Qeveria e Rajonit të Posaçëm Administrativ të Hong-Kongut (HKSAR) dhe Zyra e Ndërlidhjes e Qeverisë Qendrore në HKSAR bashkorganizuan të enjten një seminar për Ditën e Kushtetutës, me qëllim thellimin e njohjes nga publiku të bazave kushtetuese të vendit dhe të HKSAR-it.
Para seminarit, të gjithë pjesëmarrësit u ngritën në këmbë dhe mbajtën një minutë heshtjeje për të kujtuar viktimat e zjarrit në kompleksin e banimit “Wang Fuk Court” në Hong-Kong, i cili shpërtheu të mërkurën e kaluar.
Duke folur në këtë veprimtari, kryeekzekutivi i Hong-Kongut, John Lee, shprehu së pari ngushëllime të thella për viktimat e zjarrit dhe simpatinë e sinqertë për familjet e tyre dhe banorët e prekur. Ai bëri të ditur që qeveria e HKSAR-it po i përqendron të gjitha përpjekjet në punën e shpëtimit dhe mbështetjen pas fatkeqësisë, dhe do të krijojë një komision të pavarur për të bërë një shqyrtim të plotë të kësaj ngjarjeje, në mënyrë që të parandalohen tragjedi të ngjashme dhe të përmbushen pritshmëritë e opinionit publik.
Lee tha se mësimet e dhimbshme nga kjo ngjarje do të shndërrohen në masa konkrete për të forcuar sigurinë urbane dhe për të nxisur reformat institucionale.
Seminari kishte si temë “Kushtetuta dhe rilindja e madhe e kombit kinez”. Lee theksoi që Kushtetuta siguron mbrojtjen më të fortë të sundimit të ligjit dhe themelet institucionale për rilindjen e madhe të kombit kinez, dhe është gjithashtu baza kushtetuese për krijimin e HKSAR-it. Në rrugëtimin e rilindjes kombëtare, Hong-Kongu është njëkohësisht si pjesëmarrës, ashtu edhe përfitues.
Lee u bëri thirrje të gjithë sektorëve për të punuar së bashku për ta ndërtuar e zhvilluar Hong-Kongun, duke kontribuuar në kauzën e rilindjes së madhe të kombit kinez.
