Kreu i SPAK, Altin Dumani, paraqiti në Komisionin e Ligjeve raportin vjetor për punën e Prokurorisë së Posaçme, ku për 5 orë kreu i SPAK, Atlin Dumani raportoi dhe iu përgjigj dhe pyetjeve të deputetëve për dosje dhe operacione të bujshme që SPAK ka ndërmarrë për të luftuar korrupsionin dhe krimin e organizuar.
Ai tha se hetimet e vitit 2023 tregojnë se grupet kriminale shqiptare janë përfshirë në tregun ndërkombëtar të trafikimit të drogave të forta duke pasur dhe kontrolluar trafikun e ciklit të mbyllur dhe duke pasur pozicion dominues në vendet e origjinës, përfshirë edhe ato në Amerikën Latine.
“Disa prej veçorive janë anëtarësia prej 20-25 persona, aktiviteti polikriminal, dhuna për kontroll territori, përfshirja e femrave në pozicione dytësore, vrasje të sofistikuara me pagesë, komunikimet e koduara, dhe konvertimi i parave në kriptovaluta”, evidentoi Dumani.
Ai e konsideroi shqetësim veprimtari e sofistikuar e grupeve kriminale të cilat operojnë nëpërmjet coll-center.
Gjithashtu, Dumani deklaroi sot se “Tregjet kriminale në Shqipëri paraqesin situatë shqetësuese me grupe aktive në qytete si Tiranë, Durrës, Vlorë, Gjirokastër, Fieri, Shkodra, Elbasani, Kurbini dhe Fushë-Kruja”.
“Në Tiranë dhe qytetet bregdetare, grupet merren kryesisht me pastrimin e parave, ndërsa trafiku i narkotikëve është shfaqur problematik në Durrës, Vlorë, Gjirokastër, Fier dhe Kurbin. Korrupsioni i funksionarëve të drejtësisë është i evidentuar në Durrës, Shkodër, Laç dhe Fushë-Krujë. Vrasjet dhe tentativat për vrasje janë të shpeshta në Durrës, Fushë-Krujë, Fier, Vlorë, Shkodër dhe Elbasan. Në Fushë-Krujë është i pranishëm tregtia e armëve, lëndëve shpërthyese si dhe makinat e vjedhura të cilat pastaj përdoren në ngjarje kriminale”, nënvizoi kreu i SPAK.
Dumani tha se investimet në prona të luajtshme dhe të paluajtshme mbetet mënyra kryesore për pastrimin e parave në Shqipëri, veçanërisht në apartamente, ndërtesa dhe njësi shërbimi në Tiranë dhe zona turistike si Vlora, Durrësi dhe Lezha.
“Gjithashtu një numër i konsiderueshëm parash dyshohet se depozitohen në llogari bankare në emra shoqërish tregtare ose të afërm të të dyshuarve. Një nga skemat komplekse të pastrimit të parave në Shqipëri përfshin përdorimin e bankave dhe bizneseve shqiptare si ndërmjetës për organizatat kriminale ndërkombëtare, si mafia italiane. Në një rast, një biznes shqiptar bashkëpunoi për t’i dhënë akses përfaqësues të mafies ndërkombëtare të integronte të ardhurat kriminale në sektorin bankar për shtresëzimin e transfertave që pastaj do të transferoheshin po me ndihmën e biznesit vendas jashtë vendit”, deklaroi Dumani.
Kreu i SPAK ka shtuar se bashkëpunimi shumë i mirë me bankat e nivelit të dytë dhe FIU-Agjencia e Mbikqyrjes Financiare bëri që ky operacion i grupeve kriminale të dështonte.
Dumani bëri me dije se kanë nisur punën për një strategji që lidhet me hetimin e krimeve zgjedhore.
“Sa i takon asaj që Komiteti Shqiptar i Helsinkit thotë në raport me ndërtimin e një strategjie për hetimin e krimeve zgjedhore që mund të ndeshen gjatë vitit të ardhshëm, unë bashkë me stafin tim kemi filluar përgatitjet dhe në muajin Janar do të bëjmë prezente dhe publike strategjinë që ne do të ndërtojmë për hetimin e veprave penale që kanë të bëjnë me zgjedhjet e vitit 2025”, deklaroi Dumani.
Kreu i SPAK tha se “për krimet zgjedhore të hetuara, gjatë vitit 2023 ka numër në rritje”.
Dumani tha se në Raportin Vjetor kanë paraqitur disa shqetësime për të cilat ai shprehu besimin se do të gjejnë mbështetje dhe zgjidhje ligjore nga Kuvendi
“Mungesa e përcaktimit të qartë ligjor lidhur me statusin e prokurorëve të posaçëm pas përfundimit të mandatit të tyre; Mungesa e këshilltarëve ligjorë; Adresimi i ngarkesës së shtuar, ndaj drejtuesit të SPAK për çështjet e papërfunduara të rivlerësimit të magjistratëve pas marrjes së kompetencave të komisionerit publik; Mungesa e referimeve nga institucionet publike; Shtimi i numrit të Byrosë Kombëtare të Hetimit; Numri i konsiderueshëm i procedimeve të mbartura; Mungesa e kompetencës për shqyrtimin e kërkesave të autoriteteve të huaja lidhur me njohjen dhe ekzekutimin e vendimeve penale të huaja në Shqipëri në ngarkim të shtetasve shqiptarë për veprat penale, për të cilat SPAK ka në kompetencë si dhe mungesa e kompetencave lëndore të Gjykatës së Posaçme për shqyrtimin e kërkesave në fazën e ekzekutimit penale për subjektet e posaçme”, ka renditur Dumani.
Lexoni raportin e plotë të SPAK 2023
