Presidenti Donald Trump deklaroi për Axios të hënën se vendosi të pezullojë sulmet amerikane ndaj Iranit për t’i dhënë edhe një mundësi negociatave, por theksoi se mund të urdhërojë rifillimin e operacioneve të zgjeruara ushtarake nëse diplomacia dështon.
Negociatat aktuale janë të përqendruara në arritjen e një marrëveshjeje të re që do të mundësonte rihapjen e Ngushticës së Hormuzit dhe rifillimin e bisedimeve për një marrëveshje gjithëpërfshirëse mbi programin bërthamor të Iranit.
Bisedimet po zhvillohen kryesisht mes Iranit dhe Omanit. Megjithatë, Katari, Pakistani, Egjipti, si edhe të dërguarit e Trumpit, Steve Witkoff dhe Jared Kushner, janë të angazhuar në mënyrë aktive në proces.
“Jemi në bisedime shumë të thella me Iranin. Nëse ato nuk japin rezultat, do t’i rikthehemi veprimeve shumë të forta ushtarake,” tha Trump në intervistë.
I pyetur se sa kohë është i gatshëm t’i japë diplomacisë, presidenti u përgjigj: “Jo shumë kohë. Ose ecën shpejt, ose nuk ecën fare.”
Trump tha se vendosi të pezullojë sulmet të premten pasi vendet ndërmjetësuese, si edhe shtete të tjera të rajonit, i kërkuan t’u jepte negociatave edhe një mundësi.
“Të gjithë ata që merren me Iranin më thanë: ‘Mos qëllo’,” tha Trump, duke shtuar se beson se Irani dëshiron të arrijë një marrëveshje.
“Asgjë e fituar, asgjë e humbur,” u shpreh Trump, duke shpjeguar arsyen pse pranoi kërkesën e ndërmjetësve.
Ai theksoi se çmimet e naftës ranë dhe tregjet e aksioneve u rritën pasi vendosi të ndalte sulmet.
Për herë të parë në dy javë, Trump urdhëroi të premten ushtrinë amerikane të ndërpriste sulmet dhe të mos godiste objektiva iraniane përgjatë bregdetit jugor të Iranit dhe në zonën e Ngushticës së Hormuzit.
Vendimi u mor pas një takimi me këshilltarët e tij kryesorë dhe drejtues ushtarakë, të cilët i paraqitën një plan të ri goditjesh për atë ditë.
Sipas burimeve, në ditët para takimit Trump kishte qenë i prirur të rikthehej në operacione ushtarake në shkallë të gjerë, por qëndrimi i tij nisi të ndryshonte të enjten në mbrëmje.
Vendimi për të frenuar fushatën e bombardimeve në Ngushticën e Hormuzit u konsolidua të premten.
Burime rajonale thanë se negociatat mes Omanit dhe Iranit kanë shënuar përparim, por ende nuk është arritur një marrëveshje.
© 2026 Argumentum
