Komisioni Europian po punon për të përmbyllur procesin e anëtarësimit të Shqipërisë deri në dhjetor 2027 – një afat që Tirana e ka promovuar prej kohësh dhe që tani pritet të marrë njohje formale në udhërrëfyesit e ardhshëm të BE-së për zgjerimin, thanë zyrtarë të BE-së për Euronews.
Komisioni po përgatit një udhërrëfyes që do të konfirmojë objektivin e deklaruar të Shqipërisë për mbylljen e të gjithë kapitujve të negociatave deri në fund të vitit të ardhshëm, si dhe do të përcaktojë detyrimet prioritare për të mbushur boshllëqet e mbetura në procesin e anëtarësimit.
Shqipëria ka përcaktuar fundin e vitit 2027 si objektiv për përfundimin e negociatave të anëtarësimit, një afat që kryeministri Edi Rama dhe zyrtarë të tjerë të lartë e kanë përshkruar vazhdimisht si një plan të dakordësuar me Komisionin Europian.
Por, ndërsa zyrtarët e Komisionit e kanë mbështetur këtë ambicie, ekzekutivi i BE-së zakonisht nuk përcakton afate për anëtarësimin, pasi zgjerimi synohet të jetë një proces i bazuar në merita.
“Siç e dini, zgjerimi nuk funksionon me data. Por sa më shumë që vendi i afrohet fundit të pjesës teknike të procesit të anëtarësimit, aq më shumë mund të flasim për të ose aq më shumë mund t’i përdorim vitet”, tha në korrik komisionerja për Zgjerimin, Marta Kos.
Kjo pritet të ndryshojë së shpejti. Në fjalimin e saj për Gjendjen e Bashkimit, mbajtur javën e kaluar në Parlamentin Europian, presidentja e Komisionit Europian, Ursula von der Leyen, njoftoi një seri “udhërrëfyesish” për vendet kandidate.
“Ne së shpejti do të propozojmë udhërrëfyes për kandidatët që kanë bërë përparimin më të madh”, tha von der Leyen, duke përmendur Ukrainën, Moldavinë dhe Ballkanin Perëndimor si vende, e ardhmja e të cilave është në Bashkimin Europian.
Udhërrëfyesit pritet të përcaktojnë një afat orientues, për t’u dhënë vendeve kandidate një ide më të qartë për drejtimin që duhet të ndjekin, duke i bërë jehonë strategjisë së zgjerimit të vitit 2002, e cila i hapi rrugën zgjerimit të “Big Bang”-ut me anëtarësimin e 10 vendeve të reja.
Udhërrëfyesit do të përfshihen në paketën e zgjerimit të Komisionit, vlerësimin e tij vjetor të ecurisë së procesit të anëtarësimit, i cili pritet të publikohet në fund të tetorit. Paketa përfshin gjithashtu vlerësime për secilin vend dhe rekomandime për hapat e ardhshëm.
Në këtë kuadër, Komisioni po harton një raport vlerësimi mbi kriteret për mbylljen e negociatave, i cili shqyrton nëse një vend kandidat ka përmbushur standardet e përcaktuara për t’u konsideruar se i ka përmbushur kërkesat e anëtarësimit, veçanërisht në drejtësi dhe shtetin e së drejtës, të ashtuquajturat “fundamentals” – kushtet themelore.
Në rastin e Shqipërisë, plani është që të përfshihet një listë me objektivat kryesore, ku do të përcaktohen reformat dhe masat që nevojiten për të mbyllur boshllëqet e mbetura në përmbushjen e kritereve.
E njëjta gjë ishte bërë më herët për Malin e Zi, ku Komisioni përdori procesin e vlerësimit të kritereve për mbylljen e negociatave për të përcaktuar konkretisht reformat dhe rezultatet që vendi duhej të arrinte.
Lista e objektivave synon t’u japë vendeve kandidate një sinjal të qartë se ku qëndrojnë prioritetet, duke i nxitur
© 2026 Argumentum
