Diplomati rus ndërroi jetë papritur, njoftoi Ministria e Jashtme e Rusisë. I emëruar në Uashington në mars 2025 nga Vladimir Putin, Darchiev ishte një nga figurat kryesore të diplomacisë ruse në marrëdhëniet me SHBA-në dhe kishte për detyrë të drejtonte përpjekjet për afrimin me administratën Trump.
Ambasadori i Rusisë në Shtetet e Bashkuara, Alexander Darchiev, ka ndërruar jetë papritur në moshën 66-vjeçare. Lajmi u bë i ditur të mërkurën, më 11 nëntor, nga Ministria e Jashtme ruse.
“Drejtuesit dhe stafi i Ministrisë së Jashtme të Rusisë njoftojnë me keqardhje të thellë se Alexander Darchiev, Ambasador i Jashtëzakonshëm dhe Fuqiplotë i Rusisë në SHBA, ndërroi jetë papritur më 11 nëntor, në moshën 66-vjeçare”, thuhet në deklaratën e ministrisë.
Në vlerësimin e saj, diplomacia ruse e cilësoi Darchievin si “një diplomat të shquar, një drejtues me përvojë, një mik të mirë dhe një mentor”.
“Një profesionist i përkushtuar dhe një ekspert i shkëlqyer i çështjeve amerikane, Alexander Darchiev shërbeu në një nga fushat më kritike të politikës së jashtme ruse”, theksohet në deklaratë.
Diplomatët rusë shprehën ngushëllimet më të sinqerta për familjen dhe të afërmit e ambasadorit, duke shtuar se kujtimi i kolegut të tyre, i cili u nda nga jeta shumë herët, do të mbetet përgjithmonë në zemrat e tyre.
Ministria nuk bëri të ditur shkakun apo rrethanat e vdekjes së tij.
Në krye të diplomacisë ruse në Uashington
Presidenti rus Vladimir Putin e emëroi Darchievin ambasador në Shtetet e Bashkuara në mars të vitit 2025, në një periudhë kur Moska dhe administrata e presidentit amerikan Donald Trump po përpiqeshin të rivendosnin dialogun dhe të përmirësonin marrëdhëniet dypalëshe.
Emërimi i tij erdhi në një moment të rëndësishëm për marrëdhëniet ruso-amerikane, të karakterizuara nga tensione të forta pas nisjes së luftës në Ukrainë. Përpjekjet për afrimin mes Moskës dhe Uashingtonit kanë shkaktuar shqetësim në Kiev dhe në disa vende evropiane.
Përpara marrjes së detyrës në Uashington, Darchiev kishte mbajtur disa poste në Ministrinë e Jashtme ruse dhe kishte shërbyer në përfaqësitë diplomatike të vendit në Amerikën e Veriut. Ai kishte qenë gjithashtu ambasador i Rusisë në Kanada dhe kishte drejtuar Departamentin për Amerikën e Veriut në diplomacinë ruse.
Darchiev u diplomua në vitin 1983 në Universitetin Shtetëror të Moskës “Lomonosov”.
Vdekja e tij ndodh në një periudhë kur marrëdhëniet mes Rusisë dhe Shteteve të Bashkuara mbeten në fokus të diplomacisë ndërkombëtare, veçanërisht për shkak të luftës në Ukrainë dhe përpjekjeve për të gjetur një rrugë drejt negociatave.
© 2026 Argumentum
