Ministria e Punëve të Jashtme të Serbisë njoftoi më 22 gusht se llogaritë në Twitter të ambasadave serbe në Armeni, Iran, Indonezi, Nigeri, Zimbabve, Gana dhe Kujvat, por edhe të Konsullatës së Përgjithshme në Çikago, janë pezulluar më 18 gusht.
Sipas kësaj ministrie, pezullimi i llogarive “u bë pa asnjë sqarim dhe pa asnjë njoftim paraprak që do të tregonte për ndonjë shkelje të mundshme të rregullave të komunikimit në këtë rrjet social”.
MPJ e Serbisë tha se “kjo është e papranueshme për misionet diplomatike të një shteti demokratik që nuk është subjekt i asnjë sanksioni”.
Ministria e Punëve të Jashtme njoftoi se, pa hyrë në politikën e biznesit të kompanisë “Twitter”, tregon se “është e papranueshme që misionet diplomatike të një shteti demokratik që nuk është i ekspozuar ndaj asnjë sanksioni të censurohen në këtë mënyrë. sidomos nëse merret parasysh se disa nga profilet e përmendura janë hapur së fundi dhe se nuk kanë qenë aktive dhe se në ato të tjerat nuk ka pasur përmbajtje që mund të përshkruhet si e papërshtatshme”.
“Republika e Serbisë është një vend, angazhimi strategjik i të cilit është anëtarësimi në Bashkimin Evropian dhe ne po i përshtatim standardet tona politike dhe demokratike, të cilat përfshijnë lirinë e mediave, me standardet më të larta evropiane. Prandaj është absurde që një numër i përfaqësive tona diplomatike dhe konsullore censurohen në një rrjet social, i cili krenohet me promovimin e demokracisë dhe pluralizmit të opinionit”, thuhet në njoftim.
Shtohet se Ministria e Punëve të Jashtme e Serbisë i është drejtuar kompanisë “Twitter” me kërkesë që të zhbllokohen llogaritë e misioneve tona diplomatike dhe konsullore.
“Ju kujtojmë se llogaria në Twitter e Arnaud Guyon, drejtor i Drejtorisë për Bashkëpunim me Diasporën dhe Serbët në rajon, është bllokuar javën e kaluar pa asnjë shpjegim dhe se ndërkohë është zhbllokuar. thuhet në njoftim.
/Argumentum.al
