Turneu i trofeut të Kupës së Botës, organizuar nga FIFA dhe Coca-Cola, ka mbërritur paraditen e së dielës në Shqipëri dhe do të ekspozohet në ambientet e Qendrës për Hapje dhe Dialog (COD), deri në orën 21:00 të mbrëmjes.I pranishëm në këtë event ishte edhe Kryeministri, i cili gjatë fjalës së tij përshëndetëse falënderoi organizatorët e Coca-Colës dhe FIFA-s për këtë realizimin e këtij turneu.“Këto janë ditë shumë të veçanta për doganën shqiptare, sepse për herë të parë u ndeshën me procedurën e zhdoganimit të një kupe dhe jo të një po të dy kupave njëherazi, edhe të kupës së botës dhe asaj të konfederatës, e cila do të jepet në stadiumin tonë, të mërkurën. Por këto janë nga ato halle që do dëshironim që t’i kishim edhe më të shumta në të ardhmen. Edhe pse orët e qëndrimit të kupës në Tiranë janë vetëm 5 orë, uroj dhe shpresoj që sa më shumë futbolldashës ta vizitojnë kupën”, tha Rama.“Uroj që gjithë miqtë që kanë ardhur ta kalojnë mirë në Tiranë ne jemi gati t’i mbajmë këtu. Për momentin jemi duke u marr me kupat e të tjerëve po mbase vjen dita që ta marrim edhe ne“, shtoi Kryeministri.
Në fjalën e tij, Rama falenderoi edhe ish-kapitenin e Kombëtares, Lorik Cana.
“Shikoj që mes të tjerësh këtu është kapiteni ynë i përhershëm i ekipit tonë kombëtar, Lorik Cana, se unë të them të drejtën nuk e di kush është kapiteni sot edhe kjo është për hir të së vërtetës përgjegjësi e Lorikut sepse Loriku ishte një i atillë kapiten që tani të gjithë ata që do e ndjekin nga pas do duken si kapiten të përkohshëm, njësoj si kupa e botës që është e Brazilit dhe shkon herë pas here në duar të tjera edhe shiriti i kapitenit të kombëtares është i Lorikut dhe tani shkon nëpër duar të tjera thjesht për arsye procedurale. Kështu që falenderoj shumë dhe Lorikun për praninë e tij këtu. Nuk dua të zgjatem më tutje. Uroj që gjithë miqtë që kanë ardhur së bashku me Gilberton të ndihen mirë në këto orë, të kalojnë një mbrëmje të këndshme në Tiranë. Ne jemi gati t’i mbajmë edhe për më gjatë, madje unë Gilbertos i thashë kur tha që tani jam ne Brazil, por po mendoj të kthehem në Europë, i thashë: një nga stacionet mund të jetë këtu se për momentin jemi duke u marrë me kupat e të tjerëve por mbase vjen dita ta fitojmë një kupë edhe ne, nuk i dihet, asnjëherë mos thuaj kurrë”, tha Kryeministri.
Ish-futbollisti Gilberto Silva, në fjalën e tij falenderoi kryeministrin Rama për mikpritjen, teksa tha se “kemi shijuar çdo minutë këtu në Shqipëri, ku kemi sjell Trofeun e origjinal të Kupës së Botës, që do të thotë shumë”.
“Nuk ka rëndësi nëse e kam parë dje dhe e shoh në të ardhmen trofeun por, ky moment për mua është shumë i veçantë duke qenë se e kam ndarë këtë moment me Kryeministrin Rama, përfaqësuesin e Coca Colës dhe të tjerë, sepse për mua kjo ka të bëjë me ëndrrën, frymëzimin”, tha ai.
Sipas tij, kjo vlen që të bëhesh më i mirë.
“Trofeu në fakt është diçka unike që frymëzon brezin e ri që të bëhet më i mirë në futboll e në jetë. Sepse futbolli ka fuqinë t’i bëjë njerëzit bashkë, për të mirën”, u shpreh Silva, teksa uroi që “që ky Trofe t’ju japë mundësinë për të ëndërruar dhe punuar fort”.Kjo ndalesë e veçantë, e gjen Shqipërinë në kushtet e mikpritjes të finales së UEFA Conference League mes Romës dhe Feyenoord, më 25 maj, çka shënon organizimin e parë të një finaleje europiane në historinë e kombit shqiptar.
Më heret në ceremoninë e pritjes së Kupës së Botës në Shqipëri merrnin pjesë ministrja e Arsimit dhe Sportit, Evis Kushi, kryebashkiaku i Tiranës, Erion Veliaj dhe Luca Busi, Presidenti i Coca-Colas në Shqipëri.
Veliaj dha mesazhin se sporti i bashkon njerëzit dhe se të gjithë duhet të mësojnë nga loja në skuadër.
“Jam i lumtur që mikpresim në Tiranë Kupën e Botës. E paprekshme për të gjithë ne tokësorët, por e prekshme nga ata që janë triumfues. Ashtu si Silvio Gaxaniga, skulptori i famshëm italian, që jo vetëm krijoi Kupën e Botës, por edhe Kupën e UEFA-s, pastaj Superkupën. Një artist italian, i cili kur po fantazonte se çfarë mund të ishte trofeu dinjitoz për ata që janë më të mirët e botës, konceptoi sportistët që mbajnë botën në krahët e tyre, triumfin e sportit, e lojës në skuadër, të punuarit në ekip dhe të atyre që përpiqen, rrëzohen dhe ngrihen prapë. Kjo simbolikë e madhe që quhet Kupa e Botës, është sot në Tiranë. Është një prej 1000 aktiviteteve që Tirana mikpret, si Kryeqyteti Evropian i Rinisë”, u shpreh Veliaj.
Kryebashkiaku tregoi se gjatë një bisede me Gilberto Silva-n, ish-futbollistin i Brazilit, tashmë Ambasador i Turneut të Trofeut të “FIFA World Cup”, kuptoi se sa e rëndësishme është që, për të qenë një sportist i mirë, duhet të jesh fillimisht një njeri i mirë.
“Duke u fokusuar vetëm te trofeu apo rezultati i garës, harrojmë që mbi të gjitha, përveç se të jesh sportist i mirë, duhet të jesh njeri i mirë. Unë besoj se kemi ambicie për të pasur sportin elitar, por mbi të gjitha kemi një ambicie për të pasur sportin komunitar. Nëpërmjet sportit ne kemi qytetarë të mirë. Një fëmijë mund të mësojë teorinë në shkollë, por siç mëson në një skuadër që jeta ka edhe humbje, edhe fitore, dhe këtë loj karakteri që e krijon një qytetar të mirë e sjell vetëm sporti. Sporti i bashkon njerëzit, është një hapësirë demokratike që na mëson karakter dhe me shpresë do frymëzohemi edhe ne që merremi me politikëbërje, që këtë praktikë të mirë që kemi filluar në Tiranë me terrenet sportive dhe palestrat e hapura, ta shtrijmë në gjithë vendin”, nënvizoi Veliaj.
Ambasadori i Turneut të Trofeut të “FIFA World Cup”, Gilberto Silva tha se ai është këtu për të mbështetur dhe për t’u dhënë shpresë të rinjve që endërrat e tyre mund të bëhen realitet.
“Uroj që kjo ndalesë këtu me trofeun, me të gjithë kohën që do të kemi këtu, shpresoj t’ju frymëzojë të gjithëve, gjeneratat e ardhshme në sport, në jetë, për t’i bërë ëndrrat e tyre realitet. Ne këtu jemi për t’ju mbështetur, për të dhënë më të mirën tonë për ju, me zemrën tonë, me shpirtin tonë, dhe shpresoj të gjithë ta shijoni sepse edhe ne do ta shijojmë shumë çdo minutë këtu”, tha ish-futbollisti Gilberto Silva.
Ndërsa, Luca Busi, Presidenti i Coca-Colas në Shqipëri, falenderoi kryebashkiakun Veliaj për mikpritjen e Kupës së Botës në Tiranë.
“Faleminderit zonjës ministre dhe kryebashkiakut të Tiranës që na mirëpriti në këtë ditë të sotme, për Kupën e Botës, origjinalen, dhe për të festuar këtë pasion të madh. Ne operojmë në Shqipëri prej 28 vitesh dhe tashmë ajo është kthyer shtëpia jonë. Unë u emocionova, kur skuadra kombëtare shqiptare mori pjesë në Evropianin e 2016-ës. Duke parë gjithë këta tifozë, gjithë këto shqiponja, që festojnë në tribunë, unë shpresoj që në edicionin tjetër të Kupës së Botës të realizohet ëndrra që Shqipëria të kualifikohet”, përfundoi Busi.
Turneu i Trofeut të FIFA World Cup nga Coca-Cola 2022 filloi me eventin e parë në Dubai, ku ish-fituesit e Kupës së Botës FIFA, Iker Casillas dhe Kaká u mblodhën së bashku për të dërguar Trofeun origjinal të Kupës së Botës FIFA në udhëtimin e tij rreth botë përpara kampionatit botëror. Duke filluar nga sot, Coca-Cola fton komunitetin vendas të futbollit për të parë simbolin më të njohur në futboll dhe për të përjetuar magjinë e vërtetë të ngjarjes më të madhe dhe më të pritur të një sporti në botë – FIFA World Cup./ATA-Argumentum.al
