E shtuna shënoi ditën e tretë të një pushtimi masiv tokësor, detar dhe ajror të urdhëruar nga Presidenti Vladimir Putin në atë që doli të ishte dislokimi më i madh ushtarak i Rusisë që nga Lufta e Dytë Botërore dhe që ka rezultuar në qindra viktima.
Presidenti ukrainas Volodymyr Zelenskyy refuzoi një ofertë amerikane që ai të evakuohej, duke këmbëngulur se ai do të qëndronte në Kiev. “Lufta është këtu,” tha ai të shtunën.
Luftimet në rrugë kanë shpërthyer në kryeqytetin e Ukrainës, Kiev, pasi forcat ruse përparuan në qytet dhe zyrtarët ukrainas u kërkuan banorëve të strehoheshin.
Ndërsa zbardhi agimi në Kiev të shtunën, nuk ishte menjëherë e qartë se sa larg kishin përparuar ushtarët. Zyrtarët ukrainas raportuan sukses në shmangien e sulmeve, por luftimet vazhduan pranë kryeqytetit. Përleshjet e raportuara në skajin e qytetit me gati tre milionë banorë sugjeruan se njësitë e vogla ruse po hetonin mbrojtjen e Ukrainës për të hapur një shteg për forcat kryesore, raporton Al Jazeera
Zelenskyy u ka kërkuar gjithashtu qytetarëve ukrainas që të mbrojnë vendin dhe tha se armët do t’u jepen të gjithëve që vijnë përpara. Rreth 18,000 armë me municion u janë shpërndarë rezervistëve vetëm në rajonin e Kievit që nga e enjtja, thanë autoritetet ukrainase.
Ministria e Mbrojtjes u tha gjithashtu banorëve të Kievit që të prodhonin bomba me benzinë për të zmbrapsur sulmet ruse.
Zyrtarët ukrainas thanë më herët se më shumë se 3,500 ushtarë rusë janë vrarë.
Autoritetet ruse nuk dhanë të dhëna për viktimat.
Zyrtarët e Kombeve të Bashkuara raportuan 25 të vdekur civilë, kryesisht nga bombardimet dhe sulmet ajrore, dhe thanë se 100,000 njerëz besohej se kishin lënë shtëpitë e tyre. Ata vlerësojnë se deri në pesë milionë mund të largohen nëse luftimet përshkallëzohen.
Zelensky bën thirrje për një vendim urgjent për anëtarësimin e Ukrainës në BE
Presidenti ukrainas Volodymyr Zelensky ka bërë thirrje për një vendim urgjent për anëtarësimin në BE për vendin e tij, duke thënë se “ka ardhur momenti vendimtar”.
Të shtunën në mëngjes, në ditën e tretë të sulmit rus ndaj Ukrainës, Zelensky tha se kishte diskutuar “ndihmë të mëtejshme efektive dhe luftën heroike të ukrainasve për të ardhmen e tyre të lirë” me presidentin e Këshillit Evropian, Charles Michel.
“Ka ardhur momenti vendimtar për të mbyllur një herë e mirë diskutimin e gjatë dhe për të marrë një vendim për anëtarësimin e Ukrainës në BE”, shkroi presidenti ukrainas në Twitter.
Zelensky gjithashtu ka kërkuar vazhdimisht për qartësi në lidhje me perspektivat e Ukrainës për anëtarësim në NATO. Mundësia që Ukraina mund të anëtarësohet në NATO në të ardhmen është një nga arsyet e vendimit të Rusisë për të nisur një aksion ushtarak,raporton RT
Çeçenia në krah të Rusisë
Udhëheqësi çeçen i Rusisë thotë se forcat e tij janë dislokuar në Ukrainë
Ramzan Kadyrov, udhëheqësi i rajonit rus të Çeçenisë dhe një aleat i Putinit, thotë se luftëtarët çeçenë janë vendosur në Ukrainë.
Në një video të postuar në internet, Kadyrov pretendoi se njësitë nga rajoni i Kaukazit të Veriut – një republikë përbërëse e Rusisë – nuk kishin pësuar humbje deri më tani.
Ai pretendoi se forcat ruse mund të merrnin lehtësisht kontrollin e madh të qyteteve të Ukrainës, përfshirë Kievin, por se detyra e tyre ishte të shmangnin humbjet masive të jetëve.
Turqia ndalon kalimin e anijeve luftarake ruse në Detin e Zi
Presidenti i Ukrainës ka falënderuar homologun e tij turk Rexhep Tajip Erdogan për mbështetjen “ushtarake dhe humanitare” të Ankarasë, duke thënë se “ndalimi i kalimit të anijeve luftarake [ruse] në Detin e Zi” ishte shumë i rëndësishëm për vendin e tij.
Turqia, e cila kontrollon ngushticat e Dardaneleve dhe të Bosforit që lidhin Mesdheun me Detin e Zi, nuk ka shpallur publikisht ndonjë ndalim për anijet luftarake ruse që përdorin kanalet, pavarësisht kërkesave urgjente të Kievit që të marrë një masë të tillë.
Të premten, ministri i jashtëm i Turqisë tha se sipas konventës së vitit 1936 që mbulonte këtë çështje, Ankaraja nuk mund të ndalonte anijet luftarake që ktheheshin në një bazë vendase në Detin e Zi të kalonin nëpër ngushticat. Rusia ka një bazë të madhe detare në Detin e Zi.
