Presidenti Ilir Meta u pyet mbrëmjen e sotme në emisionin Opinion nëse ishte i vërtetë lajmi se kur ambasadorja e SHBA Yuri Kim shkoi në Presidencë, ai nuk doli vetë në takim por i nxori këshilltarët.
“Ore unë nuk jam njeri papunë që do pres pa orë këdo”, tha Meta, ndërsa shtoi se po të kishte kërkuar takim zyrtar ambasadorja Kim, do ishte pritur si e tillë. “Këto janë mashtrime që shpërndan Fuga me ata që ka Rama në Ambasada. Nuk është e vërtetë që ka kërkuar takim zyrtar me presidentin. Kur ajo të kërkoj takim zyrtar dhe do pritet në mënyrë zyrtare. Takimin e kanë kërkuar këshilltarët dhe është takuar me ta”, tha Meta.
Ndërkohë, i pyetur sërish nga moderatori Blendi Fevizu nëse mesazhi i ambasadores së SHBA i drejtohej atij, Meta tha se meszhi ishte për Ramën.
“Zotëri, nuk ka si ta ketë për mua ambasadorja. Unë jam kryetar i shtetit dhe nuk kam si të jem aktor politik. Për opozitën nuk e ka se ajo s’ka ndikim në Reformë. Kështu në Shqipëri ka vetëm një aktor politik dhe ai është Edi Rama. Ka dhe një tjetër, që janë këto dy ambasada që duhet të përgjigjeshin për këto paanësi”, përmbylli Meta.
