Ministri i Jashtëm rus, Sergey Lavrov, deklaroi të mërkurën se nëse Europa do të sulmonte Federatën Ruse, lufta që do të pasonte do të ishte “krejtësisht ndryshe” dhe “shumë e shkurtër”.
Duke folur në Festivalin Ndërkombëtar të Rinisë në Jekaterinburg, Lavrov përsëriti qëndrimin e Moskës se Rusia nuk ka ndërmend të sulmojë vendet europiane dhe se nuk ka interes ta bëjë një gjë të tillë, raporton Anadolu Agency.
“Rusia ka thënë vazhdimisht se nuk do të sulmojmë vendet perëndimore dhe nuk kemi interes ta bëjmë këtë. Por nëse Europa, e cila flet rregullisht për përgatitjen e një lufte kundër Rusisë, sulmon Federatën Ruse, atëherë kjo do të jetë një luftë krejtësisht ndryshe dhe do të jetë shumë e shkurtër”, deklaroi Lavrov.
Kreu i diplomacisë ruse tha se përballja nuk është mënyra e veprimit të Rusisë, duke iu referuar qëndrimeve të përsëritura të udhëheqjes ruse, përfshirë Presidentin Vladimir Putin.
Lavrov akuzoi gjithashtu Perëndimin se prej kohësh ka zgjedhur politikën e “përmbajtjes” ndaj Rusisë, duke përmendur zgjerimin e NATO-s drejt kufijve rusë.
Ai kritikoi edhe deklaratat e disa liderëve europianë për nevojën e përgatitjes për një konflikt të mundshëm me Rusinë, duke thënë se kjo çështje është kthyer në një temë të rëndësishme në diskursin politik europian dhe në Bruksel.
/Argumentum.al
