Me ftesë të kryeministrit kinez Li Qiang, kryeministri kanadez Mark Carney do të zhvillojë një vizitë zyrtare në Kinë nga 14 deri më 17 janar.
Kjo do të jetë vizita e parë pas tetë vjetësh në Kinë nga një kryeministër kanadez, duke pasqyruar përmirësimin e fundit të lidhjeve dypalëshe.
Kina i kushton rëndësi të madhe kësaj vizite, tha të hënën zëdhënësja e Ministrisë së Punëve të Jashtme kineze Mao Ning, ndërsa dha hollësi për vizitën në një konferencë të rregullt për shtypin. Ajo shtoi që zhvillimi i shëndetshëm dhe i qëndrueshëm i marrëdhënieve Kinë-Kanada u shërben interesave të përbashkët të të dy vendeve dhe popujve të tyre.
Falë përpjekjeve të përbashkëta të të dyja palëve, marrëdhëniet kino-kanadeze kanë treguar një vrull pozitiv drejt rimëkëmbjes dhe përmirësimit që nga viti i kaluar.
foto nga CMG
Në tetor 2025, udhëheqësit e Kinës dhe Kanadasë u takuan në kuadër të Takimit të 32-të të Liderëve Ekonomikë të Bashkëpunimit Ekonomik të Azi-Paqësorit (APEC) në Korenë e Jugut. Të dyja palët ranë dakord të rinisin shkëmbimet e bashkëpunimin në fusha të ndryshme, të promovojnë zgjidhjen e çështjeve të veçanta ekonomike e tregtare me interes të ndërsjellë dhe të nxitin së bashku zhvillimin e partneritetit strategjik kino-kanadez.
Vizita pason takimin midis kryeministrave të të dy vendeve në kuadrin e Asamblesë së Përgjithshme të Kombeve të Bashkuara një muaj më parë, si edhe vizitat në Kinë të zyrtarëve të lartë kanadezë, përfshirë ministrin e jashtëm.
Duke shprehur gatishmërinë e palës kineze për të bashkëpunuar me palën kanadeze, për të ruajtur dhe për të zhvilluar së bashku vrullin pozitiv, duke u fokusuar te shqetësimet ekonomike dhe tregtare të njëra-tjetrës nëpërmjet dialogut dhe konsultimeve, kryeministri Li u bëri thirrje të dyja palëve të thellojnë dhe të zgjerojnë bashkëpunimin me leverdi të ndërsjellë në fusha të tilla si energjetika, zhvillimi i gjelbër, turizmi etj., në të mirë të dy popujve të të dy vendeve.
foto nga CMG
Si një gjest i vullnetit të mirë, Kina rifilloi në nëntor shërbimet e udhëtimit në grup në Kanada për shtetasit kinezë nëpërmjet agjencive turistike, duke synuar të përmirësojë më tej shkëmbimet njerëzore midis dy vendeve dhe të nxisë mirëkuptimin dhe miqësinë e ndërsjellë midis dy popujve.
Kina shpreson që, nëpërmjet kësaj vizite të kryeministrit Carney, të dy palët do të shtojnë dialogun dhe shkëmbimet, do të rrisin besimin e ndërsjellë politik, do të zgjerojnë bashkëpunimin pragmatik, do të trajtojnë siç duhet mosmarrëveshjet, do të marrin parasysh shqetësimet e njëra-tjetrës, do të konsolidojnë prirjen e kthesës në marrëdhëniet Kinë-Kanada dhe do të sjellin më shumë përfitime për të dy popujt, tha Mao.
foto nga CMG
Kina ka qenë prej kohësh partnerja e dytë më e madhe tregtare e Kanadasë. Sipas Administratës së Përgjithshme të Doganave të Kinës, nga janari deri në gusht 2025 tregtia dypalëshe ndërmjet Kinës dhe Kanadasë arriti në 61.74 miliardë dollarë, me një rritje prej 7.1 për qind në krahasim me të njëjtën periudhë të vitit 2024.
Përveç takimit me udhëheqësit kinezë, vizita e Carney-t do të përfshijë gjithashtu shkëmbime me përfaqësues të biznesit, duke synuar ngritjen e bashkëpunimit dypalësh në tregti, energjetikë, bujqësi e sigurinë ndërkombëtare në një nivel të ri.
/cgtn
