Manovrat e fundit ushtarake të kryera nga Ushtria Çlirimtare Popullore (UÇP) e Kinës rreth ishullit të Tajvanit ishin një paralajmërim i fortë për “forcat e pavarësisë së Tajvanit” dhe ndërhyrjen e huaj, u shpreh të mërkurën zëdhënësja e Zyrës së Çështjeve të Tajvanit të Këshillit të Shtetit Zhang Han.
Manovrat ishin një veprim i nevojshëm dhe i drejtë për të mbrojtur sovranitetin kombëtar dhe integritetin territorial, tha Zhang Han në një konferencë për shtypin, duke iu përgjigjur një pyetjeje të medias në lidhje me manovrat me emrin e koduar “Misioni i Drejtësisë 2025” rreth ishullit të Tajvanit, të cilat u kryen nga forca të shumta të Komandës së Zonës Lindore të Ushtrisë Çlirimtare Popullore të hënën dhe të martën.
Zhang vuri në dukje që zhvillimi i aktiviteteve separatiste të “pavarësisë së Tajvanit” nga autoritetet e Lai Chingte përbën një përpjekje provokuese për të kërkuar pavarësinë në bashkëpunim me forcat e jashtme.
Zëdhënësja tha se aktivitetet separatiste dëmtojnë seriozisht marrëdhëniet ndërmjet dy brigjeve të ngushticës, kërcënojnë rëndë paqen e qëndrueshmërinë në Ngushticën e Tajvanit dhe dëmtojnë rëndë interesat themelore të kombit kinez, si edhe interesat jetike të bashkatdhetarëve të rajonit të Tajvanit.
Çdo formë e aktivitetit separatist të “pavarësisë së Tajvanit” nuk do të tolerohet kurrë dhe do të përballet me kundërmasa të vendosura, vuri në dukje Zhang.
Ajo theksoi që Tajvani është Tajvani i Kinës dhe se çdo forcë e huaj që përpiqet të ndërhyjë në çështjen e Tajvanit ose në punët e brendshme të Kinës do të hasë në mënyrë të pashmangshme në mbrojtjen e hekurt të Ushtrisë Çlirimtare Popullore të Kinës.
Prirja historike e ribashkimit kombëtar është e pandalshme dhe askush nuk duhet të nënvlerësojë vendosmërinë e fortë, vullnetin e palëkundur ose aftësinë e Kinës për të mbrojtur sovranitetin kombëtar dhe integritetin territorial, tha Zhang.
“Kinezët në të dyja anët e Ngushticës së Tajvanit janë anëtarë të së njëjtës familje,” u shpreh zëdhënësja, duke shtuar që veprimet përkatëse ushtarake drejtohen vetëm kundër aktiviteteve separatiste të “pavarësisë së Tajvanit” dhe ndërhyrjes së huaj e nuk synojnë në asnjë mënyrë shumicën dërrmuese të bashkatdhetarëve të Tajvanit./cgtn
