Irani ka lëshuar raketa drejt bazave amerikane në Jordani dhe ka pretenduar se ka sulmuar me dronë një bazë ku ndodhen forca amerikane në Emiratet e Bashkuara Arabe, në përgjigje të sulmit amerikan ndaj dy lëshuesve iranianë në ishullin Larak, në ngushticën e Hormuzit.
Garda Revolucionare Islamike tha se kishte lëshuar raketa balistike ndaj dy bazave amerikane në Jordani. Ushtria jordaneze deklaroi se kishte interceptuar tetë raketa që hynë në hapësirën ajrore të vendit. Nuk pati raportime të menjëhershme për viktima apo dëme të mëdha.
Ushtria iraniane tha më herët se kishte nisur dhjetëra dronë shpërthyes drejt bazës Al Minhad në Emiratet e Bashkuara Arabe, ku ndodhen personel dhe mjete amerikane.
Emiratet e mohuan se baza ishte goditur, duke i cilësuar raportimet si të pavërteta. Ministria e Mbrojtjes tha se forcat e saj kishin interceptuar një dron iranian mbi ujërat territoriale të Emirateve.
Sulmet iraniane pasuan goditjen amerikane të së dielës ndaj dy lëshuesve iranianë në Larak. Sipas Komandës Qendrore të SHBA-së (CENTCOM), forcat iraniane po përgatiteshin të përdornin raketa të pajisura me mina detare në ngushticën e Hormuzit.
CENTCOM e përshkroi operacionin si “veprim të kufizuar dhe të saktë”, të ndërmarrë për të eliminuar një kërcënim të menjëhershëm ndaj lundrimit ndërkombëtar. Sulmi ishte veprimi i parë i konfirmuar amerikan kundër territorit iranian që prej fundit të korrikut.
Irani e dënoi sulmin dhe premtoi hakmarrje. Presidenti Masoud Pezeshkian tha të hënën se Teherani “nuk kërkon luftë”, por nuk do të qëndrojë pasiv përballë agresionit.
Përshkallëzimi i fundit rikthen në qendër të konfliktit ngushticën e Hormuzit, një nga korridoret më të rëndësishme energjetike në botë, ndërsa përplasja mes SHBA-së dhe Iranit po rrezikon të zgjerohet më tej në rajon.
/Argumentum.al
