“Me Ballkanin e Hapur do ndryshojmë rajonin përgjithmonë”, kështu theksoi Kryeministri Rama gjatë fjalës së tij mbajtur me rastin e 100 vjetorit të vendosjes së marrëdhënieve diplomatike Shqiperi-SHBA.
Kryeministri Edi Rama thotë se Shtetet e Bashkuara të Amerikës kanë paraqitur një dokument që ka për qëllim thellimin e mëtejshëm të partneritetit strategjik mes Shqipërisë dhe SHBA-së, duke u shprehur se rajoni i Ballkanit do të ndryshojë falë nismës “Open Balkan”, që ai tha se tashmë ka mbështetjen 100% të SHBA-ve.
“Është vërtet nder dhe privilegj që kemi arritur të nënshkruajmë një marrëveshje partneriteti strategjik, dhe së fundmi kemi marrë nga Uashingtoni një dokument për ta thelluar partneritetin strategjik. Shqipëria është baza politike e SHBA në rajon. Ne do ta ndryshojmë rajonin dhe me Ballkanin e Hapur që është një projekt 100% i dakortësuar me SHBA, do të bëjmë të mundur që e shkuara të mos jetë më kërcënim për Ballkanin, por të jetë vetëm një thesar dijesh se si e shkuara të mos përsëritet”, u shpreh Rama.
Në fakt kjo duket si një kundërpërgjigje ndaj Presidentit të Malit të Zi Milo Gjukanoviç, i cili në një intervistë për portalin “Autonomija” tha se “Ballkani i Hapur” duket si një alternativë për vendosjen në jetë të planit të Beogradit për “Botën serbe”
Është një projekt “shumë kontrovers ” dhe skenar alternativ për të ardhmen e Ballkanit Perëndimor jashtë Bashkimit Evropian, tha Ai.
Madje presidenti malazez theksoi se qëllimi i autorëve të idesë së Ballkanit të Hapur është zhdukja e Bosnjë-Hercegovinës, Malit të Zi, Kosovës dhe Maqedonisë së Veriut dhe shtoi se sigurisht që do të përfundonte me “luftë dhe njëfarë gjenocidi”.
Në fakt Gjukanoviç si presidenti i një vendi tashmë anëtar i NATO-s, dhe aleat i SHBA-së nuk do të mund ti lejonte vetës të “akuzonte” pikërisht SHBA-të se po rrezikonin një gjenocid në Ballkan me projektin e “Open Ballkan”, i njëjti projekt që Kryeministri Rama e truembeton si një nismë që ka mbështetjen 100% të SHBA-ve (!)
Nuk është hera e parë që paraqiten projekte apo vizione nën emrin e SHBA-së por në fund nuk e kanë marrë bekimin e tyre.
Kujtojmë vitin 2018 ku u propozua shkëmbimi i territoreve me emërtimin ” korrigjim kufijsh” nga Ish presidenti i Kosovës Z.Hashim Thaçi. Edhe atëherë u përfol se kjo ide kishte mbështetjen e Presidentit amerikan Donald Trump por më vonë ky fakt do të hidhej kategorikisht poshtë nga Ish-emisari amerikan për dialogun Kosovë-Serbi, Richard Grenell.
Edhe në rastin e iniciatives” Open Ballkan”, SHBA-të në deklaratat e tyre kanë theksuar disa herë që vlerësojnë çdo bashkëpunim ndërmjet shteteve të Ballkanit por që duhet të plotësojnë dy kritere kryesore, së pari gjithëpërfshirjen e 6 shteteve të e Ballkanit dhe së dyti që ky bashkëpunim të jetë vetëm ekonomik.
Kështu theksoi i dërguari i posaçëm amerikan për Ballkanin Perëndimor, Gabriel Escobar, në takimin e Ohrit me 7-8 qershor,tha se Shtetet e Bashkuara e mbështesin nismën “Ballkani i Hapur”, duke nënvizuar se çdo nismë duhet të përfshijë të gjashtë shtetet e Ballkanit Perëndimor në nivel të njëjtë. Me rëndësi është që të mbetet projekt ekonomik në mënyrë që të përqendrohet në krijimin e mundësive për njerëzit e rajonit dhe të keni përkrahje më të madhe”.
Një gjë është e sigurtë, Kryeministri Rama ka të drejtë kur thotë se me “Ballkanin e Hapur ” rajoni do ndryshojë përgjithmonë, por pyetja është si do ndryshojë ai?
Urojmë që “profecia” e Gjukanoviç të mos bëhet realitet…
/Argumentum.al
