Ish-Presidenti Bujar Nishani u nda sot nga jeta në mënyrë të parakohshme, në moshën 56-vjecare pasi prej dy muajsh vuajti komplikacionet e infektimit me koronavirus. Ai vuante nga një pneumonia bilaterale me insuficience respiratore, si pasojë e komplikacioneve dhe kurohej në një spital në Gjermani.
Nishani fillimisht mori ndihmën mjekësore në spitalin ‘Shefqet Ndroqi’ dhe pas rëndimit të gjendjes shëndetësore, u dërgua në Gjermani.
Kush ishte Bujar Nishani?
Bujar Nishani lindi në Durrës më 29 shtator 1966. Studimet e larta i kreu në vitin 1988 në Akademinë Ushtarake “Skënderbej” në Tiranë. Studimet pasuniversitare në Menaxhimin e Burimeve të Mbrojtjes i përfundoi në vitin 1996 në Kaliforni, Shtetet e Bashkuara. Nishani ka studiuar edhe jurisprudencë në Fakultetin e Drejtësisë të Universitetit të Tiranës, ku u diplomua në Drejtësi në vitin 2004. Në vitin 2005, ai mori titullin Master për Studime Evropiane në Shkollën e Studimeve Evropiane të Universitetit të Tiranës.
Karriera e tij profesionale filloi në vitin 1988 si pedagog në Akademinë Ushtarake “Skënderbej”. Më pas, në vitin 1993 shërbeu si drejtor i Punëve të Jashtme në Ministrinë e Mbrojtjes, për të vazhduar në Departamentin e Marrëdhënieve me NATO-n në Ministrinë e Punëve të Jashtme në vitin 1994. Në vitin 1996 Nishani shërbeu në kabinetin e Ministrit të Mbrojtjes. Në vitin 1997, ai u emërua dhe shërbeu si kryetar i Forumit Ushtarak Euroatlantik.
Karriera politike e Nishanit lidhet me Partinë Demokratike ku u anëtarësua në vitin 1991. Në vitin 2001 u zgjodh sekretar i degës së Partisë Demokratike Tiranë; në vitin 2003 u zgjodh nga lista e kandidatëve të Partisë Demokratike, anëtar i Këshillit Bashkiak të Tiranës; në vitin 2005 zgjidhet anëtar i Këshillit Kombëtar të Partisë Demokratike dhe më pas anëtar i Kryesisë së PD-së.
Në korrik të vitit 2005, Nishani, kandidat për Partinë Demokratike, u zgjodh deputet në zonën zgjedhore 34 në Tiranë. Në zgjedhjet parlamentare të qershorit 2009, ai u zgjodh sërish deputet.
Nga marsi 2007 deri në shtator 2009, Nishani shërbeu si ministër i Brendshëm; nga shtatori 2009 deri në prill 2011 shërbeu si ministër i Drejtësisë dhe më pas, në prill të 2011 ai u emërua sërish në postin e ministrit të Brendshëm, ku qëndroi deri në qershor të vitit 2012, kur u zgjodh nga Kuvendi i Shqipërisë në detyrën e Presidentit të Republikës.
Më 24 korrik 2012 Bujar Nishani u zgjodh President i Republikës së Shqipërisë dhe shërbeu në këtë pozitë përgjatë një mandati të plotë deri në vitin 2017.
Nishani ishte njohës i mirë dhe i rrjedhshëm i gjuhës angleze. Ai është i martuar dhe pati dy fëmijë.
Ai u zgjodh president i vendit në moshën 46-vjeçare, duke u bërë kreu më i ri i shtetit në Shqipërinë pluraliste.
/Argumentum.al
