Hapet Bajpasi i Vlorës, aksi i ri panoramik për të lehtësuar qarkullimin e automjeteve gjatë pikut të sezonit.
Kryeministri Edi Rama, i cili ishte sot i pranishëm në hapjen e këtij aksi, u shpreh se “është lajm i shumëpritur prej vitesh dhe sot faktikisht ne jemi këtu për të thënë që kush niset për në jug, për të kaluar nga Vlora poshtë në bregdetin e Jonit, ka një mundësi komplet ndryshe nga ç’ka qenë, sepse kalohet me lirshmëri të madhe edhe në një fragment natyre të panjohur më parë të paeksploruar dhe shijuar më parë me një udhëtim panoramik që e fut në klimën e pushimit çdo pushues, çdo vizitor, çdo turist”.
“Dhe koha është shfrytëzuar në mënyrë shembullore, sepse projekti ishte problematik. Problemet ishin të pafundme: ngecjet, shpronësimet. Tani ja ku jemi. Dhe faktikisht në vjeshtë këtu nuk ka më kantier”, theksoi Rama.
Ministrja e Infrastrukturës dhe Energjisë, Belinda Balluku tha se, “siç e kishim premtuar sot jemi gati për të hapur Bajpasin e Vlorës. Sigurisht duam të theksojmë që është një hapje provizore pasi vazhdojnë punimet, por megjithatë ne kemi marrë të gjitha masat e sigurisë rrugore. Bajpasi është i kalueshëm nga të gjitha anët në këto momente, pa asnjë lloj bllokimi dhe në të gjitha pikat që i kemi diskutuar me Policinë e Shtetit, prej ditësh tashmë, dhe që i konsiderojmë pika kritike, për shkak të punimeve që vazhdojnë në disa zona janë marrë masat e duhura, siç janë dy hyrjet e Kaninës. Ndërkohë që vazhdon ndërtimi urës 3, vendosja e semaforëve, për të bërë një menaxhim të trafikut nga të dyja krahët, pa problematika”.
“Janë vendosur të gjitha tabelat që tregojnë limitet e shpejtësisë, që do të respektohen padyshim. Kemi kërkuar nga Policia e Shtetit, dhe në këtë rast nga Policia Rrugore forca të shtuara në të gjitha pikat ku ne konsiderojmë që mund të ketë aksidente të mundshme, për t’i pasur në kontroll të gjitha këto pika që të ketë forca të shtuara policie”, tha ajo.
“I gjithë Bajpasi do të monitorohet dhe me radar, siç kemi vendosur me Policinë Rrugore, kështu që shpresojmë që gjithçka do të shkojë mirë, ndërkohë në pikat e kantiereve ku punohet nuk do të ketë asnjë ndalesë, pra puna do të vazhdojë, duke qenë se kemi marrë edhe një premtim nga kompania që ura e tretë, pra ajo që bën bajpasimin e Kaninës do të jetë gati në fund të muajit shtator, duke qenë se na e lejon dhe koha gjatë periudhës së verës”, theksoi Balluku.
“Gjithçka shkon sipas skedulit. Trafiku fillon tani nga ora 7 që të bajpasohet nga hyrja e Vlorës në këtë segment dhe sigurisht i gjithë trafiku që vjen nga jugu dhe që nuk do të jetë e nevojshme të kalojë më në Radhimë apo në Vlorë, do të hyjë menjëherë këtu në rrethrrotullimin e Orikumit”.
Drejtori i ARRSH, Ergys Verdho tha se, “janë marrë të gjitha masat që siguria rrugore të jetë në maksimumin e mundshëm sa na lejon për kantierin në të cilin ndodhemi”. “Kemi marrë masat që të ecë me ritme mbrojtja e shpateve”, theksoi ai.
“Mbarimi i segmentit në pjesën e poshtme të Kaninës, do të thotë që brenda vitit ne kemi mundësi të bëjmë një hapje tërësore të kalimit në një pjesë të mirë të këtij kantieri”, tha Verdho.
Ne ndërkohë, shtoi Balluku, “siç e kemi theksuar disa herë mungesa e studimit gjeologjik në nisjen e kësaj vepre, ashtu siç ka ndodhur dhe në herë të tjera, sigurisht që ka krijuar problematika të mëdha, pasi jemi vendosur shpesh përpara të papriturave, siç kemi pasur rastin e urës 4, e cila ka pasur një vështirësi shumë të madhe për të arritur deri në përfundim të saj. Dhe në të njëjtën situatë po përballemi sot edhe në urën e 3-të. Sigurisht që zgjidhja teknike është gjendur, por duke kërkuar më shumë përpjekje, qoftë nga kompania, edhe nga ARRSH, për sa i përket zgjidhjeve teknike”.
Balluku nënvizoi se, “është shumë e rëndësishme që sigurisë rrugore ne i kemi dhënë vëmendjen maksimale këtu. Pra jo vetëm për ta dorëzuar në afatin kohor, pra në nisjen e sezonit, ashtu siç kishim premtuar, por edhe për të qenë totalisht të bindur që të gjitha kërkesat e sigurisë rrugore janë të përmbushura”.
Drejtori i përgjithshëm i Policisë së Shtetit, Ardi Veliu, tha se, “për dy javët e fundit sektori i sigurisë rrugore në Drejtorinë e Përgjithshme të Policisë së bashku me Drejtorinë e Policisë Rrugore, në bashkëpunim edhe me ARRSH-në, bënë studimin e sinjalistikës së nevojshme, pasi aktualisht do të vazhdojë kantieri në punim dhe ne do ta kompletojmë me sinjalistikë provizore. Dhe bazuar në këtë në të gjitha pikat e rrezikut, janë piketuar dy semaforë që do të rregullojnë qarkullimin në ato dy pika rreziku. Njëkohësisht është bërë edhe kompletimi me të gjithë sinjalistikën tjetër të nevojshme. Sinjalistika është bashkëkohore, e ndriçuar. Po kështu është bërë kompletimi me sinjalistikën vertikale, horizontale informuese. Pra i gjithë aksi është me të gjithë sinjalistikën e nevojshme”.
Veliu, tha se, “do të ketë në shërbim permanent 24 orë në këtë aks rrugor me 2 ose më shumë punonjës policie, absolutisht të mbështetur edhe me logjistikën e nevojshme që ju duhet në disa segmente, si përdorimi i radarit, qoftë radari i lëvizshëm, qoftë radari me mjet”.
Ministrja Balluku më pas, e pyetur nga Kryeministri Rama se sa është koha e përshkimit të kësaj rruge, u shpreh se, “ne e kemi bërë një provë mbrëmë kryeministër, pra gjatë asaj provës gjenerale që bëmë me Policinë e Shtetit, këtu kemi rreth 30 km. I kemi përshkruar sipas tabelave të vendosura pra disa vende me 60 km/orë, disa vende, aty ku ka semaforë, edhe 30 dhe 40 km/orë dhe nuk shkon më shumë se 20 minuta, nga fillimi deri në fund. Pra ne e kemi përshkuar si të ishte me trafik”.
Balluku shtoi se, “se kantieri i Orikum-Dukat vazhdon. Është kantier i hapur. Kemi pasur të gjitha proceset që duheshin ndjekur, edhe për sa i përket leje zhvillimore edhe të gjithë aplikimeve për lejet e ndërtimit. Atje ka nisur faza parapërgatitore. Po ecet. Ashtu siç me datë 28 korrik përfundojmë procesin e garës për sa i përket tunelit të Llogorasë dhe shpresojmë të jetë i suksesshëm dhe të nisim menjëherë nga puna edhe aty, duke plotësuar të gjithë këtë gjerdanin infrastrukturor të jugut. Dhe ndërkohë edhe kantiere të tjera janë të hapura, siç është kantieri i rrugës Palasë-Dhërmi apo dhe pjesë të tjera që bëjnë lidhjen nga bajpasi i Fierit deri në rivierën e jugut”.
Postimi i plotë
Bajpasi i Vlorës. Hapet aksi i ri panoramik për të lehtësuar qarkullimin e automjeteve gjatë pikut të sezonit. Një prej veprave më spektakolare të infrastrukturës sonë kombëtare, e cila do të shkurtojë lëvizjen, nxisë zhvillimin e një tjetër zone plot potenciale dhe sigurisht do t’u ofrojë udhëtarëve pamje nga më të bukurat drejt bregdetit të jugut, tanimë është në prag të përfundimit, por e hapur për lëvizjen e pushuesve.
