vjosa Osmani e ka cilësuar këtë kërkesë si një tentativë për të barazuar luftën e UÇK-së me agresionin serb, duke minuar besimin në drejtësi dhe duke dëmtuar paqen afatgjatë:
“Çdo përpjekje që tenton të barazojë luftën çlirimtare të UÇK-së me krimet e agresorit gjenocidal serb e minon besimin në drejtësi dhe e dëmton rëndë paqen afatgjatë. Lufta e UÇK-së ishte e drejtë dhe e pastër, dhe kjo e vërtetë nuk ndryshohet me tentime për ta rishkruar historinë.”
Osmani ka theksuar se Serbia ka kryer gjenocid dhe krime të tmerrshme ndaj popullit të Kosovës, duke përfshirë vrasje, dhunime, dëbime masive dhe shkatërrim të infrastrukturës, ndërkohë që drejtësia për këto krime mbetet e pazgjidhur.
Lëvizja Vetëvendosje (LVV) ka reaguar ashpër ndaj kërkesës së Prokurorisë, duke e cilësuar atë jo si një akt drejtësie, por si një ndërhyrje politike në historinë dhe kujtesën kombëtare:
“Ky proces zhvendos vëmendjen nga agresori tek viktima dhe e paraqet rezistencën ndaj okupimit si krim, ndërsa okupimin si sfond të heshtur. Pretendimi se UÇK-ja ka qenë një organizatë kriminale është i pavërtetë dhe tenton të zhveshë luftën çlirimtare nga konteksti i saj historik.”
LVV thekson se drejtësia e vërtetë mund të arrihet vetëm kur emërtohet qartë pushteti gjenocidal dhe kur njihet legjitimiteti i luftës për liri.
Edhe ish-ministrja e Drejtësisë, Albulena Haxhiu, ka reaguar duke e cilësuar kërkesën e Prokurorisë si një akt padrejtësie dhe fyerje për viktimat shqiptare:
“Kjo nuk ka të bëjë me drejtësi, por me një ndëshkim politik dhe selektiv të një lufte të drejtë çlirimtare. UÇK po trajtohet sikur të ishte shkaku i luftës, e jo përgjigje ndaj terrorit shtetëror serb.”
Haxhiu ka nënvizuar se krimet e Serbisë janë të dokumentuara ndërkombëtarisht dhe se shumë kriminelë serbë nuk janë përballur me drejtësinë. Sipas saj, kërkesa për dënime ka për qëllim të zhveshë Kosovën nga e drejta morale e çlirimit dhe të barazojë viktimën me agresorin.
Në Gjykatën Speciale në Hagë, kanë nisur deklaratat përmbyllëse për rastin gjyqësor kundër ish-presidentit Hashim Thaçi, ish-kryeparlamentarëve Kadri Veseli dhe Jakup Krasniqi, dhe ish-deputetit Rexhep Selimi. Ata akuzohen për krime lufte dhe krime kundër njerëzimit, për të cilat janë deklaruar të pafajshëm. Krimet pretendohet se janë kryer midis marsit 1998 dhe shtatorit të vitit pasues në disa lokacione në Kosovë dhe në veri të Shqipërisë. Pas përmbylljes së deklaratave, çështja do të kalojë te trupi gjykues, i cili ka tre muaj kohë për të marrë një vendim ose për të kërkuar zgjatjen e afatit.
/Argumentum.al
