Fjala kyçe: 谬误—[miù wù]—gabimet
Një studiues i pjesës kontinentale të Kinës nxorri në pah 10 gabimet në fjalimin e liderit të Rajonit të Tajvanit, Lai Ching-te, mbi të ashtuquajturin unitet të ishullit.
Më 24 qershor, Lai përdori në një fjalim pretekstin e të ashtuquajturit unitet, për të përhapur sërish separatizmin e “pavarësisë së Tajvanit”, në përpjekje për të nxitur armiqësi dhe konfrontim përgjatë Ngushticës së Tajvanit, si edhe për të thelluar përçarjet brenda shoqërisë.
Li Zhenguang, profesor i çështjeve të Tajvanit në Universitetin Union të Pekinit, tha në një artikull të tij se fjalimi i Lait është plot gabime dhe mashtrime. Profesori Li shpjegoi 10 gabimet më absurde në fjalimin e Lait, në një përpjekje për të sqaruar situatën.
Gabimi i parë qëndron në faktin se Lai flet me fjalë boshe për “unitetin”, ndërsa në realitet përfshihet në grindje të brendshme. Ai ka përdorur masa gjyqësore për të shtypur rivalët e tij, për të ndaluar qytetarët dhe ka shfrytëzuar pozicionin në pushtet për të krijuar një klimë “terrori të gjelbër”, duke i nënshtruar forcat opozitare ndaj shtypjes së ashpër politike dhe persekutimit gjyqësor.
Së dyti, Lai mburret se Rajoni i Tajvanit renditet i pari në Azi në Treguesin Botëror të Lirisë së Shtypit, por realiteti në ishull tregon një tjetër situatë – mediat që janë pro-Partisë Demokratike Progresive (DPP) dominojnë peizazhin, ndërsa mediat pro-Partisë Kuomintang Kinez përballen me shtypje.
Së treti, Lai pohoi se Tajvani renditet i pari në Azi në Treguesin e Lirisë Njerëzore. Por, nën kërcënimet e DPP-së, a kanë vërtet qytetarët e zakonshëm, mësuesit, studentët dhe figurat fetare në Rajonin e Tajvanit lirinë për të vizituar pjesën kontinentale të Kinës për shkëmbime?
I katërti nga gabimet qëndron në pohimin e Lait se “sa më të bashkuar të jenë njerëzit, aq më i fortë bëhet Tajvani”. Ndërsa është e vërtetë që uniteti mund të sjellë forcë, ajo që Lai po bën në të vërtetë është t’i nxisë njerëzit të bashkohen në kundërshtim me kontinentin – në thelb duke u përpjekur ta shfrytëzojë popullin e Rajonit Tajvan për agjendën separatiste.
Së pesti, Lai deklaroi se pavarësisht nga prejardhja etnike ose kur dikush mbërrin në Rajonin Tajvan, të gjitha grupet janë zotër të barabartë të këtij ishulli. Megjithatë, në fakt, DPP trajton vetëm ata që janë në linjë si të brendshëm, ndërsa etiketon këdo që kundërshton separatizmin e “pavarësisë së Tajvanit” si një “papastërti” të padëshiruar që duhet eliminuar.
Gabimi i gjashtë qëndron në pretendimin e Lait se “Tajvani është një vend sovran dhe i pavarur”. Megjithatë, në gjithë historinë, nuk ka pasur dhe nuk do të ketë kurrë një vend të quajtur zyrtarisht “Tajvan”.
Gabimi i shtatë është pretendimi i Lait se qëndrimi i DPP-së për “pavarësinë e Tajvanit” përfaqëson vullnetin e popullit të Tajvanit. Kjo është qartësisht një përpjekje për të vendosur agjendën separatiste të DPP-së mbi të gjithë popullsinë e Tajvanit.
Së teti, Lai i quajti partitë opozitare dhe mbështetësit e tyre “papastërti”. Kjo nuk është vetëm një shfaqje armiqësie dhe shpërfilljeje ndaj shumicës së opinionit publik në këtë ishull, por edhe një fyerje e rëndë për forcat opozitare.
Gabimi i nëntë në fjalimin e Lait qëndron në mbështetjen e shpresave të tij tek forcat e jashtme për mbrojtje. Shtetet e Bashkuara, të shtyra nga interesat e tyre, kanë çdo mundësi ta hedhin Tajvanin poshtë si një këpucë të përdorur.
Gabimi i dhjetë në fjalimin e Lait është promovimi i paturpshëm i të ashtuquajturës dritë e demokracisë së Tajvanit. Që nga marrja e detyrës, Lai ka abuzuar me pushtetin gjyqësor për të shtypur forcat e opozitës dhe për të persekutuar qytetarët që mbështesin marrëdhëniet paqësore mes brigjeve të ngushticës dhe që angazhohen në shkëmbime me pjesën kontinentale. A duket kështu demokracia e vërtetë? Në realitet, është një fyerje dhe një tallje e thellë e vlerave të vërteta demokratike./cgtn
