Protesta dhe reagime pas shembjes së Teatrit Kombëtar të Tiranës, ka patur në mënyre të veçantë në Kosovë, ku në shenjë solidariteti, Teatri Kombëtar i Kosovës, por edhe teatrot e tjera në disa qytete të vendit kanë anuluar shfaqjet e planifikuara online.
“Teatri ka ekzistuar para nesh dhe do të ekzistojë përjetësisht”, shkruhet mes të tjerave në reagimin e tyre.
“Në shenjë solidarizimi kundër shembjes së godinës së Teatrit Kombëtar në Tiranë, Teatri Kombëtar i Kosovës, Teatri i Gjilanit, Teatri “Hadi Shehu” – Gjakovë” , Teatri “Bekim Fehmiu” Prizren, Teatri “Adriana” – Ferizaj”, Teatri “Muharrem Qena” – Mitrovicë, Qendra Multimedia”, “Teatri Oda”, Teatri “Urban”, “Etno Teatri – Kukaj”, anulojmë shfaqjen “Skenderbeu ose dashuri dhe liri”, e cila ka qenë e planifikuar në kudër të kalendarit online / livestream. Teatri ka ekzistuar para nesh dhe do të ekzistojë përjetësisht”, shkruhet në reagimin zyrtar.
Përpos kësaj,nuk ka munguar dhe reagimi nga Prishtina zyrtare ,ku Kryeministri në detyrë i Kosovës, Albin Kurti, ka reaguar pas shembjes së Teatrit Kombëtar në Tiranë, duke thënë se “kur shembet një monument kulture, kjo nuk ndodh si pasojë e një gjykimi të pjesshëm, që vjen prej shijes së veçantë të dikujt, por prej interesave të përkohshëm që lidhen me përfitimet e disave”.
“Ne duhet të jemi mbrojtësit e çdo cepi të kulturës sonë. Një pjesë e saj na është vjedhur nga pushtuesi serb – 1.200 artefakte kulturore të Kosovës. Një pjesë tjetër na është shtypur e ndrydhur nga diktatura e ideologji, na është sulmuar nga akademitë e fqinjëve, na është shitur e rrënuar prej paditurisë zyrtare a korrupsionit institucional. Arkiva e një populli, kujtesa e tij, duhet të mbahet e paprekur nga regjimet. Kultura është krijuar nëpër historitë e regjimeve, por në thelb të saj është krijimtaria dhe aderimi i një populli. Kur shembet një monument kulture, kjo nuk ndodh si pasojë e një gjykimi të pjesshëm, që vjen prej shijes së veçantë të dikujt, por prej interesave të përkohshëm që lidhen me përfitimet e disave”, shprehet Kurti.
“I përshëndes dhe i mbështes tërë artistët dhe qytetarët e Tiranës që e mbrojtën kaq gjatë Teatrin Kombëtar. Kur ndodhin humbje, ngjarjen sa edhe vetë humbja, e shënon në histori rezistenca. Në rezistencë mësojmë, e meqë nuk i harrojmë ato mësime, ata që sot përfitojnë, nesër humbin, kurse ata që humbin, fitojnë”, tha Kurti.
Ende nuk ka një kundërpërgjigjie nga Tirana zyrtare dhe nëse këtë reagim t Kryeministrit në detyre të Kosovës e shikon si “ndërhyrje” në punët e brendshme të Shqipërisë.
Gjithashtu Lëvizja Vetëvendosje me qendër në Shqipëri ka reaguar në lidhje me shembjen e Teatrit Kombëtar,duke u shprehur se dhuna policore nuk ka për ta ndalur rezistencën qytetare,nisur nga fakti se disa prej aktiviteve te saj ajne arrestuar pas protestave ne mbeshtetje te Teatrit.
Lëvizja VETËVENDOSJE! kërkon lirimin e menjëhershëm të të gjithë protestuesëve. Rezistenca qytetare ndaj këtij krimi të shumëfishtë do të vazhdojë. Teatri do ringrihet, bashkë me të dhe populli.
VV-ja i ka bërë thirrje shtetit shqiptar të ndalojë menjëherë prishjen e mëtejshme ndërtesës së Teatrit dhe të lirojë menjëherë aktivistët e qytetarët.
“I bëjmë thirrje shtetit shqiptar të ndalojë menjëherë prishjen e mëtejshme ndërtesës së Teatrit dhe të lirojë menjëherë ata dhe aktivistët e qytetarët e tjerë që ka ndaluar orët e mëhershme në mënyrë të paligjshme, ndërsa ushtronin të drejtën kushtetuese të protestës në mbrojtje të Teatrit Kombëtar pjesë e trashëgimisë kulturore kombëtare”, thuhet në njoftimin e LVV-së në Facebook.
m.d/argumentum.al
© Argumentum.
.
