Presidenti i Republikës, Sh. T. Z. Bajram Begaj, priti sot Ambasadoren e re të Delegacionit të Bashkimit Evropian në Shqipëri, znj. Sofia Moreira de Sousa, me rastin e paraqitjes së letrave kredenciale.
Presidenti Begaj i uroi Ambasadores suksese në detyrën e saj, duke vlerësuar rolin e rëndësishëm të Delegacionit të BE-së në forcimin e marrëdhënieve Shqipëri–BE dhe në mbështetjen e procesit të integrimit evropian të vendit.
Gjatë takimit u diskutua mbi ecurinë e negociatave të anëtarësimit, reformat dhe angazhimin e Shqipërisë për përmbushjen e standardeve evropiane. Kreu i Shtetit nënvizoi se Shqipëria ndodhet në një fazë të avancuar dhe dinamike të procesit të integrimit, duke shprehur besimin se objektivi strategjik për anëtarësim në Bashkimin Evropian në vitin 2030 është i arritshëm.
Begaj vlerësoi mbështetjen politike, financiare dhe teknike të BE-së për reformat transformuese në Shqipëri, duke e cilësuar Delegacionin e BE-së në Tiranë një partner të besuar dhe bashkëpunëtor të rëndësishëm në rrugëtimin evropian të vendit.
Një pjesë e rëndësishme e diskutimit iu kushtua reformës në drejtësi dhe luftës kundër korrupsionit. Presidenti rikonfirmoi angazhimin për forcimin e pavarësisë dhe integritetit të institucioneve të drejtësisë, si dhe për funksionimin e tyre të pavarur dhe të pandikuar politikisht.
Kreu i Shtetit theksoi gjithashtu se anëtarësimi në Bashkimin Evropian mbetet një objektiv kombëtar, i mbështetur gjerësisht nga shoqëria shqiptare.
“Shqipëria është e angazhuar për përmbushjen e objektivit të saj strategjik për anëtarësim në Bashkimin Evropian në vitin 2030. Përfshirja e të gjithë shoqërisë shqiptare në realizimin e kësaj ambicieje dhe entuziazmi i saj për këtë proces janë një tipar që na diferencon dhe na nxit të punojmë edhe më fort për ta arritur këtë objektiv”, u shpreh Presidenti Begaj.
Gjatë takimit u evidentua edhe harmonizimi i plotë i Shqipërisë me Politikën e Jashtme dhe të Sigurisë të Bashkimit Evropian, si dëshmi e orientimit strategjik të vendit dhe e përkushtimit ndaj politikave dhe vlerave të përbashkëta evropiane.
Në përfundim, Presidenti Begaj shprehu besimin se Ambasadorja Sofia Moreira de Sousa do të japë një kontribut të rëndësishëm në avancimin e marrëdhënieve Shqipëri–BE dhe në procesin e integrimit evropian të vendit.
Duke iu drejtuar Ambasadores së re të BE-së, Presidenti Begaj shprehu edhe një pritshmëri të qartë për të ardhmen e procesit: “Besoj se, deri në përfundim të mandatit tuaj, Shqipëria do të jetë anëtarësuar në Bashkimin Evropian.”
© 2026 Argumentum
