Kritikat e pabaza të disa vendeve e institucioneve ndaj manovrave ushtarake të Kinës janë krejtësisht hipokrite. Kështu u shpreh të mërkurën zëdhënësi i Ministrisë së Jashtme kineze Lin Jian në një konferencë të rregullt shtypi, kur iu kërkuar të komentonte mbi njoftimet që Japonia, Australia, institucionet e BE-së dhe disa vende evropiane kanë shprehur publikisht shqetësim në lidhje me manovrat ushtarake të Kinës pranë ishullit të Tajvanit.
Lin theksoi që këto vende dhe institucione e bëjnë një vesh të shurdhër ndaj përpjekjeve të forcave separatiste të “pavarësisë së Tajvanit” për të kërkuar pavarësi me forcë dhe mbyllin sytë ndaj ndërhyrjeve të huaja në punët e brendshme të Kinës, megjithatë ato bëjnë kritika të pabaza, shtrembërojnë të vërtetën dhe ngatërrojnë të drejtën me të gabuarën në lidhje me veprimet e nevojshme dhe të drejta të Kinës për të mbrojtur sovranitetin kombëtar dhe integritetin territorial. Një gjë e tillë është krejtësisht hipokrite, theksoi zëdhënësi, duke shtuar që Kina e kundërshton me vendosmëri këtë dhe ka paraqitur një protestë të fortë.
Lin Jian vuri në dukje që Tajvani është një pjesë e pandashme e territorit të Kinës dhe çështja e Tajvanit është thjesht punë e brendshme e Kinës, ku nuk lejohet asnjë ndërhyrje e huaj. Realiteti më i rëndësishëm në Ngushticën e Tajvanit është se të dyja palët i përkasin një Kine të vetme, dhe kërcënimi më i madh për paqen dhe qëndrueshmërinë në këtë Ngushticë janë aktivitetet separatiste të “pavarësisë së Tajvanit” dhe tolerimi e mbështetja e forcave të jashtme.
“Parimi i ‘një Kine’ është një konsensus i përgjithshëm i bashkësisë ndërkombëtare dhe një normë themelore e marrëdhënieve ndërkombëtare. Ai është themeli politik për zhvillimin e marrëdhënieve me 183 vendet që kanë vendosur lidhje diplomatike me Kinën. Japonia, Australia dhe vendet evropiane morën angazhime politike ndaj këtij parimi kur vendosën marrëdhënie diplomatike me Kinën. Ne i nxisim fuqimisht vendet dhe institucionet e lartpërmendura që t’i përmbahen në mënyrë serioze parimit të ‘një Kine’, të ndërpresin ndërhyrjen në punët e brendshme të Kinës dhe të ndalojnë së toleruari e mbështeturi aktivitetet separatiste të ‘pavarësisë së Tajvanit’,” shtoi zëdhënësi./cgtn
