Papa Françesku e ka dënuar vendimin e Kievit për t’i ndaluar organizatat fetare të lidhura me Kishën Ortodokse Ruse.
“Asnjë kishë e krishtere nuk mund të përjashtohet direkt apo indirekt. Kishat nuk duhet të preken”, tha papa gjatë një lutje javore, një ditë pasi presidenti i Ukrainës, Volodymyr Zelensky, e nënshkroi legjislacionin që i ndalon aktivitetet e Kishave Ortodokse Ukrainase të lidhura me Rusinë në Ukrainë.“Duke menduar për ligjin e miratuar së voni në Ukrainë, kam frikë për lirinë e atyre që luten”, tha Francesku.Ai tha para turmës në Sheshin e Shën Pjetrit se “nuk mund të bësh keq duke u lutur. Nëse dikush i bën diçka keq popullit të vet, ai është fajtor. Por, ai nuk mund të ketë bërë diçka keq duke u lutur”.Duke e nënshkruar legjislacionin më 24 gusht, Zelensky nënvizoi atë që e quajti pavarësi shpirtërore të popullit ukrainas, duke thënë se Kisha Ortodokse e Ukrainës (OCU) “sot po ndërmerr hapa drejt clirimit nga djajtë e Moskës”.
OCU-ja, e cila është e lidhur me Kievin, e fitoi pavarësinë nga Patriarkana e Moskës prej Patriarkana Ekumenike e Kostandinopojës në vitin 2019.
Kisha Ortodokse Ukrainase e lidhur me Rusinë deklaroi se i prishi marrëdhëniet me Patriarkanën e Moskës më 2023, për shkak të nisjes së pushtimit të Ukrainës nga Rusia në shkurt 2022.
Megjithatë, autoritetet ukrainase e akuzuan atë se kishte ruajtur lidhjet me Moskën.
Patriarku Kirill, udhëheqës i Kishës Ortodokse në Rusi, është mbështetës i zëshëm i presidentit të Rusisë, Vladimir Putin, dhe i luftës kundër Ukrainës.
Ligjvënësit ukrainas e miratuan më 20 gusht legjislacionin që ndalon punën e organizatave fetare të lidhura me Kishën Ortodokse Ruse, të cilën Kievi e sheh si mbështetëse të luftës së nisur prej Moskës në Ukrainë, më 2022.
Autoritetet ukrainase kanë kërkuar t’i ndalojnë aktivitetet e Kishës Ortodokse Ruse në Ukrainë prej se forcat e lidhur me Rusinë uzurpuan pjesë të vendit më 2014.
Papa tha se gjithashtu është duke e përcjell me “dhimbje” luftën në Ukrainë.
Vendimi i Kievit
Projektligji i miratuar 20 gushtin e kaluar në Kiev me një shumicë dërrmuese, që u jep famullive të përfshira nëntë muaj për të ndërprerë lidhjet me Kishën Ortodokse Ruse, ngjalli reagimin e menjëhershëm të Moskës, e cila e komentoi duke theksuar se qëllimi është “për ta shkatërruar ortodoksinë e vërtetë kanonike dhe për ta zëvendësuar me një surrogat, domethënë, me një kishë të rreme”.
