Paga mesatare mujore bruto për një të punësuar me pagë,gjatë tremujorit të parë 2020,është 53.232lekë, duke u rritur me 3,3%,krahasuar me të njëjtin tremujor të vitit të kaluar, raportoi INSTAT.
Por, në raport me tremujorin e fundit 2019, paga mesatare ka shënuar një rënie të lehtë prej rreth 0.5%. Në mes të marsit shpërtheu the pandemia e Covid-19, ku izolimi me synim parandalimin e tij pritet të ketë ndikuar ndjeshëm në tregun e punës dhe pagat mesatare, që gjithsesi pritet të reflektohet në statistikat e tremujorit të dytë.
Të dhënat paraprake tregojnë se gati gjithë sektorët kanë ulur pagat në tremujorin e parë, por më e fortë tkyrrja ka qenë për sektorin financiar dhe të sigurimeve, nga 115 mijë lekë në 105 mijë lekë, ose 8.7% më pak.
Ky sektor vijon të mbetet ai që i paguan më shumë punonjësit.
Gjatë tremujorit të parë 2020, paga mesatare mujore bruto për një të punësuar me pagë në sektorin e aktiviteteve financiare dhe të sigurimit është 97,2 % më e lartë sesa mesatarja në nivel kombëtar, ndërsa në grup-aktivitetin e Bujqësi, pyje dhe peshkim është 36,4% më e ulët, raporton INSTAT.
Informacioni dhe komunikacioni është sektori i dytë që paguan më shumë, por dhe ai ka shënuar një rënie të lehtë të pagës mesatare, me rreth 2%, në 78 mijë lekë.
Tkurrje e lehtë është reflektuar dhe në “Tregtia; transporti; aktivitetet e akomodimit dhe shërbimit ushqimor”, ku paga mesatare është rreth 40 mijë lekë.
Gjatë tremujorit të parë 2020, paga mesatare bruto për grup-aktivitetin e Industrisë, ka rritjen më të madhe prej 3,7%,krahasuar me të njëjtin tremujor të vitit të kaluar, ndërsa Bujqësia, pyjet dhe peshkimi ka një ulje prej 10,8%.
Në shtet, paga mesatare është rreth 63 mijë lekë, sërish me një tkurrje të lehtë prej 1% në raport me fundin e vitit.
Gjatë tremujorit të parë 2020, paga mesatare mujore bruto, për një të punësuar në grup-profesionin e ligjvënësve, nëpunësve të lartë të administratës shtetërore dhe drejtorëve ekzekutivë është 77,9 % më e lartë sesa mesatarja në nivel kombëtar, ndërsa në grupin e Punëtorëve (Profesione elementare) është 40,2 % më e ulët.
Paga për grup-profesionin e Forcave të armatosura, ka rritjen më të madhe prej 6,9 % gjatë tremujorit të parë 2020, krahasuar me të njëjtin tremujor të vitit të kaluar, ndërsa për grup-profesionin e të punësuarve si Ligjvënës, nëpunës të lartë të administratës shtetërore dhe drejtorë ekzekutivë ka një ulje, prej 2 %, sipas INSTAT.
