Interpretimi i këngës serbe “Oj Kosovo, Kosovo” në aktivitetin hapës të Forumit të Zgjerimit të Bashkimit Evropian në Bruksel ka nxitur debat mbi përgjegjësinë institucionale të BE-së dhe qasjen e saj ndaj Kosovës dhe Serbisë. Në një analizë të publikuar pas ngjarjes, studiuesi Gurakuç Kuçi e lidh këtë incident me politikën e stabilitokracisë së Brukselit ndaj Serbisë, duke ngritur shqetësime për normalizimin e narrativave nacionaliste dhe pretendimeve territoriale ndaj Kosovës.
Në analizën e titulluar “Nacionalizmi serb në skenën e BE-së: Stabilitokracia në kurriz të Kosovës”, Asst. Prof. Dr. Gurakuç Kuçi, profesor në UNI College, argumenton se interpretimi i këngës “Oj Kosovo, Kosovo” në një aktivitet zyrtar evropian shkon përtej një incidenti kulturor, duke ngritur çështje politike dhe të sigurisë që prekin drejtpërdrejt besueshmërinë e Bashkimit Evropian.
Sipas Kuçit, kënga, e shkruar dhe publikuar në vitin 1989, në periudhën e mobilizimit nacionalist dhe shovinist serb, përmban pretendime territoriale ndaj Kosovës dhe lidhet me narrativat historike e politike që, sipas tij, janë përdorur për të justifikuar politikat gjenocidale të Serbisë ndaj Kosovës.
Studiuesi vë në dukje atë që e konsideron një kontradiktë mes politikave dhe veprimeve të institucioneve evropiane. Ai kujton se Bashkimi Evropian financon programe kundër diskriminimit dhe gjuhës së urrejtjes, ndërsa promovon tolerancën dhe pajtimin rajonal.
“Si mundet Bashkimi Evropian, i cili financon programe për të luftuar diskriminimin dhe gjuhën e urrejtjes, ndërkohë që promovon tolerancën dhe pajtimin rajonal, të lejojë promovimin e një narrative të tillë në një prej aktiviteteve të veta zyrtare?”, shkruan Kuçi.
Ai e konsideron edhe më problematike faktin që ngjarja u zhvillua në kuadër të Forumit të Zgjerimit, ku diskutohet e ardhmja evropiane e rajonit, ndërkohë që, sipas tij, Kosova nuk figuron me përfaqësim qeveritar në programin e nivelit të lartë të aktivitetit.
Stabilitokracia dhe qasja e BE-së ndaj Serbisë
Kuçi shkruan se politika e BE-së ndaj Serbisë së Aleksandar Vuçiçit ka privilegjuar stabilitetin afatshkurtër politik, në vend që të përballet me politikat destabilizuese të Beogradit.
“Mesazhi i përcjellë nga një interpretim i tillë në zemër të Brukselit është thellësisht shqetësues: pretendimeve territoriale serbe po u jepet një platformë edhe në aktivitetet evropiane, ndërsa Serbia, ndaj së cilës ndiqet një qasje politike akomoduese, vazhdon të trajtohet si instrument për ruajtjen e stabilitetit rajonal”, argumenton Kuçi.
Ai paralajmëron se tolerimi i narrativave territoriale mund të krijojë kushte për normalizimin e tyre, të dobësojë përpjekjet për pajtim dhe ta shndërrojë procesin e zgjerimit të BE-së në një mekanizëm që përshtatet me kërkesat politike të Beogradit, në vend që të mbështetet në rregulla dhe detyrime të barabarta për të gjitha palët.
Në këtë kontekst, studiuesi i referohet edhe Marrëveshjes së vitit 2023 për normalizimin e marrëdhënieve ndërmjet Kosovës dhe Serbisë, të ndërmjetësuar nga Bashkimi Evropian. Ai thekson se respektimi i integritetit territorial, barazisë dhe marrëdhënieve të fqinjësisë së mirë janë parime që duhet të zbatohen në mënyrë të qëndrueshme.
Kuçi kërkon reagim nga Marta Kos
Në analizën e tij, Kuçi i drejton një thirrje të drejtpërdrejtë komisioneres evropiane për Zgjerimin, Marta Kos, duke kërkuar që ajo të distancohet publikisht nga interpretimi i këngës, të kërkojë falje për lejimin e saj në një aktivitet të Komisionit Evropian dhe të sqarojë se kush e autorizoi përfshirjen e këtij repertori në program.
Sipas tij, Bashkimi Evropian duhet të qartësojë nëse procesi i zgjerimit do të vazhdojë të mbështetet në sundimin e ligjit, sigurinë dhe respektimin e integritetit territorial, apo nëse marrëdhëniet me Serbinë do të vazhdojnë të ndikohen nga logjika e stabilitokracisë.
“Pajtimi që toleron pretendimet territoriale nuk ndërton paqe të qëndrueshme; ai krijon kushtet për kriza të ardhshme”, përfundon Kuçi në analizën e tij.
© 2026 Argumentum





















































