Kolumbia ka ndërprerë zyrtarisht marrëdhëniet diplomatike me Iranin, një vendim i marrë më 19 shtator dhe i bërë publik më 24 shtator nga Ministria e Jashtme në Bogota. Qeveria kolumbiane e justifikoi masën me shqetësimet për sigurinë kombëtare dhe të hemisferës, si dhe me luftën kundër krimit transnacional.
Në deklaratën e saj, Bogota përmendi lidhjet e dyshuara të qeverisë iraniane me grupe terroriste ndërkombëtare dhe organizata narkoterroriste, të cilat, sipas autoriteteve kolumbiane, përbëjnë kërcënim për sigurinë e vendit. Në arsyetimin e vendimit u përfshinë gjithashtu shkeljet e të drejtave të njeriut në Iran, sulmet ndaj vendeve të treta në kuadër të konfliktit në Lindjen e Mesme, bllokimi i Ngushticës së Hormuzit dhe pengimi i punës së Agjencisë Ndërkombëtare të Energjisë Atomike për verifikimin e programit bërthamor iranian.
Ministria e Jashtme kolumbiane tha se këto zhvillime kanë dëmtuar besimin e Bogotas ndaj Teheranit, ndërsa theksoi se vendimi është pjesë e një politike të jashtme që e vendos sigurinë kombëtare, mbrojtjen e sovranitetit dhe luftën kundër ndërhyrjeve të jashtme në qendër të saj.
Megjithatë, sipas autoriteteve kolumbiane, shërbimet konsullore do të vazhdojnë në përputhje me Konventat e Vjenës për marrëdhëniet diplomatike dhe konsullore.
Në një vendim të veçantë, të shpallur po më 24 shtator, Kolumbia e ka klasifikuar Gardën Revolucionare Islamike të Iranit (IRGC/CGRI) si organizatë terroriste, duke argumentuar se ajo përbën rrezik serioz për paqen dhe sigurinë ndërkombëtare. Bogota njoftoi gjithashtu forcimin e masave të kontrollit dhe sigurisë për të penguar hyrjen në territorin kolumbian të personave të lidhur me këtë strukturë.
Vendimi vjen në një moment të tensionuar të marrëdhënieve ndërkombëtare rreth Iranit dhe konfliktit në Lindjen e Mesme. Sipas El País, lëvizja e Bogotas shënon një kthesë të rëndësishme në politikën e jashtme të qeverisë së presidentit Abelardo de la Espriella, e cila ka thelluar marrëdhëniet me Shtetet e Bashkuara dhe ka rivendosur marrëdhëniet diplomatike me Izraelin.
© 2026 Argumentum
