Të enjten paradite sipas kohës vendore, presidenti kinez Xi Jinping zhvilloi bisedime me homologun e vet amerikan Donald Trump në Shtëpinë e Bardhë.
Kreu i shtetit i Kinës vuri në dukje se është e paparë në historinë e marrëdhënieve Kinë-ShBA që krerët e shtetit të të dy vendeve shkëmbejnë vizita brenda më pak se gjashtë muajsh. “Unë dhe presidenti Trump kemi mbajtur komunikim përmes kanaleve të ndryshme, duke drejtuar së bashku anijen gjigante të marrëdhënieve dypalëshe. Në maj të këtij viti, ne ramë dakord të ndërtojmë marrëdhënie strategjike të qëndrueshme e konstruktive midis dy vendeve tona. Ky pozicionim i ri pasqyron realitetin e marrëdhënieve dypalëshe dhe mishëron pritshmëritë për të ardhmen, duke qenë një hap i rëndësishëm drejt rrugës së duhur të bashkëjetesës ndërmjet të dy vendeve”, u shpreh Xi. Sipas tij, të dyja palët duhet ta shndërrojnë këtë vizion në veprim, duke u përpjekur për të ndërtuar marrëdhënie të përcaktuara nga bashkëpunimi si rrymë kryesore, konkurrenca brenda kufijve të arsyeshëm, dallimet e menaxhueshme dhe një perspektivë paqësore, për të gjetur një rrugë të drejtë për bashkëjetesën midis dy fuqive të mëdha. Kina dhe ShBA-ja duhet dhe sigurisht mund të arrijnë përfitim të ndërsjellë përmes bashkëpunimit praktik, të nxisin suksesin e njëra-tjetrës nëpërmjet konkurrencës së shëndetshme, t’i trajtojnë siç duhet dallimet duke kërkuar pikat e përbashkëta dhe të ndërtojnë paqen nëpërmjet besimit të ndërsjellë, për të siguruar që marrëdhëniet strategjike të qëndrueshme e konstruktive Kinë-ShBA t’u sjellin më shumë dobi popujve të të dy vendeve dhe atyre të botës.
Xi Jinping theksoi më tej që, gjatë raundit të ri të konsultimeve ekonomiko-tregtare nga ekipet e të dy vendeve, u arrit konsensus i ri, gjë që është një lajm i mirë për industritë dhe banorët e dy vendeve, e madje edhe për ekonominë globale. Bashkëpunimi është një rrugë me dy drejtime, vuri në dukje kreu i shtetit i Kinës, duke shtuar se stabilizimi i marrëdhënieve ekonomike e tregtare kino-amerikane kërkon zmadhimin e listës së fushave të bashkëpunimit dhe zvogëlimin e listës së mosmarrëveshjeve. “Për sa kohë që ruajmë frymën e barazisë, respektit dhe përfitimit të ndërsjellë, mund të gjejmë zgjidhje për problemet me të cilat përballemi. Shpresoj që të dyja palët do të ecin në të njëjtin drejtim, do të mbeten të përkushtuara ndaj përfitimit të ndërsjellë dhe do të promovojnë zhvillimin e qëndrueshëm, të vazhdueshëm dhe pozitiv të marrëdhënieve ekonomiko-tregtare Kinë-ShBA,” tha ai.
Foto nga Xinhua
Xi Jinping-u u shpreh gjithashtu që Kina dhe ShBA-ja janë fuqi të mëdha në inteligjencën artificiale (AI) dhe, ndërsa ka konkurrencë ndërmjet tyre, ka edhe potencial më të madh për bashkëpunim dhe të dyja palët duhet të shfrytëzojnë epërsitë e tyre në vend që të mbrohen nga njëra-tjetra. Të dyja palët mund të vazhdojnë dialogun e tyre mbi AI-në, të shkëmbejnë pikëpamje mbi rreziqet e të mirat e saj dhe të punojnë së bashku për të parandaluar abuzimin ose keqpërdorimin e teknologjisë, duke ruajtur kontrollin e njeriut mbi teknologjinë, duke ndjekur qasjen e përqendruar te njerëzit dhe parimin e promovimit të AI-së për qëllime të mira, si edhe duke siguruar që AI t’i shërbejë përparimit të njerëzimit.
Xi Jinping theksoi se qëndrimi i Kinës për mbrojtjen e unitetit kombëtar dhe tërësisë territoriale është i qartë. Ai shprehu shpresën se pala amerikane do t’i përmbahet qëndrimit të drejtë të kundërshtimit të “pavarësisë së Tajvanit” dhe do ta trajtojë çështjen e Tajvanit me maturi, për të krijuar një bazë të fortë për bashkëpunimin strategjik dhe zhvillimin e marrëdhënieve dypalëshe.
Foto nga Xinhua
Nga ana e tij, presidenti amerikan Donald Trump deklaroi se vizita shtetërore e presidentit Xi Jinping në ShBA ishte një sukses i madh. “Si ShBA-ja, ashtu edhe Kina janë vende të mëdha. Unë dhe Presidenti Xi jemi miq të mirë që ruajnë një komunikim të ngushtë e të thelluar. Nën udhëheqjen tonë, marrëdhëniet ShBA-Kinë mund të bëhen të suksesshme. Ekipet ekonomiko-tregtare të të dyja vendeve kanë arritur rezultate të reja në raundin e fundit të konsultimeve. Duhet të vazhdojmë dialogun për të arritur një marrëveshje më të mirë,” vuri në dukje Trump. Inteligjenca artificiale ka të bëjë me të ardhmen e njerëzimit dhe ShBA-ja e Kina duhet të ruajnë dialogun e të forcojnë bashkëpunimin në këtë fushë, u shpreh ai.
Dy krerët e shtetit shkëmbyen gjithashtu mendime mbi çështje të rëndësishme ndërkombëtare e rajonale, përfshirë situatën në Lindjen e Mesme, krizën në Ukrainë dhe Gadishullin Korean.
Të dy liderët konfirmuan mbështetjen e ndërsjellë për organizimin me sukses të Takimit të Liderëve Ekonomikë të APEC-ut dhe Samitit të Liderëve të G20-ës në vitin 2026.
