Patriarku Kirill, i Moskës dhe i Gjithë Rusisë, u ka bërë thirrje udhëheqësve të krishterë në mbarë botën që të qëndrojnë së bashku në mbrojtje të paqes dhe qetësisë në Tokën e Shenjtë. Në një takim me një delegacion nga Kisha Asiriane e Lindjes, të kryesuar nga Shenjtëria e Tij Katolike-Patriarku Mar Awa III, Patriarku Kirill paralajmëroi për një eksod të mundshëm të refugjatëve të krishterë për shkak të përshkallëzimit të konfliktit palestinezo-izraelit, raporton TASS.
“Konflikti në të cilin janë përfshirë palestinezët dhe izraelitët po merr shumë jetë dhe po krijon një situatë shumë të rrezikshme, shpërthyese në këtë rajon. Më lejoni të shpreh dëshirën që, pavarësisht çdo mosmarrëveshjeje që mund të ekzistojë në vlerësime, të krishterët në mbarë botën, dhe veçanërisht ato të cilët kanë lidhje të drejtpërdrejta me Tokën e Shenjtë, sot bashkërisht mund të ngrenë zërin në mbrojtje të paqes dhe qetësisë në Tokën e Shenjtë”, tha Patriarku Kirill.
Kjo tokë dhe njerëzit e saj, shtoi ai, meritojnë paqe të paktën në shekullin XXI.
Kreu i Kishës Ortodokse Ruse kujtoi gjithashtu se të gjitha konfliktet e tilla, siç dihet nga historia, përfundimisht shkaktojnë flukse refugjatësh që largohen nga Lindja e Mesme dhe “shumë shpesh këta refugjatë janë të krishterë”.
Takimi me delegacionin e Kishës Asiriane u zhvillua në Rezidencën Patriarkale dhe Sinodalale në Manastirin Danilov.
/Argumentum.al
